IND vs BAN: ત્રીજા દિવસની રમત સમાપ્ત, જીતથી 6 વિકેટ દુર ભારત

ત્રીજા દિવસની રમત સમાપ્ત

ચેન્નાઈના એમએ ચિદમ્બરમ સ્ટેડિયમમાં ભારત અને બાંગ્લાદેશ વચ્ચે રમાઈ રહેલી પ્રથમ ટેસ્ટ મેચના ત્રીજા દિવસની રમત ખરાબ લાઈટના કારણે વહેલી સમાપ્ત થઈ ગઈ છે. ભારતે બાંગ્લાદેશને જીતવા માટે 515 રનનો ટાર્ગેટ આપ્યો છે. જવાબમાં બાંગ્લાદેશની ટીમે 4 વિકેટે 158 રન બનાવ્યા છે અને તેને જીતવા માટે વધુ 357 રન બનાવવા પડશે, જ્યારે ભારત 6 વિકેટ લેતાં જ મેચ જીતી જશે. સ્ટમ્પના સમયે કેપ્ટન નઝમુલ હુસૈન શાંતો 60 બોલમાં 4 ચોગ્ગા અને 3 છગ્ગાની મદદથી 51 રન અને શાકિબ અલ હસન 14 બોલમાં 5 રન સાથે ક્રિઝ પર હાજર હતો. ભારત તરફથી ઓફ સ્પિનર ​​રવિચંદ્રન અશ્વિને 3 અને જસપ્રિત બુમરાહે એક વિકેટ ઝડપી હતી.

આ પહેલા ભારતે બીજી ઇનિંગમાં શુભમન ગિલ અને રિષભ પંતની સદીઓની મદદથી 4 વિકેટે 287 રન બનાવ્યા બાદ ઇનિંગ ડિકલેર કરવાનો નિર્ણય કર્યો હતો. શુભમન 176 બોલમાં 10 ચોગ્ગા અને ચાર છગ્ગાની મદદથી 119 રન બનાવીને અણનમ રહ્યો હતો જ્યારે પંતે 128 બોલમાં 13 ચોગ્ગા અને ચાર છગ્ગાની મદદથી 109 રન બનાવ્યા હતા.

ખરાબ લાઈટના કારણે મેચ અટકી

ખરાબ લાઇટના કારણે ત્રીજા દિવસે ભારત અને બાંગ્લાદેશ વચ્ચેની મેચ રોકી દેવામાં આવી છે. ભારતે બાંગ્લાદેશને 515 રનનો લક્ષ્યાંક આપ્યો છે જેના જવાબમાં બાંગ્લાદેશે 4 વિકેટે 158 રન બનાવ્યા છે. કેપ્ટન નઝમુલ હુસૈન શાંતો 51 રન બનાવીને ક્રીઝ પર હાજર છે અને શાકિબ અલ હસને 5 રન બનાવ્યા છે. બાંગ્લાદેશને જીતવા માટે હજું પણ 357 રન બનાવવાના રહેશે, જ્યારે ભારતે જીતવા 6 વિકેટ લેવી પડશે. 

શાંતોની ફિફ્ટી

બાંગ્લાદેશના કેપ્ટન નઝમુલ હુસેન શાંતોએ ભારત સામેના લક્ષ્યનો પીછો કરતી વખતે અડધી સદી ફટકારી છે. ભારતે બાંગ્લાદેશને 515 રનનો વિશાળ લક્ષ્યાંક આપ્યો છે, જેના જવાબમાં બાંગ્લાદેશે 146 રનમાં 4 વિકેટ ગુમાવી દીધી છે. શાંતો હાલમાં 50 રન બનાવીને રમી રહ્યો છે. તેને સાથ આપવા શાકિબ અલ હસન 4 રન બનાવીને ક્રિઝ પર હાજર છે. 

