ઘાયલ મેક્સવેલે અફઘાનિસ્તાનને ચટાડી ધૂળ, એકલો જ 11 ખેલાડીઓ પર પડ્યો ભારે

• ઓસ્ટ્રેલિયાએ અફઘાનિસ્તાનને 3 વિકેટે હરાવ્યું 
  
• મેચમાં ગ્લેન મેક્સવેલે શાનદાર બેટિંગ કરી
• ગંભીર ઈજા હોવા છતા મેદાન પર અડગ

મુંબઈના વાનખેડે સ્ટેડિયમમાં રમાયેલી મેચમાં ઓસ્ટ્રેલિયાએ અફઘાનિસ્તાનને 3 વિકેટે હરાવ્યું હતું. આ મેચ અફઘાનિસ્તાનના પક્ષમાં ગઈ હતી, પરંતુ ગ્લેન મેક્સવેલે શાનદાર બેટિંગ કરી અને ટીમને જીત અપાવી. તેણે વર્લ્ડ કપ 2023ની આ મેચમાં બેવડી સદી ફટકારી હતી. મેચ દરમિયાન મેક્સવેલ ઈજાગ્રસ્ત થયો હતો. પરંતુ તેમ છતાં તે અટક્યો નહીં અને અફઘાનિસ્તાન સામે જીત હાંસલ કરી.

મેક્સવેલે મેચ દરમિયાન પીઠના દુખાવાની ફરિયાદ કરી હતી. આ સાથે તેને હેમસ્ટ્રિંગમાં પણ ગંભીર ઈજા થઈ હતી. પરંતુ તે મેદાન પર અડગ રહ્યો. મેચ દરમિયાન એકવાર એવું બન્યું કે મેક્સવેલ મેદાન પર જ રોકાઈ ગયો અને સૂઈ ગયો. પણ પછી ઊભો થયો. અફઘાનિસ્તાનને ઓસ્ટ્રેલિયાએ નહીં પરંતુ મેક્સવેલે હરાવ્યું હતું એમ કહેવામાં આવે તો ખોટું નહીં હોય. મેક્સવેલે 128 બોલનો સામનો કર્યો અને અણનમ 201 રન બનાવ્યા. આ ઇનિંગ દરમિયાન તેણે 21 ફોર અને 10 સિક્સર ફટકારી હતી.

વર્લ્ડ કપ 2023ની 39મી મેચમાં પ્રથમ બેટિંગ કરતા અફઘાનિસ્તાને 291 રન બનાવ્યા હતા. જવાબમાં ઓસ્ટ્રેલિયાએ 7 વિકેટ ગુમાવીને મેચ જીતી લીધી હતી. ટીમે 18.3 ઓવરમાં 7 વિકેટ ગુમાવીને 91 રન બનાવ્યા હતા. તેની અડધાથી વધુ ટીમ પેવેલિયન પરત ફરી હતી. પરંતુ ત્યારબાદ મેક્સવેલ બેટિંગ કરવા આવ્યો અને વાતાવરણ બદલી નાખ્યું. મેક્સવેલની સાથે સુકાની પેટ કમિન્સ પણ અણનમ રહ્યો હતો. પરંતુ તેઓ કંઈ ખાસ કરી શક્યા નહીં. 68 બોલનો સામનો કરીને તેણે માત્ર 12 રન બનાવ્યા.

તમને જણાવી દઈએ કે ઓસ્ટ્રેલિયાએ વર્લ્ડ કપ 2023ની સેમીફાઈનલમાં જગ્યા બનાવી લીધી છે. ટીમે 8 મેચ રમી છે અને 6માં જીત મેળવી છે. તેના 12 પોઈન્ટ છે. ઓસ્ટ્રેલિયાની સાથે દક્ષિણ આફ્રિકા પણ સેમિફાઇનલમાં પહોંચી ગયું છે. તેના પણ 12 પોઈન્ટ છે. ટીમ ઈન્ડિયા પહેલા ક્વોલિફાઈ થઈ હતી. તેણે 8 મેચ રમી છે અને તે તમામમાં જીત મેળવી છે. તેના 16 પોઈન્ટ છે.