ઈશાન કિશન માટે સૈયદ મુશ્તાક અલી ટ્રોફી એક સ્વપ્નથી ઓછી નહોતી. તેણે 10 મેચમાં 517 રન બનાવ્યા અને તેની સરેરાશ 50 થી વધુ હતી. આટલા મજબૂત પ્રદર્શનને પગલે, ફેન્સ માને છે કે તે ફેબ્રુઆરી 2026 માં શરૂ થનારા T20 વર્લ્ડ કપ માટે ટીમ ઈન્ડિયામાં સ્થાન મેળવશે. જોકે, ઈશાન કિશનને વર્લ્ડ કપ માટે પસંદગી થવા કે અવગણવામાં કોઈ વાંધો નથી. તે ફક્ત તેના પ્રદર્શન પર ધ્યાન કેન્દ્રિત કરે છે.
SMAT જીત્યા બાદ ઈશાનનું ચોંકાવનારું નિવેદન
નવેમ્બર 2023 થી ટીમ ઈન્ડિયા માટે ઈશાન કિશનની પસંદગી કરવામાં આવી નથી. શિસ્તભંગના મુદ્દાઓને કારણે સિલેક્ટરોએ અને મુખ્ય કોચ દ્વારા તેને ટીમમાંથી બહાર કરવામાં આવ્યો હતો. ઝારખંડને SMAT ટાઇટલ અપાવ્યા પછી ટીમ ઈન્ડિયા માટે પસંદગી ન થવા અંગે બોલતા, કિશને કહ્યું, જ્યારે તમને ટીમ ઈન્ડિયા માટે પસંદગી ન થાય ત્યારે ખૂબ જ ખરાબ લાગે છે, કારણ કે હું સારું કરી રહ્યો હતો. મેં મારી જાતને કહ્યું કે જો આવા પ્રદર્શન છતાં મને સિલેક્શન ન મળે, તો મારે વધુ સારું કરવું પડશે. મારે કદાચ મારી ટીમને જીતવામાં મદદ કરવી પડશે. કદાચ આપણે સાથે મળીને સારું કરવું પડશે.
T20 વર્લ્ડ કપ સુધી ખૂબ જ ઓછો સમય બાકી હોવાથી, કિશનનું ટીમ ઈન્ડિયામાં વાપસી અશક્ય લાગે છે, કારણ કે તેને સમાવવા માટે કોમ્બિનેશન બદલવા પડશે. આ અંગે બોલતા, ઈશાને કહ્યું, મને ખબર છે કે ક્યારેક તમે તમારી તકો વિશે વિચારો છો. જ્યારે તમને તમારું નામ દેખાતું નથી, ત્યારે ખરાબ લાગે છે. હું અત્યારે એવું વિચારી રહ્યો નથી. હું કંઈ અપેક્ષા રાખતો નથી. મારું કામ ફક્ત પ્રદર્શન કરવાનું છે.
ઈશાન કિશનનું પ્રદર્શન
ઈશાન કિશન બે વર્ષથી વધુ સમયથી ટીમ ઈન્ડિયાની બહાર હોવા છતાં, તેનું પ્રદર્શન સારું રહ્યું છે. તેણે 18 ડિસેમ્બર, 2025 ના રોજ ઝારખંડને સૈયદ મુશ્તાક અલી ટ્રોફીનો ખિતાબ અપાવ્યો હતો. તેણે ફાઇનલમાં કેપ્ટનશીપની ઇનિંગ પણ રમી હતી. ટુર્નામેન્ટમાં રમાયેલી 10 મેચમાં તેણે 57.44 ની સરેરાશથી 517 રન બનાવ્યા હતા. તેણે 197.33 ના સ્ટ્રાઈક રેટથી બેટિંગ કરી હતી અને બે સદી અને બે અડધી સદી ફટકારવામાં સફળ રહ્યો હતો. તેણે SMAT માં 33 છગ્ગા ફટકાર્યા હતા. આટલા મજબૂત પ્રદર્શન છતાં, જો ઈશાનને T20 વર્લ્ડ કપમાંથી અવગણવામાં આવે તો ફેન્સ ખૂબ જ નિરાશ થશે.
આ પણ વાંચો- એક જ ફિલ્મથી રાતોરાત સ્ટાર બની, પછી ઐશ્વર્યા રાયના કારણે કરિયર બરબાદ થયું!