અશ્વિનને મળી ત્રીજી સફળતા

રવિચંદ્રન અશ્વિને શાનદાર બોલિંગ કરીને ભારતને ચોથી સફળતા અપાવી હતી. અશ્વિને મુશફિકુર રહીમને આઉટ કરીને બાંગ્લાદેશને વધુ એક ઝટકો આપ્યો હતો. મુશફિકુર 11 બોલમાં 13 રન બનાવીને આઉટ થયો હતો. આ રીતે અશ્વિને બીજી ઇનિંગમાં ત્રણ વિકેટ ઝડપી છે. હાલમાં, શાકિબ અલ હસન નઝમુલ હુસૈન શાંતો સાથે ક્રિઝ પર હાજર છે. અશ્વિને મુશફિકુર રહીમને કેએલ રાહુલના હાથે કેચ આઉટ કરાવ્યો હતો. હવે ભારતે જીતવા માટે વધુ 6 વિકેટ લેવાની છે. જ્યારે બાંગ્લાદેશને વધુ 369 રન બનાવવાના છે.

મોમિનુલ આઉટ

રવિચંદ્રન અશ્વિને બાંગ્લાદેશને ત્રીજો ઝટકો આપ્યો છે. અશ્વિને મોમિનુલને ચકમો આપી ક્લિન બોલ્ડ કર્યો હતો. બાંગ્લાદેશનો સ્કોર 3 વિકેટે 124 રન થયો છે. કેપ્ટન નઝમુલ હુસૈન શાંતો 37 બોલમાં ત્રણ ચોગ્ગા અને બે છગ્ગાની મદદથી 34 રન બનાવી રહ્યો છે. મોમિનુલ હક ત્રણ ચોગ્ગાની મદદથી 13 રન બનાવીને આઉટ થયો હતો. બંને વચ્ચે 37 રનની ભાગીદારી થઈ હતી. હવે શાંતોને સાથ આપવા મુશફિકુર રહીમ આવ્યો છે. બાંગ્લાદેશને જીતવા માટે 391 રનની જરૂર છે. 

બાંગ્લાદેશના 100 રન પુરા

બાંગ્લાદેશની 25 ઓવરની રમત સમાપ્ત થઇ ગઈ છે. બાંગ્લાદેશનો સ્કોર 2 વિકેટના નુકશાને 100 રન સુધી પહોંચી ગયો છે. કેપ્ટન શાંતો 26 બોલમાં 1 સિક્સ અને 2 ફોરની મદદથી 20 રન બનાવીને રમી રહ્યો છે. તેમને સાથ આપવા મોમિનુલ હક 4 રન બનાવીને રમી રહ્યો છે. ઝાકિર હસન અને શાદમાન ઈસ્લામ પેવેલિયન પરત ફર્યા છે. એક વિકેટ બુમરાહને અને એક વિકેટ અશ્વિનને મળી હતી.

બાંગ્લાદેશને બીજો ઝટકો

બાંગ્લાદેશને બીજો ફટકો 86ના સ્કોર પર લાગ્યો હતો. અશ્વિને શાદમાન ઈસ્લામને શુભમન ગિલના હાથે કેચ કરાવ્યો હતો. તે 35 રન બનાવી શક્યો હતો. આ પહેલા બુમરાહે ઝાકિર હસનને યશસ્વીના હાથે કેચ કરાવ્યો હતો. હાલમાં કેપ્ટન નઝમુલ હુસૈન શાંતો અને મોમિનુલ હક ક્રિઝ પર છે. ભારત હવે જીતથી 8 વિકેટ દૂર છે.

શાદમાન-શાંતોએ સંભાળી બાંગ્લાદેશની બાજી

બાંગ્લાદેશની 20 ઓરની રમત સમાપ્ત થઇ ગઈ છે. બાંગ્લાદેશે 1 વિકેટ ગુમાવીને 77 રન બનાવી લીધા છે. શાદમાન 31 અને શાંતો 9 રન બનાવીને રમી રહ્યાં છે. બાંગ્લાદેશને જીતવા માટે હજું 438 રન બનાવવાના છે. 

હસન આઉટ

બુમરાહે ભારતને પ્રથમ સફળતા અપાવી છે. બુમરાહના બોલ પર ઝાકિર હસન યશસ્વી જયસ્વાલના હાથમાં કેચ આપી બેઠો હતો. જયસ્વાલે ખતરનાક કેચ પકડીને બાંગ્લાદેશને પ્રથમ ઝટકો આપ્યો હતો. હાલમાં કેપ્ટન નઝમુલ હુસૈન શાંતો અને શાદમાન ઈસ્લામ ક્રિઝ પર છે. બાંગ્લાદેશે 17 ઓવર બાદ 1 વિકેટ ગુમાવીને 63 રન બનાવ્યા છે. 

