- ઈંગ્લેન્ડ અને શ્રીલંકા વચ્ચે ટેસ્ટ સિરીઝ રમાઈ રહી છે
- બીજી ટેસ્ટમાં શ્રીલંકાને 190 રનના માર્જીનથી હરાવ્યું
- ઈંગ્લેન્ડે આ સિરીઝ 2-0થી જીતી લીધી હતી
ઓલી પોપની આગેવાની હેઠળની ઈંગ્લેન્ડની ક્રિકેટ ટીમે લોર્ડ્સમાં રમાયેલી ત્રણ મેચની સિરીઝની બીજી ટેસ્ટ મેચમાં શ્રીલંકાને 190 રનના માર્જીનથી હરાવીને સિરીઝ 2-0થી જીતી લીધી હતી. લોર્ડ્સ ટેસ્ટના બીજા દાવમાં જીતવા માટેના 483 રનના લક્ષ્યાંકનો પીછો કરવા ઉતરેલી શ્રીલંકાની ટીમ ચોથા દિવસે 292 રન બનાવીને પડી ભાંગી હતી અને 190 રનના વિશાળ અંતરથી મેચ હારી ગઈ હતી.
લંડનમાં ઈંગ્લેન્ડ સામેની ટેસ્ટ મેચમાં 33 વર્ષના ગાળા બાદ શ્રીલંકાને હારનો સામનો કરવો પડ્યો હતો. પ્રથમ દાવમાં સદી ફટકારનાર અને ચોથી ઇનિંગ્સમાં પાંચ વિકેટ ઝડપનાર ઓલરાઉન્ડર ગુસ એટકિન્સનને પ્લેયર ઓફ ધ મેચ તરીકે પસંદ કરવામાં આવ્યો હતો. તેણે પ્રથમ દાવમાં 118 રન બનાવ્યા હતા. તેણે મેચમાં કુલ 7 વિકેટ લીધી હતી. સિરીઝની ત્રીજી અને છેલ્લી ટેસ્ટ 6 સપ્ટેમ્બરથી ઓવલમાં રમાશે.
દિમુથ કરુણારત્નેએ ફિફ્ટીની ઇનિંગ રમી હતી
મેચના ચોથા દિવસે 53 રનમાં 2 વિકેટે આગળ રહેલી શ્રીલંકાએ ટૂંક સમયમાં જ નાઈટ વોચમેન પ્રભાત જયસૂર્યાની વિકેટ ગુમાવી દીધી હતી. તે બીજી સ્લિપમાં ક્રિસ વોક્સના બોલ પર કેચ આઉટ થયો હતો. ત્યારબાદ કરુણારત્ને અને એન્જેલો મેથ્યુસ (36)એ 55 રનની ભાગીદારી કરીને દાવને આગળ ધપાવ્યો હતો. કરુણારત્ને, ટેસ્ટમાં તેની 54મી ફિફ્ટી ફટકાર્યા બાદ ઓલી સ્ટોનનો ઉછળતા બોલને સંભાળવામાં નિષ્ફળ ગયો અને બોલ તેના ગ્લોવ્ઝ સાથે અથડાયો અને વિકેટકીપર જેમી સ્મિથના હાથમાં ગયો હતો.
ટી બ્રેક સુધી શ્રીલંકાએ 7 વિકેટ ગુમાવી દીધી હતી
લંચ બ્રેક પછી મેથ્યુઝે સાવધાનીપૂર્વક બેટિંગ કરી જ્યારે દિનેશ ચાંદીમલ (58)એ આક્રમક અભિગમ અપનાવ્યો. શોએબ બશીરે મેથ્યુઝને આઉટ કરીને બંને વચ્ચેની 59 રનની ભાગીદારીને તોડી હતી. કવર એરિયામાં વોક્સને આસાન કેચ આપીને મેથ્યુસ પેવેલિયન પરત ફર્યો હતો. પ્રથમ દાવમાં સદી ફટકારનાર ગુસ એટકિન્સને ત્યારબાદ ચંદીમલ અને કામિન્દુ મેન્ડિસને આઉટ કરીને ઇંગ્લેન્ડની જીત લગભગ સુનિશ્ચિત કરી હતી. ટી બ્રેક સુધીમાં સાત વિકેટે 260 રન થઈ ગયા હતા. ધનંજય ડી સિલ્વા અણનમ 45 અને મિલન રથનાયકે અણનમ 26 રને ક્રિઝ પર હાજર હતા.
એટકિન્સનના પંજામાં ફસાયેલી શ્રીલંકા
ટી બ્રેક પછી ધનંજય ડી સિલ્વાએ 68 બોલમાં 7 ચોગ્ગાની મદદથી પોતાની ફિફ્ટી પૂરી કરી હતી. આ પછી તે એટકિન્સનના બોલે બોલ્ડ થયો હતો. આ પછી મિલન રથનાયકે થોડો સમય એક છેડો પકડી રાખ્યો હતો પરંતુ 288ના સ્કોર પર તે પણ 43 રન બનાવીને એટકિન્સનના બોલ પર કેચ આઉટ થયો હતો. આ પછી વોક્સે લાહિરુ કુમારાને કેચ કરાવી ઈંગ્લેન્ડને 190 રનથી જીત અપાવી હતી. શ્રીલંકાની ટીમ બીજા દાવમાં 86.4 ઓવરમાં 292 રનમાં સમેટાઈ ગઈ હતી. ઇંગ્લેન્ડની બીજી ઇનિંગમાં ગસ એટકિન્સન સૌથી સફળ બોલર રહ્યો હતો. તેણે 62 રનમાં 5 વિકેટ લીધી હતી. ક્રિસ વોક્સ અને ઓલી સ્ટોન્સના ખાતામાં બે-બે વિકેટ ગઈ. શોએબ બશીરને એક સફળતા મળી હતી.
