વડોદરા મહાનગરપાલિકાની ચૂંટણી માટે ભાજપે ઉમેદવારોની યાદી જાહેર કરી છે, જેમાં 'નો-રિપીટ થિયરી'નો અત્યંત કડક અમલ જોવા મળ્યો છે. પક્ષે સત્તાના મુખ્ય હોદ્દેદારો - મેયર, ડેપ્યુટી મેયર, સ્થાયી સમિતિ અધ્યક્ષ અને દંડક સહિતના તમામ મોટા નેતાઓની ટિકિટ કાપીને શુદ્ધિકરણનો સંકેત આપ્યો છે.
વર્તમાન મેયર પિંકી સોનીની ટિકિટ કાપી નાખવામાં આવી
સૌથી વધુ ચર્ચા વોર્ડ નંબર 4 ની છે, જ્યાં વર્તમાન મેયર પિંકી સોનીની ટિકિટ કાપી નાખવામાં આવી છે. શહેરમાં તેમની નિષ્ક્રિયતા અને અપેક્ષા મુજબની કામગીરી ન થવાને કારણે પક્ષે તેમના સ્થાને મધુ જૈન જેવા નવા ચહેરાને મેદાનમાં ઉતાર્યા છે. તેવી જ રીતે વોર્ડ નંબર 7 માં વિવાદોના પર્યાય બનેલા સ્થાયી સમિતિના ચેરમેન ડો. શીતલ મિસ્ત્રીનું પણ પત્તું કપાયું છે, તેમના સ્થાને રણજીત રાજપૂતને ટિકિટ આપવામાં આવી છે. તો દંડક મનોજ પટેલના સ્થાને શિક્ષણ સમિતિના ચેરમેન અને યુવા ચહેરો આદિત્ય પટેલને તક મળી છે.