- અયોધ્યામાં રામ મંદિરના અભિષેકને બે દિવસ બાકી
- રામ મંદિર અંગે હરભજન સિંહએ આપી પ્રતિક્રિયા
- હરભજન સિંહ AAP તરફથી રાજ્યસભાના સાંસદ
અયોધ્યામાં રામ મંદિરના અભિષેકને હવે માત્ર બે દિવસ બાકી છે. આ માટેની તૈયારીઓ જોરશોરથી ચાલી રહી છે. આ કાર્યક્રમમાં ઋષિ-મુનિઓ ઉપરાંત દેશભરમાંથી અનેક મોટી હસ્તીઓ ભાગ લઈ રહી છે. જો કે કોંગ્રેસે તેને ભાજપની રાજકીય ઘટના ગણાવીને અહીં જવાનો ઈન્કાર કર્યો છે. જ્યારે પૂર્વ ભારતીય ક્રિકેટર હરભજન સિંહને આ અંગે સવાલ કરવામાં આવ્યો તો તેણે સ્પષ્ટ કહ્યું કે કોઈ જાય કે ન જાય, હું તો જઈશ.
રામ મંદિર અંગે હરભજનની પ્રતિક્રિયા
હરભજન સિંહ આમ આદમી પાર્ટી તરફથી રાજ્યસભાના સાંસદ છે. રામ મંદિર પ્રાણ પ્રતિષ્ઠા સમારોહમાં ભાગ લેવા કે ન જવાના વિવિધ રાજકીય પક્ષોના નિર્ણયો અંગેના એક પ્રશ્ન પર તેમણે કહ્યું, 'કોણ શું કહે છે તે ખૂબ જ અલગ બાબત છે. સાચી વાત એ છે કે મંદિરનું નિર્માણ થયું છે અને આપણે સૌ ભાગ્યશાળી છીએ કે આપણા સમયમાં આવું થઈ રહ્યું છે. આપણે ત્યાં જવું જોઈએ. આશીર્વાદ લેવા જોઈએ. કોઈ જાય કે ન જાય, મને ભગવાનમાં શ્રદ્ધા છે, એટલે હું તો જઈશ.
'હું ભગવાનમાં વિશ્વાસ રાખનાર વ્યક્તિ'
હરભજને કહ્યું, 'પાર્ટી જાય કે ન જાય. પણ મારું પોતાનું સ્ટેન્ડ છે. હું ઈશ્વરમાં માનું છું. જો કોઈને મારા જવાથી કોઈ સમસ્યા હોય તો તેઓ જે ઈચ્છે તે કરી શકે છે. હું ભગવાનમાં વિશ્વાસ રાખનાર વ્યક્તિ છું. મારા જીવનમાં જે કંઈ પણ બન્યું છે, આજે હું જે કંઈ પણ છું ઈશ્વરની કૃપાને કારણે છું. તેથી હું ચોક્કસપણે આશીર્વાદ લેવા જઈશ.
હરભજને કહ્યું, 'હું દરેક મંદિર, મસ્જિદ, ગુરુદ્વારામાં આશીર્વાદ લેવા જાઉં છું. મને જ્યારે પણ તક મળશે હું રામ મંદિર જઈશ. તેમાં કોઈ શંકા નથી.'
