IND Vs SA: ટેસ્ટ સિરીઝ પહેલા ભારતીય કોચે ટીમ ઈન્ડિયાને આપી ચેતવણી, આ વાતથી એલર્ટ રહેવા કહ્યું

ભારત અને સાઉથ આફ્રિકા વચ્ચે 2 મેચની ટેસ્ટ સિરીઝ 14 નવેમ્બરથી શરૂ થવાની છે. આ મેચ કોલકાતાના ઈડન ગાર્ડન્સમાં રમાશે. બંને ટીમો કોલકાતા પહોંચી ગઈ છે અને પહેલી મેચ માટે તૈયારીઓ શરૂ કરી દીધી છે.

કોલકાતા ટેસ્ટ પહેલા ટીમ ઈન્ડિયાના સહાયક કોચ રાયન ટેન ડોઈશેટે ટીમ ઈન્ડિયાને ચેતવણી આપી છે. તેમને આ સિરીઝમાં સાઉથ આફ્રિકાના આ હથિયારોથી સાવચેત રહેવાની જરૂર છે તેની રૂપરેખા આપી છે.

ભારતીય કોચે ટીમ ઈન્ડિયાને ચેતવણી આપી

રાયન ટેન ડોઈશેટે સાઉથ આફ્રિકા ટેસ્ટ સિરીઝ પહેલા કહ્યું હતું કે "સામાન્ય રીતે તમે પહેલા ઝડપી બોલિંગ આક્રમણની ચિંતા કરો છો, અને મને ખાતરી છે કે તેઓ બે ઝડપી બોલરો અને ત્રણ કે ચાર સ્પિનરોને મેદાનમાં ઉતારશે. પરંતુ જ્યારે તમે ઉપખંડમાં રમી રહ્યા હોવ છો, ત્યારે તે એક પડકાર છે.

એક ટીમ તરીકે આપણે તેમાં સુધારો કરવાની જરૂર છે. અમે શરૂઆતમાં જ તેનો સામનો કર્યો છે. અમે કેટલીક વાર નિષ્ફળ ગયા છીએ, તેથી તે એક મોટો પડકાર છે." ભારતીય કોચે સાઉથ આફ્રિકાના સ્પિન વિભાગ સામે સાવચેત રહેવાની સલાહ આપી છે.

ન્યુઝીલેન્ડ સામેની હાર યાદ આવી

લગભગ એક વર્ષ પહેલા, ભારતીય ટીમે ઘરઆંગણે ન્યુઝીલેન્ડ સામે 3-0 થી સિરીઝ હારી હતી. કિવી ટીમના સ્પિન બોલિંગ વિભાગે ભારતીય બેટ્સમેનોને મુશ્કેલીમાં મુક્યા હતા. ભારતીય કોચે કહ્યું કે "આશા છે કે, અમે ન્યુઝીલેન્ડ સિરીઝમાંથી કંઈક શીખ્યા છીએ. અમે સ્પિન કેવી રીતે રમવું તે અંગે કેટલીક યોજનાઓ વિકસાવી છે. આ બે મેચોમાં આ ખૂબ જ મહત્વપૂર્ણ રહેશે, ખાસ કરીને ચાર અઠવાડિયા પહેલા પાકિસ્તાનમાં તેમના સારા પ્રદર્શનને ધ્યાનમાં લેતા."

લાંબા સમય પછી આ પહેલી વાર બનશે જ્યારે ભારતીય ટીમ રોહિત શર્મા અને વિરાટ કોહલી વિના સાઉથ આફ્રિકા સામે રમશે. રોહિત અને વિરાટ બંનેએ આ વર્ષે IPL 2025 દરમિયાન નિવૃત્તિની જાહેરાત કરી હતી.