• 673 બોલ રમી બ્રાયન લારાનો 18 વર્ષ જૂનો રેકોર્ડ તોડયો

  • લારાએ 2004માં 582 બોલમાં 400 રન બનાવ્યા હતા

  • 282ના ટાર્ગેટ સામે વિન્ડીઝે પાંચ વિકેટે 135 નોંધાવ્યા

વેસ્ટ ઇન્ડિઝ અને ઇંગ્લેન્ડ વચ્ચે બ્રિજટાઉન ખાતે રમાયેલી બીજી ટેસ્ટ મેચ ડ્રો થઈ હતી. ઇંગ્લેન્ડે તેનો બીજો દાવ છ વિકેટે 185 રનના સ્કોરે ડિક્લેર કરીને વિન્ડીઝને 282 રનનો ટાર્ગેટ આપ્યો હતો. વિન્ડીઝે 65 ઓવરમાં પ્રતિ ઓવર ચાર રનની એવરેજથી આ ટાર્ગેટ હાંસલ કરવાનો હતો પરંતુ કેરેબિયન ટીમ પાંચ વિકેટે 135 રન બનાવી શકી હતી. પ્રથમ દાવમાં લગભગ 12 કલાક બેટિંગ કરીને 160 રનની ઇનિંગ રમનાર સુકાની ક્રેગ બ્રાથવેઇટે બીજા દાવમાં પણ 184 બોલ રમીને 56 રને અણનમ રહ્યો હતો.

બ્રાયન લારાનો 18 વર્ષ જૂનો રેકોર્ડ તોડી નાખ્યો

બ્રાથવેઇટ એક જ ટેસ્ટમાં વિન્ડીઝ તરફથી હાઇએસ્ટ બોલ રમનાર પ્લેયર બની ગયો છે. ટેસ્ટ ક્રિકેટના ઇતિહાસમાં સર્વાધિક બોલ રમવાનો રેકોર્ડ ઇંગ્લેન્ડના હૂટનના નામે છે જેમણે ઓસ્ટ્રેલિયા સામેની મેચમાં 847 બોલ રમ્યા હતા. બ્રાથવેઇટે વિન્ડીઝના દિગ્ગજ બેટ્સમેન બ્રાયન લારાનો 18 વર્ષ જૂનો રેકોર્ડ તોડી નાખ્યો હતો. બ્રાથવેઇટે બીજી ટેસ્ટમાં કુલ 673 બોલ રમીને 21 બાઉન્ડ્રી વડે 216 રન બનાવ્યા હતા. તેણે કુલ 16 કલાક બેટિંગ કરીને ટીમને પરાજયમાંથી બચાવી હતી. બ્રાયન લારાએ 2004માં ઇંગ્લેન્ડ સામે 582 બોલનો સામનો કરીને અણનમ 400 રન બનાવ્યા હતા. ટેસ્ટ ક્રિકેટમાં આજે પણ આ હાઇએસ્ટ વ્યક્તિગત સ્કોર રહ્યો છે.

  • Follow us on: