ભૂતપૂર્વ ભારતીય ક્રિકેટર અને તૃણમૂલ કોંગ્રેસના સાંસદ યુસુફ પઠાણના સસરા અને તેમના પુત્ર અને અન્ય એક સંબંધીની ધરપકડ કરવામાં આવી છે. તેમના પર એક વ્યક્તિ પર હુમલો કરવાનો આરોપ છે, જેના પગલે પોલીસે કાર્યવાહી કરી હતી.
આ ઘટના મુંબઈના ભાયખલા વિસ્તારમાં એક ખાડામાંથી એક કાર પસાર થતી વખતે પાણીના છાંટા પડ્યા હતા, જે પછીથી શારીરિક ઝઘડામાં પરિણમી હતી. મીડિયા રિપોર્ટ મુજબ યુસુફ ખાન એક સ્થાનિક વ્યક્તિ, ગયા શનિવારે એટલે કે 18 એપ્રિલની રાત્રે 9 વાગ્યાની આસપાસ ઘરે પરત ફરી રહ્યો હતો. તેની કારમાંથી પાણીના છાંટા શોએબ ખાન નામના વ્યક્તિ પર પડ્યા, જેના કારણે ઝઘડો થયો. યુસુફ તરત જ તેની કારમાંથી બહાર નીકળી ગયો અને માફી માગી, તેમ છતાં શોએબ ખાને તેની સાથે દલીલ કરવાનું ચાલુ રાખ્યું, અને ઝઘડો શારીરિક ઝઘડામાં પરિણમ્યો.
આ મારામારીમાં યુસુફ ગંભીર રીતે ઘાયલ થયો
વધુમાં ગુસ્સામાં આવીને શોએબે યુસુફની કારનો કાચ વાંસના લાકડીથી તોડી નાખ્યો. ઝઘડામાં યુસુફ ગંભીર રીતે ઘાયલ થયો. જ્યારે તે ઘરે પાછો ફર્યો, ત્યારે તેના પરિવારે તેને પોલીસ ફરિયાદ નોંધાવવા વિનંતી કરી. યુસુફ ખાન પોલીસ સ્ટેશન જઈ રહ્યો હતો ત્યારે ખાલિદ ખાન (યુસુફ પઠાણના સસરા), તેનો પુત્ર ઉમરશા, શોએબ અને અન્ય એક આરોપી શાહબાઝ પઠાણે તેને અટકાવ્યો અને તેની સાથે દલીલ કરવા લાગ્યા, જેના કારણે ફરી ઝઘડો થયો.
પરિવારના સભ્યો પણ ઘાયલ થયા
પોલીસના જણાવ્યા મુજબ ખાલિદ, ઉમરશાદ, શોએબ અને શાહબાઝે યુસુફ ખાન અને તેના સંબંધીઓ પર વાંસની લાકડીઓ અને બેઝબોલ બેટથી હુમલો કર્યો હતો. આ હુમલામાં યુસુફ ખાનના સાળા સલમાનને પણ ઈજા થઈ હતી, તેનો હાથ ફ્રેક્ચર થયો હતો, જ્યારે તેના કાકા ઝાકી અહેમદને ગંભીર ઈજાઓ થઈ હતી.
3 આરોપીઓની ધરપકડ, એકની શોધ ચાલુ
આ કેસની માહિતી મળતાં ભાયખલા પોલીસે તાત્કાલિક કાર્યવાહી કરી અને ખાલિદ ખાન, તેના પુત્ર અને અન્ય એક સંબંધીની ધરપકડ કરી. ચોથો આરોપી, શાહબાઝ પઠાણ, હજુ પણ ફરાર છે અને તેની શોધ ચાલી રહી છે. ત્રણેય સામે હુમલો કરવા અને ગંભીર શારીરિક નુકસાન પહોંચાડવાનો કેસ નોંધવામાં આવ્યો છે. ધરપકડ કરાયેલા આરોપીઓને કોર્ટમાં રજૂ કરવામાં આવ્યા હતા, જ્યાં તેમને 2 મે સુધી ન્યાયિક કસ્ટડીમાં મોકલવામાં આવ્યા હતા.
આ પણ વાંચો: 'મારી પાસે જીવવા માટે 3-6 મહિના બાકી...!' યુવરાજ સિંહે કેન્સરને લઈને કર્યો મોટો ખુલાસો
