ICC Awards: સૂર્યકુમાર યાદવને મળ્યો T20 ક્રિકેટર ઓફ ધ યરનો એવોર્ડ

• સૂર્યકુમાર યાદવ T20 ફોર્મેટમાં નંબર-1 બેટ્સમેન પણ છે
  
• વર્ષ 2022માં સૂર્યકુમાર યાદવનો દબદબો રહ્યો
• 2022માં સૂર્યાએ T20માં 31 મેચમાં 1164 રન બનાવ્યા હતા

ICCના વાર્ષિક એવોર્ડમાં ભારતીય ખેલાડીઓ છવાઈ રહ્યા છે. ICC દ્વારા બુધવારે T20 ક્રિકેટર ઓફ ધ યરની જાહેરાત કરવામાં આવી છે, આ એવોર્ડ સૂર્યકુમાર યાદવને મળ્યો છે. ગયા વર્ષે T20 ફોર્મેટમાં ધમાલ મચાવનાર સૂર્યકુમાર યાદવને આ સન્માન મળ્યું છે.

આ રેસમાં સૂર્યકુમાર યાદવે ઈંગ્લેન્ડના સેમ કરન, ઝિમ્બાબ્વેના સિકંદર રઝા અને પાકિસ્તાનના મોહમ્મદ રિઝવાનને પાછળ છોડ્યા છે. સૂર્યકુમાર યાદવ T20 ફોર્મેટમાં નંબર-1 બેટ્સમેન પણ છે, સાથે જ હવે તે T20 ફોર્મેટમાં ક્રિકેટર ઓફ ધ યર પણ બની ગયો છે.

વર્ષ 2022માં સૂર્યકુમાર યાદવનો દબદબો રહ્યો

વર્ષ 2022ની વાત કરીએ તો સૂર્યકુમાર યાદવે 31 મેચમાં 47ની એવરેજથી 1164 રન બનાવ્યા હતા. આ દરમિયાન સૂર્યકુમારની સ્ટ્રાઈક રેટ 187.43 હતી. જે કોઈપણ ખેલાડી કરતા વધારે હતી. સૂર્યકુમાર યાદવ એક કેલેન્ડર વર્ષમાં T20 ક્રિકેટમાં 1000 કે તેથી વધુ રન બનાવનાર પ્રથમ ભારતીય ખેલાડી બન્યો છે.

વર્ષ 2022 સંપૂર્ણપણે સૂર્યકુમાર યાદવના નામે રહ્યું હતું, જે દરમિયાન તેણે 68 છગ્ગા ફટકાર્યા હતા. એક કેલેન્ડર વર્ષમાં T20 ફોર્મેટમાં કોઈપણ એક ખેલાડી દ્વારા ફટકારવામાં આવેલી આ સૌથી વધુ સિક્સ હતી. ઘણી મેચોમાં સૂર્યાએ એકલા હાથે ટીમ ઈન્ડિયા માટે આખી રમત પલટી નાખી હતી.