- એલિમિનેટર મેચમાં મુંબઈની બેંગ્લોર સામે હાર
- રોમાંચક મેચમાં RCBની 5 રને શાનદાર જીત
- મુંબઈ ઈન્ડિયન્સનું ટાઈટલ જીતવાનું સપનું તૂટ્યું
વિમેન્સ પ્રીમિયર લીગ (WPL)ની બીજી સિઝનની એલિમિનેટર મેચનો અંત ખૂબ જ રોમાંચક રીતે જોવા મળ્યો હતો. આ મેચમાં રોયલ ચેલેન્જર્સ બેંગ્લોરની ટીમે ડિફેન્ડિંગ ચેમ્પિયન મુંબઈ ઈન્ડિયન્સને હરાવીને ફાઇનલમાં પોતાનું સ્થાન નિશ્ચિત કરી લીધું છે. 136 રનના ટાર્ગેટનો પીછો કરવા ઉતરેલી મુંબઈ ઈન્ડિયન્સની ટીમ એક સમયે મેચમાં સંપૂર્ણ રીતે વર્ચસ્વ ધરાવતી દેખાતી હતી, પરંતુ RCBએ છેલ્લી 3 ઓવરમાં મેચને સંપૂર્ણ રીતે ફેરવી નાખી અને જીત મેળવી હતી. હવે તેઓ 17 માર્ચે ટાઈટલ મેચમાં દિલ્હી કેપિટલ્સ ટીમ સામે ટકરાશે. ફાઇનલમાં ન પહોંચ્યા બાદ, મુંબઈ ઈન્ડિયન્સ ટીમની કેપ્ટન હરમનપ્રીત કૌર પણ ઘણી નિરાશ દેખાઈ હતી જેમાં તેણે પોતાની વિકેટને મેચનો ટર્નિંગ પોઈન્ટ ગણાવ્યો હતો જ્યાંથી મેચ સંપૂર્ણપણે પલટી ગઈ હતી.
અમને છેલ્લી 2 ઓવરમાં માત્ર એક બાઉન્ડ્રીની જરૂર હતી
એલિમિનેટર મેચમાં જ્યારે મુંબઈ ઈન્ડિયન્સની ટીમ ટાર્ગેટનો પીછો કરી રહી હતી ત્યારે એક સમયે તેને 13 બોલમાં માત્ર 16 રનની જરૂર હતી અને તે સમયે કેપ્ટન હરમનપ્રીત કૌર અને એમેલિયા કેર ક્રિઝ પર હતા, પરંતુ આના પછી તરત જ હરમનપ્રીત કૌર આઉટ થઈ ગઈ અને મુંબઈ મેચ હારી ગઈ હતી. હાર બાદ હરમનપ્રીત કૌરે કહ્યું કે અમને છેલ્લા 12 બોલમાં માત્ર એક બાઉન્ડ્રીની જરૂર હતી પરંતુ અમે આમ કરવામાં સફળ ન થયા. આ રમતની વિશેષતા છે અને તે તમને દબાણમાં કેવી રીતે રમવું તે શીખવે છે. મારા આઉટ થયા બાદ અમારા બેટ્સમેન દબાણમાં આવી ગયા અને આ મેચનો સૌથી મોટો ટર્નિંગ પોઈન્ટ સાબિત થયો.
આ સિઝન અમારા માટે ઉતાર-ચઢાવથી ભરેલી રહી
બીજી સિઝનમાં ટીમના પ્રવાસના અંત અંગે હરમનપ્રીત કૌરે પણ કહ્યું કે આ સિઝન અમારા માટે ઉતાર-ચઢાવથી ભરેલી હતી. ગત સિઝનમાં એક ટીમ તરીકે અમારું પ્રદર્શન ઘણું સારું રહ્યું હતું, પરંતુ આ સિઝનમાં અમને ઘણું શીખવાનો મોકો મળ્યો અને મને આશા છે કે અમે આગામી સિઝનમાં વધુ સારી તૈયારી સાથે મેદાન પર પાછા ફરીશું. આ સિઝનમાં અમને સજના સજીવનના રૂપમાં એક યુવા ખેલાડી મળ્યો જે બોલને ખૂબ સારી રીતે ફટકારે છે. તમને જણાવી દઈએ કે WPLની બીજી સિઝનમાં મુંબઈ ઈન્ડિયન્સે 8 લીગ મેચમાંથી 5 જીતી હતી અને પોઈન્ટ ટેબલમાં બીજા સ્થાને રહી હતી.
