હાલમાં ભારતીય ટીમના મોટાભાગના ખેલાડીઓ ઈન્ડિયન પ્રીમિયર લીગની 19મી સીઝનમાં રમવામાં બિઝી છે, જેમાં એક નામ ટીમ ઈન્ડિયાના T20 કેપ્ટન સૂર્યકુમાર યાદવનું પણ છે, જેનું બેટિંગ પ્રદર્શન અત્યાર સુધી કોઈ ખાસ જોવા મળ્યું નથી.
ભારતીય ટીમે સૂર્યકુમાર યાદવની કેપ્ટનશીપમાં T20 વર્લ્ડકપ 2026માં જીત્યો હતો, પરંતુ તેના બેટિંગ ફોર્મ પર સતત સવાલો ઉભા થઈ રહ્યા હતા. હવે ભવિષ્યને ધ્યાનમાં રાખીને સૂર્યાને ટીમ ઈન્ડિયામાંથી બહાર કરવાનો પણ ખતરો છે. ઓલિમ્પિક ગેમ્સ ઉપરાંત ટીમ ઈન્ડિયાએ 2028માં T20 વર્લ્ડકપમાં પણ રમવાનો છે, જેમાં સૂર્યકુમાર યાદવ માટે પોતાનું સ્થાન બનાવવું ખૂબ મુશ્કેલ લાગે છે.
સૂર્યકુમાર યાદવ માટે ઈંગ્લેન્ડ અને આયર્લેન્ડનો પ્રવાસ ખૂબ જ મહત્વપૂર્ણ રહેશે
ભારતીય ટીમ આ વર્ષે જૂન-જુલાઈમાં ઈંગ્લેન્ડ અને આયર્લેન્ડ સામે તેની આગામી T20 સિરીઝ રમશે, જે સૂર્યકુમાર યાદવ માટે બેટ્સમેન તરીકે મહત્વપૂર્ણ રહેશે. 2025નું વર્ષ સૂર્યા માટે દુઃસ્વપ્ન હતું, તેને માત્ર 120 ના સ્ટ્રાઈક રેટથી રન બનાવ્યા અને એક પણ ફિફ્ટી ફટકારવામાં નિષ્ફળ રહ્યો. 2026માં સૂર્યાના બેટમાંથી 4 હાફ સેન્ચુરી જોવા મળી હતી, પરંતુ તે T20 વર્લ્ડકપ 2026માં યુએસએ સામે માત્ર એક મોટી ઈનિંગ ફટકારી શક્યો હતો.
BCCIના એક સૂત્રએ નામ ન આપવાની શરતે મીડિયા સાથે વાત કરતા જણાવ્યું હતું કે સૂર્યા હાલમાં ટીમનું નેતૃત્વ કરી રહ્યો છે, પરંતુ તેને બેટ્સમેન તરીકે તેના પ્રદર્શનમાં સાતત્ય સુનિશ્ચિત કરવાની પણ જરૂર પડશે. તે ઈંગ્લેન્ડ-આયર્લેન્ડ પ્રવાસમાં કેપ્ટનશીપ કરશે, પરંતુ તે પછી 2028 સુધી ચર્ચાઓ ફક્ત પ્રદર્શન પર આધારિત રહેશે.
વૈભવ સૂર્યવંશી ટીમ ઈન્ડિયામાં કરી શકે છે એન્ટ્રી
IPL 2026માં પોતાની પ્રતિભાથી બધાને પ્રભાવિત કરનાર 15 વર્ષનો વૈભવ સૂર્યવંશીના ટીમ ઈન્ડિયામાં સમાવેશ અંગે, BCCIના એક સૂત્રએ એક નિવેદનમાં જણાવ્યું હતું કે પસંદગી સમિતિને વિશ્વાસ છે કે વૈભવ તૈયાર છે, પરંતુ પછી તમે સંજુ સેમસન, અભિષેક શર્મા અને ઈશાન કિશન વિશે વાત કરી રહ્યા છો. ત્રણેયે T20 વર્લ્ડકપમાં સારું પ્રદર્શન કર્યું છે. જો તમે ચોથા ઓપનરનો સમાવેશ કરો છો, તો યશસ્વી જયસ્વાલ પણ દોડમાં છે.
વૈભવની એન્ટ્રી ઈંગ્લેન્ડ-આયર્લેન્ડ પ્રવાસ અથવા ઝિમ્બાબ્વે હોઈ શકે છે. પરંતુ તેના માટે બેસ્ટ પ્લેટફોર્મ એશિયન ગેમ્સ અથવા વેસ્ટ ઈન્ડીઝ સામેની ઘરઆંગણેની સિરીઝ હશે, કારણ કે બંને ઈવેન્ટ્સ એક સાથે આવશે, તેથી આપણે 2 T20 ટીમો પસંદ કરવી પડશે. વૈભવને આ 1માંથી 1માં સામેલ કરી શકાય છે.
આ પણ વાંચો: 'મારી પાસે જીવવા માટે 3-6 મહિના બાકી...!' યુવરાજ સિંહે કેન્સરને લઈને કર્યો મોટો ખુલાસો
