કેપ્ટન શુભમન ગિલની ઈજાએ ટીમ ઈન્ડિયાનું ટેન્શન વધારી દીધું છે. શુભમન સાઉથ આફ્રિકા સામેની બીજી ટેસ્ટમાંથી લગભગ બહાર થઈ ગયો છે. પરંતુ મોટો પ્રશ્ન એ છે કે ગિલની ઈજા કેટલી ગંભીર છે? પહેલી ટેસ્ટમાં બેટિંગ કરતી વખતે ગિલને અચાનક ગરદનમાં દુ:ખાવાનો અનુભવ થયો, ત્યારબાદ તે મેદાન છોડીને ડ્રેસિંગ રૂમમાં પાછો ફર્યો હતો.
ત્રણથી છ મહિના માટે ક્રિકેટથી દૂર રહેવાની શક્યતા
મેચ દરમ્યાન ગિલની ગરદનમાં એટલો ભારે દુખાવો હતો કે તેને હલાવવું પણ મુશ્કેલ બની ગયું હતું. સ્થિતિ ગંભીર બનતાં તેમને હોસ્પિટલમાં દાખલ કરાયા. તેમની ઈજાની ચોક્કસ વિગતો હજી સુધી સ્પષ્ટ નથી, પરંતુ જો તપાસમાં ગંભીર નુકસાન બહાર આવશે, તો ગિલ ત્રણથી છ મહિના સુધી ક્રિકેટમાં વાપસી નહીં કરી શકે તેવી શક્યતા દેખાઈ રહી છે.
ગિલને સ્પાઇનલ લિગામેન્ટ ઈજા થઈ છે
સાઉથ આફ્રિકા સામેની પ્રથમ ટેસ્ટના બીજા દિવસે, બેટિંગ દરમિયાન તેમને ગરદનમાં તીવ્ર ખેંચાણ અનુભવાયું. ત્યારબાદ તેઓ બાકીની ઇનિંગ્સ રમ્યા નહોતાં. હોસ્પિટલમાં તેમની MRI કરવામાં આવી હતી અને ઈજાને ધ્યાનમાં રાખીને તેમને નિરંતર અવલોકનમાં રાખવામાં આવ્યા હતા. પ્રખ્યાત સ્પોર્ટ્સ ડૉક્ટર દિનશા પારડીવાલાએ તેમના કેસનું નિરીક્ષણ કર્યું. મળેલી રિપોર્ટ મુજબ, ગિલને સ્પાઇનલ લિગામેન્ટ ઈજા થઈ છે.
ઇન્ટરસ્પાઇનસ લિગામેન્ટ ઇજા શું હોય છે?
સર્વાઇકલ સ્પાઇનમાં દરેક હાડકી પાછળ "સ્પાઇનસ પ્રોસેસ" નામની રચના હોય છે. આ હાડકીઓને જોડતો જે લિગામેન્ટ હોય છે, તેને ઇન્ટરસ્પાઇનસ લિગામેન્ટ કહેવામાં આવે છે. જો આ લિગામેન્ટ ખેંચાઈ જાય અથવા તૂટી જાય, તો તેને ઇજા ગણવામાં આવે છે. આ પ્રકારનું નુકસાન સામાન્ય રીતે ત્યારે થાય છે જ્યારે ગરદન ઝડપથી આગળ કે પાછળ વાળી જાય, જેને કારણે લિગામેન્ટ પર અચાનક દબાણ પડે છે.
ગિલ કેટલો સમય બહાર રહી શકે?
લિગામેન્ટ ઈજાનો સમયગાળો તેના ગ્રેડ પર આધારિત છે. ગ્રેડ 1 ઇજામાં સામાન્ય રીતે થોડો જડપણ અનુભવાય અને ખેલાડી બે થી ચાર અઠવાડિયામાં સ્વસ્થ થઈ શકે. પરંતુ શુભમનની હાલત તે કરતાં ગંભીર છે, કેમ કે 15 નવેમ્બરના રોજ ઈજા થયાને પછી પણ તે સંપૂર્ણપણે ફિટ નથી અને બીજી ટેસ્ટ માટે ઉપલબ્ધ નથી. તેથી તેમની વાપસીમાં વધુ સમય લાગી શકે છે.
