- ICC 2025 ચેમ્પિયન્સ ટ્રોફી પાકિસ્તાનમાં રમવાની છે
- PCBએ આ ટૂર્નામેન્ટ માટે શેડ્યૂલ પણ તૈયાર કરી લીધું છે
- પાકિસ્તાનના ક્રિકેટર દાનિશ કનેરિયાએ મોટું નિવેદન આપ્યું છે
ICC 2025 ચેમ્પિયન્સ ટ્રોફી પાકિસ્તાનમાં રમવાની છે. PCBએ આ ટૂર્નામેન્ટ માટે શેડ્યૂલ પણ તૈયાર કરી લીધું છે અને જોરશોરથી તૈયારી કરી રહી છે. પરંતુ હજુ એ સ્પષ્ટ નથી થયું કે ટીમ ઈન્ડિયા આ પ્રવાસ માટે પાકિસ્તાન જશે કે નહીં. એવા સમાચાર છે કે BCCI ટીમ ઈન્ડિયાને પાકિસ્તાન મોકલવા તૈયાર નથી. આવી સ્થિતિમાં હાઇબ્રિડ મોડલનો મુદ્દો પણ સામે આવી રહ્યો છે. આ બધા વચ્ચે પાકિસ્તાનના પૂર્વ ખેલાડીનું મોટું નિવેદન સામે આવ્યું છે. આ ખેલાડીએ ભારતને પાકિસ્તાન ન આવવાની સલાહ આપી છે.
ટીમ ઈન્ડિયાને પાકિસ્તાન ન જવાની સલાહ મળી
પાકિસ્તાનના પૂર્વ ખેલાડી દાનિશ કનેરિયાએ મોટું નિવેદન આપ્યું છે. દાનિશ કનેરિયાનું માનવું છે કે આ સમયે પાકિસ્તાનમાં વાતાવરણ યોગ્ય નથી, તેથી ટીમ ઈન્ડિયાએ ત્યાં પ્રવાસ ન કરવો જોઈએ. ભારત છેલ્લા ઘણા સમયથી પાકિસ્તાનમાં ખેલાડીઓની સુરક્ષાને લઈને પણ ચિંતિત છે અને તેથી તે પોતાની ટીમ પાકિસ્તાન મોકલતું નથી. આ બંને ટીમો વચ્ચે કોઈ સિરીઝ રમાતી નથી. આ બંને ટીમો માત્ર એશિયા કપ અથવા આઈસીસી ઈવેન્ટ્સમાં જ એકબીજાનો સામનો કરે છે.
દાનિશ કનેરિયાનું મોટું નિવેદન
એક ઈન્ટરવ્યૂમાં દાનિશ કનેરિયાએ ટીમ ઈન્ડિયાના પાકિસ્તાન પ્રવાસ પર કહ્યું, 'પાકિસ્તાનની વર્તમાન સ્થિતિને જોતા મારે કહેવું છે કે ભારતીય ટીમે પાકિસ્તાન ન જવું જોઈએ. પાકિસ્તાને આ અંગે વિચારવું જોઈએ અને પછી ICC પોતાનો નિર્ણય લેશે. મોટે ભાગે આ ટુર્નામેન્ટ હાઇબ્રિડ મોડલમાં રમાશે. આ દુબઈમાં થઈ શકે છે, જે સારી બાબત હશે. કનેરિયાએ વધુમાં કહ્યું, 'ખેલાડીઓની સુરક્ષા પ્રથમ પ્રાથમિકતા છે. આદર એ બીજી પ્રાથમિકતા છે. મને લાગે છે કે BCCI ખૂબ સારું કામ કરી રહ્યું છે. જોકે, તમામ દેશો અંતિમ નિર્ણય સ્વીકારશે.
કોણ છે દાનિશ કનેરિયા?
દાનિશ કનેરિયાનો જન્મ 16 ડિસેમ્બર 1980ના રોજ કરાચીમાં એક ગુજરાતી પરિવારમાં થયો હતો. દાનિશ કનેરિયા પાકિસ્તાન ક્રિકેટનું મોટું નામ છે. પરંતુ આ ખેલાડી હવે ગુમનામ જીવન જીવી રહ્યો છે. કનેરિયાના કહેવા પ્રમાણે, જ્યારે તે ટીમનો ભાગ હતો ત્યારે તેણે પાકિસ્તાનમાં ભેદભાવનો સામનો કરવો પડ્યો હતો કારણ કે તે હિન્દુ હતો. તેના પર આજીવન પ્રતિબંધ પણ લાદવામાં આવ્યો હતો. પાકિસ્તાનના ભૂતપૂર્વ વિકેટકીપર અનિલ દલપત તેમના પિતરાઈ ભાઈ છે. અનિલ અને કનેરિયા પાકિસ્તાન માટે ક્રિકેટ રમનારા એકમાત્ર બે હિંદુ ક્રિકેટર છે.
