- રમતપ્રેમીઓમાં ટેનિસ ગ્રાન્ડ સ્લેમ ટૂર્નામેન્ટ ફ્રેન્ચ ઓપન 2023નો ક્રેઝ
- જોકોવિચે મેન્સ સિંગલ્સના ત્રીજા રાઉન્ડમાં જીત મેળવીને પ્રિ-ક્વાર્ટર ફાઇનલમાં જગ્યા બનાવી
- જોકોવિચે ત્રીજા રાઉન્ડમાં સ્પેનિશ સ્ટાર એલેજાન્ડ્રો ડેવિડોવિચ ફોકિનાને હરાવ્યો
અત્યારે રમતપ્રેમીઓમાં ટેનિસ ગ્રાન્ડ સ્લેમ ટૂર્નામેન્ટ ફ્રેન્ચ ઓપન 2023નો ક્રેઝ પૂરજોશમાં છે. આ સિઝનમાં ફરી એકવાર સર્બિયન ખેલાડી નોવાક જોકોવિચે ધમાકેદાર જીત મેળવી છે. વર્લ્ડ નંબર-3 જોકોવિચે મેન્સ સિંગલ્સના ત્રીજા રાઉન્ડમાં જીત મેળવીને પ્રિ-ક્વાર્ટર ફાઇનલમાં જગ્યા બનાવી લીધી છે. જોકોવિચે ત્રીજા રાઉન્ડમાં સ્પેનિશ સ્ટાર એલેજાન્ડ્રો ડેવિડોવિચ ફોકિનાને હરાવ્યો હતો. આ ત્રીજા રાઉન્ડની મેચમાં જોકોવિચે ફોકિનાને સતત ત્રણ સેટમાં 7-6, 7-6, 6-2થી હરાવ્યો હતો.
પહેલા બે સેટમાં 7-6, 7-6થી ક્લોઝ ફાઈટ રહી
ફોકિનાએ પહેલા 2 સેટમાં જોકોવિચને જોરદાર ટક્કર આપી હતી, પરંતુ તે એક પણ સેટ જીતી શક્યો નહોતો. ત્રીજા સેટમાં એવું લાગી રહ્યું હતું કે ફોકિનાએ હાર માની લીધી હતી. આ જ કારણ હતું કે તેણે ત્રીજો સેટ 6-2ના મોટા માર્જિનથી ગુમાવ્યો હતો. જ્યારે પહેલા બે સેટમાં 7-6, 7-6થી નજીકની લડાઈ જોવા મળી હતી. ઉલ્લેખનીય છે કે બંને ખેલાડીઓ વચ્ચેની આ મેચ 3 કલાક અને 36 મિનિટ સુધી ચાલી હતી. વર્તમાન સિઝનમાં નંબર-3 જોકોવિચ હવે પ્રિ-ક્વાર્ટર ફાઇનલમાં પ્રવેશી ચૂક્યો છે, જ્યાં તેનો મુકાબલો પેરુના જુઆન પાબ્લો વેરિલાસ અથવા પોલેન્ડના હુબર્ટ હુર્કાઝ સામે થશે.
જોકોવિચ પાસે નડાલનો રેકોર્ડ તોડવાની તક
વર્લ્ડ રેન્કિંગમાં નંબર-1 રહેલા નોવાક જોકોવિચે પણ મેન્સ સિંગલ્સના બીજા રાઉન્ડમાં ધમાકેદાર જીત મેળવી હતી. નંબર-3 જોકોવિચે પણ બીજા રાઉન્ડમાં ઇટાલીના માર્ટન ફુસોવિક્સને ત્રણ સેટમાં 7-6, 6-0, 6-3થી પરાજય આપ્યો હતો. જોકોવિચ આ ગ્રાન્ડસ્લેમ બે વખત જીતી ચૂક્યો છે. હવે તે ત્રીજી વખત ટાઈટલ કબજે કરવાના ઈરાદા સાથે આગળ વધી રહ્યો છે. ટેનિસ જગતમાં એકંદરે સૌથી વધુ ગ્રાન્ડ સ્લેમ જીતવાની બાબતમાં સ્પેનિશ સ્ટાર્સ રાફેલ નડાલ અને જોકોવિચ સંયુક્ત રીતે ટોચ પર છે. બંનેએ અત્યાર સુધી 22-22 ગ્રાન્ડ સ્લેમ ટાઇટલ બરાબર જીત્યા છે. જો જોકોવિચ આ વખતે ફ્રેન્ચ ઓપન જીતશે તો તે નડાલને હરાવશે. ઉલ્લેખનીય છે કે ઈજાના કારણે નડાલ આ ટૂર્નામેન્ટ નથી રમી રહ્યો.
