- ભારતે પાકિસ્તાનને સાત વિકેટે હરાવ્યું
- હાર બાદ સહેવાગે પાક.ને લઇ કરી ટ્વિટ
- ભારતની ટીમ સ્કુલના બાળક સાથે રમી
ભારતીય ક્રિકેટ ટીમે શનિવારે વર્લ્ડ કપ-2023ની મેચમાં પાકિસ્તાનને સાત વિકેટે હરાવ્યું હતું. આ મેચ પર આખી દુનિયાની નજર છે. રોહિત શર્માની કપ્તાનીવાળી ટીમ ઈન્ડિયાએ આ હાઈ વોલ્ટેજ મેચમાં એકતરફી રમત રમીને પાકિસ્તાનને હરાવ્યું હતું. આ મેચમાં પાકિસ્તાનના બેટ્સમેનો ખરાબ રીતે નિષ્ફળ રહ્યા હતા. પાકિસ્તાની ટીમ માત્ર 191 રનમાં સમેટાઈ ગઈ હતી. ત્યારબાદ રોહિતની શાનદાર બેટિંગના આધારે ભારતે 31મી ઓવરમાં ત્રણ વિકેટ ગુમાવીને મેચ જીતી લીધી હતી. ટીમ ઈન્ડિયાના આ પ્રદર્શનથી પૂર્વ ભારતીય ઓપનર વીરેન્દ્ર સેહવાગ ઘણો ખુશ દેખાઈ રહ્યો હતો અને તેણે પાકિસ્તાન ટીમ પર નિશાન સાધ્યું હતું.
પાકિસ્તાન સામેની આ જીત સાથે ભારતે ODI વર્લ્ડ કપમાં પોતાનો દબદબો જારી રાખ્યો હતો. ODI વર્લ્ડ કપમાં આ બંને વચ્ચે આ આઠમી મુલાકાત હતી અને ભારતે તમામ આઠ વખત પાકિસ્તાનને હરાવ્યું છે. ભારતમાં આ બંને ટીમોની ODI વર્લ્ડ કપની આ ત્રીજી મેચ હતી.
પાકિસ્તાન બાળકોની ટીમ
પાકિસ્તાનની ટીમ આ મેચમાં સારું ક્રિકેટ રમશે તેવી આશા હતી. પરંતુ ટીમ ઈન્ડિયાની શાનદાર રમત સામે પાકિસ્તાન ટકી શક્યું ન હતું. પાકિસ્તાન ટીમની બોલિંગ ઘણી મજબૂત માનવામાં આવે છે. પરંતુ આ મેચમાં ન તો શાહીન શાહ આફ્રિદીની સ્વિંગ કામ કરી શકી કે ન તો હરિસ રઉફની ગતિ. પાકિસ્તાનનું આ પ્રદર્શન જોઈને સેહવાગે ટ્વીટ કર્યું કે એવું લાગે છે કે જાણે મોટા બાળકો સ્કૂલના બાળકો સાથે રમતા હોય. તેણે લખ્યું કે ભારતે પાકિસ્તાનને બરબાદ કરી દીધું. સેહવાગે આ મેચને લઈને ઘણી ટ્વિટ કરી હતી. અન્ય એક ટ્વિટમાં સેહવાગે લખ્યું કે ભારતની મહેમાનનવાઝી જ અલગ છે. ત્યારબાદ સેહવાગે લખ્યું કે તમામ પાકિસ્તાની ખેલાડીઓને બેટિંગ મળી.
મેચ આવી હતી
પ્રથમ બેટિંગ કરતા પાકિસ્તાનની ટીમ 42.5 ઓવરમાં 191 રનમાં સમેટાઈ ગઈ હતી. તેના માટે કેપ્ટન બાબર આઝમે 50 રન બનાવ્યા હતા. આ માટે બાબરે 58 બોલનો સામનો કર્યો અને સાત ચોગ્ગા ફટકાર્યા. મોહમ્મદ રિઝવાન એક રનથી પોતાની અડધી સદી ચૂકી ગયો હતો. તેણે 69 બોલમાં સાત ચોગ્ગાની મદદથી 49 રન બનાવ્યા હતા. ભારત તરફથી રોહિત શર્માએ 63 બોલમાં 86 રનની ઇનિંગ રમી હતી. તેણે પોતાની ઇનિંગમાં છ ચોગ્ગા અને છ છગ્ગા ફટકાર્યા હતા. શ્રેયસ અય્યરે અણનમ 53 રન બનાવ્યા હતા. તેણે 62 બોલમાં ત્રણ ચોગ્ગા અને બે છગ્ગા ફટકાર્યા હતા.
