Rajasthan Royals મેનેજર ડગઆઉટમાં ફોનનો ઉપયોગ કરતા કેમેરામાં કેદ, BCCI લેશે એક્શન!

IPL 2026માં રાજસ્થાન રોયલ્સની સતત ચોથી જીત વચ્ચે એક મોટો વિવાદ ઉભો થયો છે. ટીમના લાંબા સમયથી મેનેજર રોમી ભિંડર ડગઆઉટમાં મોબાઈલ ફોનનો ઉપયોગ કરતા કેમેરામાં કેદ થયા હતા, જેના કારણે ભ્રષ્ટાચાર વિરોધી પ્રોટોકોલના ભંગની અટકળો શરૂ થઈ હતી.

આ ઘટના ત્યારે બની જ્યારે રાજસ્થાન રોયલ્સે 10 એપ્રિલના રોજ ગુવાહાટીમાં રોયલ ચેલેન્જર્સ બેંગલુરુને 6 વિકેટથી હરાવ્યું હતું. મેચ દરમિયાન ટીવી કેમેરામાં રોમી ભિંડર ડગઆઉટમાં મોબાઈલ ફોનનો ઉપયોગ કરતો જોવા મળ્યો હતો, જ્યાં યુવા ખેલાડી વૈભવ સૂર્યવંશી પણ તેની બાજુમાં બેઠો હતો.

BCCIએ નિયમોનું ઉલ્લંઘન સ્વીકાર્યું

બીસીસીઆઈના એક અધિકારીએ પીટીઆઈને પુષ્ટિ આપી કે આ પ્લેયર એન્ડ મેચ ઓફિસિયલ્સ એરિયા (પીએમઓએ) પ્રોટોકોલનું ઉલ્લંઘન છે. નિયમો મુજબ મેચ દરમિયાન ડગઆઉટમાં મોબાઈલ ફોનનો ઉપયોગ સખત પ્રતિબંધિત છે. IPLના સત્તાવાર નિયમોમાં પણ સ્પષ્ટપણે જણાવાયું છે કે ટીમ મેનેજર ડ્રેસિંગ રૂમમાં ફોનનો ઉપયોગ કરી શકે છે, પરંતુ ડગઆઉટમાં નહીં.

સજા શું હોઈ શકે?

રોમી ભીંડરને આ નિયમોની સંપૂર્ણ જાણકારી હોવાની અપેક્ષા છે. તેથી આ ઘટનાને ગંભીરતાથી લેવામાં આવી રહી છે. સૂત્રો કહે છે કે આ ભૂલ અજાણતાં થઈ હોઈ શકે છે, છતાં તે નિયમોનું ઉલ્લંઘન છે. હવે તે મેચ રેફરી અને ભ્રષ્ટાચાર વિરોધી એકમ (ACU)ના રિપોર્ટ પર નિર્ભર રહેશે કે તેને ચેતવણી આપવામાં આવશે કે મેચ પ્રતિબંધ જેવા વધુ કડક પગલાંનો સામનો કરવો પડશે. આ બાબતએ પણ ધ્યાન ખેંચ્યું છે કારણ કે મેચ પછી વૈભવ સૂર્યવંશીએ રોમી ભીંડરને તેના લોકલ ગાર્ડિયન તરીકે ઉલ્લેખ કર્યો હતો. તેથી હવે સમગ્ર ઘટના પર નજીકથી નજર રાખવામાં આવશે.

IPL જેવી મોટી ટુર્નામેન્ટમાં ભ્રષ્ટાચાર વિરોધી નિયમોનો કડક અમલ કરવામાં આવે છે, અને આ ઘટનાએ ફરી એકવાર સ્પષ્ટ કરી દીધું છે કે નાની બેદરકારી પણ મોટા વિવાદમાં ફેરવાઈ શકે છે. તમને જણાવી દઈએ કે IPL 2026માં અત્યાર સુધીમાં 18 મેચ રમાઈ છે, જેમાં રાજસ્થાન રોયલ્સ 4 જીત સાથે પોઈન્ટ ટેબલમાં આગળ છે. રાજસ્થાનના 8 પોઈન્ટ છે. ટીમની આગામી મેચ 13 એપ્રિલે હૈદરાબાદના રાજીવ ગાંધી સ્ટેડિયમમાં સનરાઈઝર્સ હૈદરાબાદ સામે થશે.

આ પણ વાંચો: 'મારી પાસે જીવવા માટે 3-6 મહિના બાકી...!' યુવરાજ સિંહે કેન્સરને લઈને કર્યો મોટો ખુલાસો