બાંગ્લાદેશ માટે શાનદાર શરૂઆત

બાંગ્લાદેશે એકપણ વિકેટ ગુમાવ્યા વિના 60 રન બનાવી લીધા છે. હાલમાં ઝાકિર હસન 33 અને શાદમાન ઈસ્લામ 24 રન સાથે બેટિંગ કરી રહ્યા છે. બાંગ્લાદેશને હવે 455 રનની જરૂર છે.

ત્રીજું સેશન શરૂ

ટી બ્રેક બાદ ફરી મેચની શરૂઆત થઇ ગઈ છે. ત્રીજા સેશનની પ્રથમ ઓવર રવિચંદ્રન અશ્વિને નાખી હતી. આ ઓવરમાં 3 રન આવ્યા હતા. ભારત હવે જલ્દી બાંગ્લાદેશના ખેલાડીઓની આઉટ કરી મોટી ભાગદારી થતા અટકાવવા માંગશે. 

ટી બ્રેક

આજની બે સેશનની રમત સમાપ્ત થઈ ગઈ છે. ટી બ્રેક સુધી બાંગ્લાદેશે બીજી ઈનિંગમાં એકપણ વિકેટ ગુમાવ્યા વિના 13 ઓવરમાં 56 રન બનાવી લીધા છે. ઝાકિર હસન 5 ચોગ્ગા અને એક છગ્ગાની મદદથી 32 રન બનાવીને રમી રહ્યો છે. જ્યારે શાદમાન ઈસ્લામ બે ચોગ્ગાની મદદથી 21 રન બનાવીને રમી રહ્યો છે. બાંગ્લાદેશને જીતવા માટે હજુ વધુ 459 રન બનાવવાના છે. ભારતને કુલ 515 રનનો લક્ષ્યાંક આપ્યો છે.

હસન-ઈસ્લામે બાંગ્લાદેશને અપાવી શાનદાર શરૂઆત

બાંગ્લાદેશે બીજી ઈનિંગમાં શાનદાર શરૂઆત કરી છે. 10 ઓવર બાદ સ્કોર કોઈ પણ વિકેટ વિના 47 રન થઈ ગયો છે. ઝાકિર હસન 4 ચોગ્ગા અને એક છગ્ગાની મદદથી 27 રન પર છે. જ્યારે શાદમાન ઈસ્લામ બે ચોગ્ગાની મદદથી 19 રન પર છે. ભારતે બાંગ્લાદેશને 515 રનનો ટાર્ગેટ આપ્યો છે. ભારતીય બોલરો વિકેટની શોધમાં છે. 

બાંગ્લાદેશની ઈનિંગ શરૂ

બાંગ્લાદેશની ઈનિંગ શરૂ થઇ ગઇ છે. શાદમાન ઈસ્લામ અને ઝાકિર હસન ઓપનિંગ કરવા ક્રિઝ પર આવ્યા છે. જસપ્રીત બુમરાહ પ્રથમ ઓવર નાખી રહ્યો છે. 515 રનના લક્ષ્યનો પિછો કરવા ઉતરેલી બાંગ્લાદેશની ટીમે ચોગ્ગા સાથે ખાતું ખોલ્યું છે. 

ભારતે ઇનિંગ ડિક્લેર કરી

ભારતે તેનો બીજી ઈનિંગ 287/4ના સ્કોર પર જાહેર કરી છે. ટીમ ઈન્ડિયાએ પ્રથમ ઈનિંગમાં 376 રન બનાવ્યા હતા. બાંગ્લાદેશે તેની પ્રથમ ઇનિંગમાં 149 રન બનાવ્યા હતા. આ રીતે ભારતીય ટીમને 227 રનની લીડ મળી હતી. વર્તમાન સ્કોર સહિત ભારતની લીડ 514 રન છે અને બાંગ્લાદેશને 515 રનનો ટાર્ગેટ મળ્યો છે. ભારત તરફથી શુભમન ગિલ 176 બોલમાં 10 ચોગ્ગા અને 4 છગ્ગાની મદદથી 119 રન બનાવીને અણનમ રહ્યો હતો. જ્યારે કેએલ રાહુલ 22 રન બનાવીને અણનમ રહ્યો હતો.

