ટુર્નામેન્ટ કે ટીમમાં રમવા માટે ખોટા ડોક્યુમેન્ટ રજૂ કરવાની પ્રથા કંઈ નવી નથી. તાજેતરમાં પુડુચેરી નેટિવ ક્રિકેટ પ્લેયર્સ એસોસિએશને BCCI ના ભ્રષ્ટાચાર વિરોધી એકમને પત્ર લખીને આરોપ લગાવ્યો હતો કે સાત્વિક દેસવાલ નામના ખેલાડીએ પુડુચેરી ક્રિકેટ ટીમ માટે રમવા માટે પોતાના ડોક્યુમેન્ટ ખોટા બનાવ્યા છે.
બનાવટી ડોક્યુમેન્ટ રજૂ કરવાનો આરોપ
ફરિયાદ ધરાવતા ઈમેલમાં લખ્યું હતું કે "સાત્વિક દેસવાલ દ્વારા પુડુચેરી ટીમ માટે ક્વોલિફાય થવા અને રમવા માટે બનાવટી ડોક્યુમેન્ટનો ઉપયોગ કરવાને લઈને BCCIના ભ્રષ્ટાચાર વિરોધી એકમમાં ઔપચારિક ફરિયાદ નોંધાવ્યાને એક મહિનાથી વધુ સમય થઈ ગયો છે. આ બાબત તમારા ધ્યાન પર લાવવા છતાં સામે આવ્યું છે કે ઘણા ખેલાડીઓ પુડુચેરી માટે સમાન પદ્ધતિઓનો ઉપયોગ કરીને મેચોમાં ભાગ લઈ રહ્યા છે. આ એલિજિબિલિટી વેરિફિકેશન પ્રોસેસની પ્રામાણિકતા અને અત્યાર સુધી લેવામાં આવેલી સુધારાત્મક કાર્યવાહીની અસરકારકતા જો કોઈ હોય તો ગંભીર સવાલો ઉભા કરે છે."
તાત્કાલિક કાર્યવાહીની માગ
ઈમેલમાં આગળ કહેવામાં આવ્યું છે કે, "અમે BCCI ACU ને વિનંતી કરીએ છીએ કે તેઓ અમારી ફરિયાદની તાત્કાલિક સમીક્ષા કરે અને આ મામલે સ્થિતિ અને લેવામાં આવેલા પગલાંની અમને જાણ કરે. અમારું માનવું છે કે મળેલી ફરિયાદોને સ્વીકારવાની અને તપાસના પરિણામ અથવા પ્રગતિની જાણ કરવાની જવાબદારી ACU ની છે." અમે આ અઠવાડિયાના અંત સુધીમાં તમારા પ્રતિભાવની રાહ જોઈ રહ્યા છીએ. BCCI ACU તરફથી કોઈ પ્રતિભાવ અથવા સ્પષ્ટતા ન મળે તો, અમને જાહેર માહિતી માટે યોગ્ય મીડિયા ચેનલો દ્વારા આ મુદ્દાને આગળ વધારવાની ફરજ પડશે.
કોણ છે સાત્વિક દેસવાલ?
સાત્વિક દેસવાલ 18 વર્ષનો લેફ્ટ સ્પિનર છે અને ફરિયાદ મુજબ, "ઓછામાં ઓછા એક વર્ષ માટે પુડુચેરીનો વાસ્તવિક રહેવાસી" હોવાના પાત્રતા માપદંડોને પૂર્ણ કરતો નથી. ઈમેલમાં એવો પણ આરોપ મૂકવામાં આવ્યો છે કે આ ક્રિકેટર "10 ઓગસ્ટ, 2025 સુધી હરિયાણા ક્રિકેટ એસોસિએશન લીગમાં રમ્યો હતો."
'આક્ષેપો ખોટા છે': ક્રિકેટ એસોસિએશન ઓફ પુડુચેરીના ભૂતપૂર્વ પ્રમુખ
ક્રિકેટ એસોસિએશન ઓફ પુડુચેરીના ભૂતપૂર્વ પ્રમુખ પી. દામોદરને આ આરોપોને ફગાવી દીધા. મીડિયા સાથે વાત કરતાં કહ્યું કે "આ સંપૂર્ણપણે ખોટી સ્ટોરી છે. અમે તેમના (પુડુચેરી નેટિવ ક્રિકેટ પ્લેયર્સ એસોસિએશન) પર 50 કરોડ રૂપિયાનો દાવો કરીશું. અમારા વકીલો તેમની સામે કેસ તૈયાર કરી રહ્યા છે."
આ પણ વાંચો: Shubman Gillને લઈને છલકાયું દિગ્ગજ ખેલાડીનું દુ:ખ, કહ્યું- 'તેને ટીમમાં સ્થાન...'
