Champions Trophy 2025ના કાર્યક્રમમાં થશે ફેરફાર? પાકિસ્તાન ક્રિકેટ બોર્ડે આપી માહિતી

• પાકિસ્તાન ચેમ્પિયન્સ ટ્રોફી 2025ની યજમાની કરી રહ્યું છે
  
• 19 ફેબ્રુઆરીથી 9 માર્ચ 2025 સુધી ટૂર્નામેન્ટ રમાશે
• ચેમ્પિયન્સ ટ્રોફી 2025ના કાર્યક્રમમાં ફેરફાર થઈ શકે છે

પાકિસ્તાન ચેમ્પિયન્સ ટ્રોફી 2025ની યજમાની કરી રહ્યું છે. જો કે, કેટલાક મીડિયા રિપોર્ટમાં દાવો કરવામાં આવી રહ્યો છે કે ચેમ્પિયન્સ ટ્રોફીના કાર્યક્રમમાં ફેરફાર થઈ શકે છે. હવે આ મીડિયા રિપોર્ટ્સ પર PCB તરફથી સત્તાવાર નિવેદન બહાર આવ્યું છે. પીસીબીએ આ મીડિયા અહેવાલોને નકારી કાઢ્યા છે.

PCBએ નિવેદન જારી કર્યું

પીસીબીએ પોતાના નિવેદનમાં કહ્યું, 'કેટલાક મીડિયાએ પીસીબી અધ્યક્ષ મોહસિન નકવીના નિવેદનને ખોટી રીતે રજૂ કર્યું તે નિરાશાજનક છે. મીડિયા રિપોર્ટ્સમાં દાવો કરવામાં આવ્યો છે કે ICC ચેમ્પિયન્સ ટ્રોફી 2025ના શેડ્યૂલમાં ફેરફાર થઈ શકે છે. આ ખોટા સમાચાર છે.

તેણે વધુમાં કહ્યું કે, 'મીડિયા ટોકનો વીડિયો PCBની ઓફિશિયલ યુટ્યુબ ચેનલ પર ઉપલબ્ધ છે. આ વીડિયોમાં પીસીબી અધ્યક્ષે સ્પષ્ટ કહ્યું છે કે ત્રણેય સ્ટેડિયમમાં ચાલી રહેલ કામ નિર્ધારિત સમયમાં પૂર્ણ કરવામાં આવશે. આ દરમિયાન તેણે એમ પણ કહ્યું હતું કે આ નિર્માણ કાર્યને કારણે ઘરેલુ મેચો પણ શિફ્ટ થઈ શકે છે. આને આઈસીસી ટૂર્નામેન્ટ સાથે કોઈ લેવાદેવા નથી. પીસીબી ચેમ્પિયન્સ ટ્રોફીની યજમાની માટે તૈયાર છે.

અમે હોસ્ટ કરવા તૈયાર છીએ'

બોર્ડે પોતાના નિવેદનમાં કહ્યું, 'PCB ICC ચેમ્પિયન્સ ટ્રોફી 2025ની યજમાની માટે સંપૂર્ણ રીતે પ્રતિબદ્ધ છે. અમે ક્રિકેટ ચાહકોને યાદગાર અનુભવ આપવા માંગીએ છીએ. અમે આ માટે ICCને અમારી યોજના પણ રજૂ કરી છે, 19 ફેબ્રુઆરીથી 9 માર્ચ 2025 દરમિયાન ચેમ્પિયન્સ ટ્રોફીનું આયોજન કરવામાં આવશે.