Harmanpreet Kaur પાસે ફાઈનલમાં ઈતિહાસ રચવાની તક, આ મામલે તોડશે સોફી ડિવાઈનનો મોટો રેકોર્ડ

મહિલા ODI વર્લ્ડકપ 2025ની ફાઈનલ 2 નવેમ્બરના રોજ નવી મુંબઈના ડીવાય પાટિલ સ્ટેડિયમમાં ભારત અને સાઉથ આફ્રિકા વચ્ચે રમાશે. આ મેચમાં ટીમ ઈન્ડિયાની કેપ્ટન હરમનપ્રીત કૌર પાસે એક મોટો રેકોર્ડ બનાવવાની તક રહેશે.

તે મહિલા ODI વર્લ્ડકપમાં સૌથી વધુ છગ્ગા ફટકારવાનો રેકોર્ડ બનાવી શકે છે. આ સિદ્ધિ મેળવવા માટે હરમનપ્રીત કૌરે ફાઈનલમાં 2 છગ્ગા મારવા પડશે. આ પહેલા હરમનપ્રીતે સેમીફાઈનલમાં 89 રનની શાનદાર ઈનિંગ રમી હતી.

સોફી ડિવાઈનનો રેકોર્ડ તોડશે હરમનપ્રીત કૌર

મહિલા વનડે વર્લ્ડકપના ઈતિહાસમાં સૌથી વધુ છગ્ગા ફટકારવાનો રેકોર્ડ ન્યુઝીલેન્ડની સોફી ડિવાઈનના નામે છે. મહિલા વનડે વર્લ્ડકપમાં અત્યાર સુધી 32 મેચમાં સોફી ડિવાઈને 23 છગ્ગા ફટકાર્યા છે. ભારતની હરમનપ્રીત કૌર અને વેસ્ટ ઈન્ડિઝની ડિઆન્ડ્રા ડોટિન આ લિસ્ટમાં બીજા નંબરે છે. આ ટુર્નામેન્ટના ઈતિહાસમાં બંને બેટ્સમેનોએ 22-22 છગ્ગા ફટકાર્યા છે. 36 વર્ષની હરમનપ્રીતને ડિવાઈનને પાછળ છોડી દેવા માટે ફક્ત 2 છગ્ગાની જરૂર છે. ડિવાઈને ઈન્ટરનેશનલ ક્રિકેટમાંથી નિવૃત્તિ લઈ લીધી છે. સ્મૃતિ મંધાના ત્રીજા નંબરે છે, તેણે અત્યાર સુધી 24 મેચમાં 17 છગ્ગા ફટકાર્યા છે. સાઉથ આફ્રિકાની ક્લો ટ્રેયોન 13 છગ્ગા સાથે ચોથા નંબરે છે.

સેમીફાઈનલ મેચમાં હરમનપ્રીત કૌરે કેપ્ટનશીપની ઈનિંગ રમી

ઓસ્ટ્રેલિયા સામેની સેમીફાઈનલમાં હરમનપ્રીતે શાનદાર ઈનિંગ રમી હતી. તેણે 88 બોલમાં 10 ચોગ્ગા અને 2 છગ્ગાની મદદથી 89 રન બનાવ્યા હતા. ભારતે 339 રનના ટાર્ગટનો પીછો કર્યો અને 5 વિકેટે ઐતિહાસિક જીત મેળવી. જેમિમા રોડ્રિગ્સે 134 બોલમાં અણનમ 127 રનની મેચવિનિંગ ઈનિંગ રમી અને પ્લેયર ઓફ ધ મેચનો એવોર્ડ મેળવ્યો. ભારતીય ટીમ હવે આ ગતિ જાળવી રાખવા અને અંતિમ મેચ જીતવા માટે પ્રયત્ન કરશે.

હરમનપ્રીત કૌરે અત્યાર સુધી ODI વર્લ્ડકપમાં કેવું પ્રદર્શન કર્યું છે?

મહિલા ODI વર્લ્ડકપમાં હરમનપ્રીત કૌરનું પ્રદર્શન અત્યાર સુધીમાં 34 મેચોની 29 ઈનિંગમાં 46.50 ની એવરેજથી 1116 રન બનાવી ચૂક્યું છે. આ ટુર્નામેન્ટમાં તેણે 3 સદી અને 6 અડધી સદી ફટકારી છે. તેનો હાઈએસ્ટ સ્કોર અણનમ 171 રન છે. હવે તે અંતિમ મેચમાં મોટી ઈનિંગ રમવાનું અને ટીમ ઈન્ડિયાને જીત અપાવવાનું ટાર્ગેટ રાખશે. આ વર્લ્ડકપ ફાઈનલમાં ભારતીય ટીમ કેવું પ્રદર્શન કરે છે તે જોવું રસપ્રદ રહેશે.