- કેપ્ટન રોહિત શર્માનો ખેલાડીઓને સ્પષ્ટ સંદેશ
- ટીમમાં સ્થાન મેળવવા માટે પ્રેશર હેઠળ રમવું પડશે
- હું કેટલાક ખેલાડીઓને પ્રેશરમાં રમતા જોવા માંગુ છું
ભારતીય ક્રિકેટ ટીમના કેપ્ટન રોહિત શર્માએ ખેલાડીઓને એક મજબૂત સંદેશ આપીને સ્પષ્ટ કર્યું છે કે આગામી ODI વર્લ્ડ કપ માટે ટીમમાં સ્થાન મેળવવા માટે તેમને પ્રેશર હેઠળ વધુ સારું પ્રદર્શન કરવું પડશે. મેગા ઈવેન્ટ પહેલા ટીમ ઈન્ડિયાએ 30 ઓગસ્ટથી શરૂ થઈ રહેલા એશિયા કપમાં ભાગ લેવાની છે, જેના માટે ટીમની જાહેરાત કરવામાં આવનાર છે. આ સમયે ભારતીય ટીમ માટે સૌથી મોટી ચિંતા મિડલ ઓર્ડરના બેટ્સમેનો સારૂ પ્રદર્શન કરવામાં નિષ્ફળતા છે. આવી સ્થિતિમાં ટીમ પાસે એશિયા કપમાં આ મુશ્કેલીમાંથી બહાર આવવાની વધુ સારી તક હશે.
લોકેશ રાહુલ અને શ્રેયસ ઐયરની ઈજા બાદ મિડલ ઓર્ડરમાં સંજુ સેમસન અને સૂર્યકુમાર યાદવને તક આપવામાં આવી હતી, પરંતુ બંને ખેલાડીઓ અપેક્ષા મુજબનું પ્રદર્શન કરી શક્યા નથી. આ અંગે રોહિતે કહ્યું કે ટીમમાં કોઈપણ ખેલાડીની પસંદગી તેના પ્રદર્શનના આધારે કરવામાં આવશે.
4-5 વર્ષમાં ખેલાડીઓ ઈજાગ્રસ્ત થયા છે
રોહિતે કહ્યું કે છેલ્લા 4-5 વર્ષમાં અમારા ખેલાડીઓ જે ઝડપે ઈજાગ્રસ્ત થયા છે તેનાથી ટીમને ઘણો આંચકો લાગ્યો છે. જ્યારે કોઈ ખેલાડી ઈજાગ્રસ્ત થાય છે અને ઉપલબ્ધ નથી, ત્યારે તમે વિવિધ ખેલાડીઓ સાથે ઘણી અલગ વસ્તુઓ અજમાવો છો.
પોતાના નિવેદનમાં રોહિતે વધુમાં કહ્યું કે આ સમયે આપણી સામે ઘણા સવાલો છે, જેના જવાબ અમારે શોધવાના છે અને તે પણ એશિયા કપમાં. હું કેટલાક ખેલાડીઓને પ્રેશરમાં રમતા જોવા માંગુ છું અને વધુ સારી ટીમો સામે તેઓ કેવું પ્રદર્શન કરે છે તે જોવા માંગુ છું. ઘણા બધા વિકલ્પો રાખવાથી તમારા માટે સરળ બને છે અને માત્ર 1 કે 2 જ નહીં. મને લાગે છે કે રાહુલ અને ઐયર સમયસર ફિટ થઈ જશે જે અમારા માટે સૌથી મહત્વની બાબત છે.
રૈનાએ છેલ્લી વખત વર્લ્ડ કપમાં મિડલ ઓર્ડરમાં સદી ફટકારી હતી
ટીમ ઈન્ડિયા માટે છેલ્લા 2 ODI વર્લ્ડ કપમાં ટોપ-3 બેટ્સમેનોનો દબદબો જોવા મળ્યો છે. બંને વર્લ્ડ કપ સહિત ટીમ ઇન્ડિયા તરફથી કુલ 12 સદીની ઇનિંગ્સ જોવા મળી છે. આમાં મિડલ ઓર્ડરમાં માત્ર 1 સદી જોવા મળી છે, જે પૂર્વ ખેલાડી સુરેશ રૈનાના બેટથી આવી છે. જેણે વર્ષ 2015માં ઝિમ્બાબ્વે સામેની મેચમાં સદી ફટકારી હતી. આગામી વર્લ્ડ કપ માટે ટીમ સિલેક્શનની છેલ્લી તારીખ 5 સપ્ટેમ્બર છે, જો કે તે પછી 28 સપ્ટેમ્બર સુધી ટીમમાં ફેરફાર થઈ શકે છે.