રિષભ પંતે 109 રનની ઇનિંગ રમી હતી. પંત અને ગિલે ચોથી વિકેટ માટે 167 રનની ભાગીદારી કરી હતી. આ પહેલા યશસ્વી જયસ્વાલ (10), રોહિત શર્મા (5) અને વિરાટ કોહલી (17) શુક્રવારે જ આઉટ થયા હતા. ભારતે આજે 81/3ના સ્કોરથી રમવાની શરૂઆત કરી હતી અને 206 રન ઉમેર્યા બાદ ઈનિંગ ડિકલેર કરી હતી. આજની એકમાત્ર વિકેટ પંતના રૂપમાં પડી હતી. બાંગ્લાદેશ પાસે આ લક્ષ્યાંક હાંસલ કરવા માટે લગભગ અઢી દિવસનો સમય છે.

બાંગ્લાદેશ તરફથી મેહદી હસન મિરાજે 2 વિકેટ લીધી હતી. તસ્કીન અહેમદ અને નાહીદ રાણાને 1-1 વિકેટ મળી હતી.

શુભમન ગિલની સદી

પંત બાદ શુભમન ગીલે પણ સદી ફટકારી છે. તેણે પોતાના ટેસ્ટ કરિયરની પાંચમી સદી 161 બોલમાં ફટકારી હતી. ગિલે 9 ચોગ્ગા અને 3 છગ્ગા ફટકાર્યા છે. ગિલે પંત સાથે ચોથી વિકેટ માટે 167 રનની ભાગીદારી નોંધાવી હતી. હાલમાં કેએલ રાહુલ ગિલ સાથે ક્રિઝ પર છે. ભારતનો સ્કોર 4 વિકેટે 256 રન છે. ટીમ ઈન્ડિયાની લીડ 483 રન છે.

ભારત માટે વિકેટકિપર દ્વારા સૌથી વધુ ટેસ્ટ સદી

• 6 રિષભ પંત (58 ઇનિંગ્સ)
• 6 એમએસ ધોની (144 ઇનિંગ્સ)
• 3 રિદ્ધિમાન સાહા (54 ઇનિંગ્સ)

પંત આઉટ

રિષભ પંત જોરદાર સદી બાદ આઉટ થયો છે. તેણે 128 બોલનો સામનો કર્યો અને 109 રન બનાવ્યા. પંતની ઇનિંગ્સમાં 13 ફોર અને 4 સિક્સ સામેલ હતી. જોકે આ પછી તે પેવેલિયન પરત ફર્યો હતો. તેણે શુભમન ગિલ સાથે 167 રનની ભાગીદારી કરી હતી. ભારતે બીજી ઇનિંગમાં 234 રનના સ્કોર પર 4 વિકેટ ગુમાવી દીધી છે. ટીમ ઈન્ડિયાએ 461 રનની લીડ મેળવી લીધી છે. હવે કેએલ રાહુલ બેટિંગ કરવા આવ્યો છે. શુભમન ગિલ પણ સદીની નજીક પહોંચ્યો છે. 

રિષભ પંતની સદી

રિષભ પંતે પોતાના ટેસ્ટ કરિયરની છઠ્ઠી સદી 124 બોલમાં ફટકારી છે. આ તેની કમબેક ટેસ્ટ છે. ડિસેમ્બર 2022માં કાર અકસ્માતનો ભોગ બન્યા બાદ આ તેની પ્રથમ ટેસ્ટ છે અને તેમાં તેણે સદી ફટકારી છે. પંતે ધોનીની બરાબરી કરી લીધી છે. તે ધોનીની સાથે ટેસ્ટમાં સૌથી વધુ સદી ફટકારનાર ભારતીય વિકેટકીપર બેટ્સમેન બની ગયો છે. ભારતીય ડ્રેસિંગ રૂમમાં બધાએ તેને સ્ટેન્ડિંગ ઓવેશન આપ્યું. ભારતે ત્રણ વિકેટે 229 રન બનાવ્યા છે. ભારતની લીડ 450+ રન પર પહોંચી ગઈ છે.

