પાકિસ્તાને T20 વર્લ્ડકપ 2026માં ભારત સામેની મેચનો બહિષ્કાર કરવાના પોતાના નિર્ણય પર યુ-ટર્ન લીધો છે. આ મેચ હવે 15 ફેબ્રુઆરીએ કોલંબોમાં નિર્ધારિત સમય મુજબ રમાશે.મંગળવારે યુએસએ સામેની જીત બાદ, સાહિબજાદા ફરહાને કહ્યું કે તે ભારત સામેની મેચમાં પણ એ જ આક્રમક અને સકારાત્મક માનસિકતા સાથે રમશે. આનો એક વીડિયો પણ વાયરલ થઈ રહ્યો છે.
ફરહાનનું નિવેદન થયું વાયરલ
પાકિસ્તાને યુએસએ સામે પ્રથમ બેટિંગ કરીને 190 રન બનાવ્યા. ઓપનર સાહિબજાદા ફરહાને સૌથી વધુ 73 રન બનાવ્યા. 41 બોલમાં આવેલી આ શાનદાર ઇનિંગમાં, તેણે 5 છગ્ગા અને 6 ચોગ્ગા ફટકાર્યા. લક્ષ્યનો પીછો કરતા, યુએસએ 20 ઓવરમાં ફક્ત 158 રન જ બનાવી શક્યું, અને પાકિસ્તાને 32 રનથી મેચ જીતી લીધી.સતત બે મેચ જીતીને,પાકિસ્તાન સુપર 8 માટે મજબૂત દાવેદાર બની ગયું છે.ટીમનો આગામી મુકાબલો 15 ફેબ્રુઆરીએ ભારત સામે છે.આ અંગે ફરહાનનું નિવેદન વાયરલ થઈ રહ્યું છે.
સાહિબજાદા ફરહાને શું કહ્યું?
પ્લેયર ઓફ ધ મેચ એવોર્ડ મેળવ્યા પછી, પ્રેઝન્ટર વસીમ અકરમે તેમને ભારત સામેની આગામી મોટી મેચ વિશે પૂછ્યું. સાહિબજાદાએ જવાબ આપ્યો,અમે ટીમ ઈન્ડિયા સામેની અમારી પાછલી મેચોમાં જે માનસિકતા સાથે રમ્યા હતા તે જ માનસિકતા સાથે આગળ વધીશું, જેમ અમે એશિયા કપમાં કર્યું હતું. અમે સકારાત્મક રહેવાનો અને આક્રમક ક્રિકેટ રમવાનો પ્રયાસ કરીશું.એ નોંધવું જોઈએ કે એશિયા કપમાં ભારત અને પાકિસ્તાન વચ્ચે ત્રણ મેચ રમાઈ હતી, અને દરેક વખતે ભારતે પાકિસ્તાનને હરાવ્યું હતું.
પાકિસ્તાને યુએસએ સામે બીજી મેચ જીતી
સાહિબજાદાએ વધુમાં કહ્યું,નેટ પ્રેક્ટિસ દરમિયાન,અમે જોયું કે બોલ બેટ પર સારી રીતે આવી રહ્યો હતો. મેં બેટિંગ કોચને પહેલેથી જ કહ્યું હતું કે મને લાગ્યું હતું કે આજે હું પ્લેયર ઓફ ધ મેચ એવોર્ડ સાથે મેચ સમાપ્ત કરીશ. મેં ચાલુ ટુર્નામેન્ટમાં ઓછામાં ઓછા બે કે ત્રણ પ્લેયર ઓફ ધ મેચ એવોર્ડ જીતવાનું લક્ષ્ય રાખ્યું છે.પાકિસ્તાનના કેપ્ટન સલમાન અલી આગાએ યુએસએ સામેની જીત બાદ કહ્યું કે તેમની ટીમ પીછો કરવાનું પસંદ કરે છે, પરંતુ પહેલા બેટિંગ કરતી વખતે મોટો સ્કોર કરવામાં પણ તેટલો જ આરામદાયક છે. તેમણે કહ્યું કે અમારા નીચલા ક્રમમાં પણ એવા બેટ્સમેન છે, જે વિકેટો વહેલા પડવા છતાં ઇનિંગ્સ સંભાળી શકે છે.
