Team Indiaને વર્લ્ડકપ પહેલા લાગ્યો મોટો ઝટકો, સ્ટાર ખેલાડી ટુર્નામેન્ટમાંથી બહાર

ભારતીય મહિલા ક્રિકેટ ટીમને ODI વર્લ્ડકપ શરૂ થાય તે પહેલા જ મોટો ઝટકો લાગ્યો છે. ટીમની વિકેટકીપર-બેટ્સમેન યાસ્તિકા ભાટિયા ઈજાને કારણે આખી ટુર્નામેન્ટમાંથી બહાર થઈ ગઈ છે.

યાસ્તિકા ભાટિયાના સ્થાને ઉમા છેત્રીને ટીમમાં સામેલ કરવામાં આવી છે. વર્લ્ડકપ 30 સપ્ટેમ્બરથી શરૂ થવાનો છે. હરમનપ્રીત કૌરની કેપ્ટનશીપ હેઠળની ટીમ ઈન્ડિયા પહેલી મેચમાં શ્રીલંકાનો સામનો કરતી જોવા મળશે. ભારત અને પાકિસ્તાન વચ્ચેની મોટી મેચ 5 ઓક્ટોબરે રમાશે. આ વખતે ભારત મહિલા વર્લ્ડકપનું આયોજન કરી રહ્યું છે.

યાસ્તિકા ભાટિયા વર્લ્ડકપમાંથી થઈ બહાર

વર્લ્ડકપ શરૂ થાય તે પહેલા ભારતીય મહિલા ક્રિકેટ ટીમ માટે ખરાબ સમાચાર આવ્યા છે. વિકેટકીપર-બેટ્સમેન યાસ્તિકા ભાટિયા ઈજાને કારણે હવે આખી ટુર્નામેન્ટમાં ભાગ લઈ શકશે નહીં. વર્લ્ડકપ માટે વિઝાગમાં આયોજિત કેમ્પ દરમિયાન યાસ્તિકાને ડાબા ઘૂંટણમાં ઈજા થઈ છે.

યાસ્તિકાની ઈજા ગંભીર હોવાનું કહેવાય છે અને તેને મેડિકલ ટીમની દેખરેખ હેઠળ રાખવામાં આવી છે. યાસ્તિકાના સ્થાને ઉમા છેત્રીને ટીમમાં સામેલ કરવામાં આવી છે. ઉમાએ ભારત માટે અત્યાર સુધીમાં કુલ 7 T20 ઈન્ટરનેશનલ મેચ રમી છે અને આ દરમિયાન કુલ 37 રન બનાવ્યા છે. પરંતુ તેણે હજુ સુધી વનડે ડેબ્યૂ કર્યું નથી. ઓસ્ટ્રેલિયા સામેની વનડે સિરીઝમાં પણ ઉમા યાસ્તિકાની જગ્યાએ ટીમમાં સામેલ થશે.

ટીમ ઈન્ડિયાનું શેડ્યૂલ

મહિલા ODI વર્લ્ડકપ 2025માં ટીમ ઈન્ડિયા 30 સપ્ટેમ્બરે શ્રીલંકા સામે પોતાની પહેલી મેચ રમશે, જે ટૂર્નામેન્ટનો ઓપનિંગ મેચ પણ હશે. આ પછી હરમનપ્રીતની સેના આગામી 5 ઓક્ટોબરે પાકિસ્તાનનો સામનો કરશે. 9 ઓક્ટોબરે ભારતીય ટીમ સાઉથ આફ્રિકાનો સામનો કરશે, જ્યારે 12 ઓક્ટોબરે ટીમ ઈન્ડિયા ઓસ્ટ્રેલિયાના કઠિન પડકારનો સામનો કરશે. 19 ઓક્ટોબરે ભારતીય ટીમ ઈંગ્લેન્ડ સામે અને 23 ઓક્ટોબરે ન્યુઝીલેન્ડ સામે મેદાનમાં ઉતરશે. છેલ્લી લીગ મેચમાં ભારતીય ટીમ 26 ઓક્ટોબરે બાંગ્લાદેશનો સામનો કરશે.