6,6,6,6,6,6,4,4,4,4,4,4... એશિયા કપ પહેલા રિંકુ સિંહે મચાવી ધૂમ, ટીમને અપાવી રોમાંચક જીત

રિંકુ સિંહ એશિયા કપ 2025 માટે ભારતીય ટીમનો ભાગ છે. આ ટુર્નામેન્ટ પહેલા તે હાલમાં યુપી T20 લીગમાં રમી રહ્યો છે. ત્યાં રિંકુ મેરઠ મેવેરિક્સનું નેતૃત્વ કરી રહ્યો છે.

આ ટુર્નામેન્ટમાં રિંકુ સિંહનું બેટ ધૂમ મચાવી રહ્યું છે. તેને ટુર્નામેન્ટની 27મી મેચમાં કાશી રુદ્રાસની ટીમ સામે તોફાની બેટિંગ કરી અને ટીમને 7 વિકેટથી જીત અપાવવામાં મહત્વપૂર્ણ ભૂમિકા ભજવી. એશિયા કપ પહેલા રિંકુનું ફોર્મમાં વાપસી ટીમ ઈન્ડિયા માટે મોટી રાહતના સમાચાર છે.

મેરઠના ટોપ ઓર્ડર બેટ્સમેન ગયા નિષ્ફળ

આ મેચમાં મેરઠની ટીમને 136 રનનો ટાર્ગેટ મળ્યો હતો. ટાર્ગેટનો પીછો કરી રહેલી ટીમની શરૂઆત બિલકુલ સારી ન હતી. પહેલી જ ઓવરમાં ટીમને સ્વસ્તિક ચિકારાના રૂપમાં પહેલો ઝટકો પડ્યો, જે 4 બોલ રમ્યા પછી પણ ખાતું ખોલી શક્યો નહીં. બીજી જ ઓવરમાં ટીમને બીજો ઝટકો પડ્યો, જ્યારે આકાશ દુબે 4 રન બનાવીને આઉટ થઈ ગયો. ત્રીજા નંબર પર બેટિંગ કરવા આવેલા ઋતુરાજ શર્મા પાસેથી બધાને ઘણી અપેક્ષાઓ હતી, પરંતુ તે પણ કંઈ ખાસ કરી શક્યો નહીં અને 19 બોલમાં 15 રન બનાવીને આઉટ થઈ ગયો.

માધવ કૌશિક અને રિંકુ સિંહે રમી શાનદાર ઈનિંગ

અહીંથી માધવ કૌશિકે કેપ્ટન રિંકુ સિંહ સાથે મળીને ઈનિંગ સંભાળવાનો પ્રયાસ કર્યો. બંને વચ્ચે 112 રનની અણનમ પાર્ટનરશીપ થઈ અને મેરઠની ટીમ સરળતાથી મેચ જીતી લેવામાં સફળ રહી. માધવ 34 રન બનાવીને અણનમ પરત ફર્યો. રિંકુ સિંહે અણનમ 78 રન બનાવ્યા. રિંકુએ 48 બોલમાં 78* રન બનાવ્યા. તેને ઈનિંગમાં 6 ચોગ્ગા અને 6 છગ્ગા ફટકાર્યા. આ દરમિયાન તેનો સ્ટ્રાઈક રેટ 162 હતો.

કાશી રુદ્રસના બેટ્સમેનોએ નિરાશ કર્યા

આ પહેલા કાશી રુદ્રસની ટીમે ટોસ જીતીને પહેલા બેટિંગ કરવાનો નિર્ણય લીધો હતો, જે યોગ્ય સાબિત થયો ન હતો. 20 ઓવર સુધી બેટિંગ કર્યા પછી ટીમ 8 વિકેટના નુકસાન પર ફક્ત 135 રન બનાવી શકી. ટીમ માટે કરણ શર્માએ 50 બોલમાં સૌથી વધુ 61 રન બનાવ્યા. મેરઠ માટે બોલિંગમાં કાર્તિક ત્યાગીએ સૌથી વધુ 4 વિકેટ લીધી.