પંત અને ગિલ વચ્ચે 150 રનની ભાગીદારી

રિષભ પંતે સિક્સ બાદ શાકિબના બોલ પર પેડલ સ્વીપની મદદથી ચોગ્ગો ફટકાર્યો હતો. આ સાથે તેણે ગિલ સાથે 150 રનની ભાગીદારી કરી છે. પંત 94ના વ્યક્તિગત સ્કોર પર છે. જ્યારે ગિલ 87 રન બનાવીને રમી રહ્યો છે.

બીજું સેશન શરૂ

લંચ પછીની રમત શરૂ થઈ ગઈ. લંચ સુધી ભારતે ત્રણ વિકેટે 205 રન બનાવ્યા હતા. હવે પંત અને ગિલ લીડ વધારવા માટે મેદાનમાં આવી ગયા છે. ભારતીય ટીમ આ સેશનમાં ઇનિંગ ડિકલેર કરી શકે છે. બાંગ્લાદેશ તરફથી મેહદી હસન મિરાજ બોલિંગ કરી રહ્યો છે.

રિષભ પંતનો મજબૂત રેકોર્ડ

રિષભ પંતનો અત્યાર સુધી ડાબા હાથના સ્પિનરો સામે સારો રેકોર્ડ રહ્યો છે. તેણે ટેસ્ટમાં લેફ્ટ આર્મ સ્પિનરોનો સામનો કરીને 384 રન બનાવ્યા છે. આ દરમિયાન 36 ફોર અને 24 સિક્સર ફટકારી હતી. બાંગ્લાદેશનો શાકિબ અલ હસન પણ લેફ્ટ આર્મ સ્પિનર ​​છે.

લંચ બ્રેક

ત્રીજા દિવસે લંચ સુધીમાં ભારતે તેના બીજી ઈનિંગમાં 3 વિકેટ ગુમાવીને 205 રન બનાવ્યા હતા. ભારતે પ્રથમ ઈનિંગના આધારે 227 રનની લીડ મેળવી હતી. આ સ્થિતિમાં કુલ લીડ 432 રનની છે. રિષભ પંત 82 અને શુભમન ગિલ 86 રન બનાવીને અણનમ છે. અત્યાર સુધી બંને વચ્ચે ચોથી વિકેટ માટે 138 રનની ભાગીદારી થઈ છે. આજે બંનેએ પ્રથમ સેશનમાં આક્રમક બેટિંગ કરી હતી. ભારતે પ્રથમ સેશનમાં 28 ઓવરમાં 124 રન ઉમેર્યા હતા. બંનેએ 4.43ના રન રેટથી રન બનાવ્યા હતા. ભારતે માત્ર 67 રનમાં ત્રણ વિકેટ ગુમાવી દીધી હતી. ત્યારથી આ બંનેએ શાનદાર બેટિંગ કરી છે. ભારતે આજે ત્રણ વિકેટે 81 રનથી રમવાનું શરૂ કર્યું હતું. શુક્રવારે યશસ્વી જયસ્વાલ 10 રન, રોહિત શર્મા 5 રન અને વિરાટ કોહલી 17 રન બનાવીને આઉટ થયા હતા.

ભારતનો સ્કોર 200ને પાર પહોંચ્યો

ભારતે 432 રનની લીડ મેળવી લીધી છે. બીજી ઇનિંગમાં ભારતે 51 ઓવરમાં 3 વિકેટ ગુમાવીને 205 રન બનાવ્યા હતા. શુભમન ગિલ 86 રન અને રિષભ પંત 82 રન સાથે રમી રહ્યા છે. આ બંને વચ્ચે 138 રનની ભાગીદારી થઇ છે.

રિષભ પંતને મળ્યું જીવનદાન

રિષભ પંતને એક જીવનદાન મળ્યું છે. શાકિબ અલ હસનની 49મી ઓવરના છેલ્લા બોલ પર રિષભ પંત મોટો શોટ મારવા ગયો અને બોલ હવામાં ગયો. શાકિબ અલ હસનના બોલ પર મોટો શોટ રમવાના પ્રયાસમાં રિષભ પંતે હવામાં બોલ માર્યો હતો. બાંગ્લાદેશના કેપ્ટન શાંતોએ આ કેચ ડ્રોપ કર્યો હતો અને પંતને જીવનદાન મળ્યું હતું. રિષભ પંત 72 રન તથા શુભમન ગિલ 85 રન બનાવીને રમી રહ્યાં છે. ભારતે 3 વિકેટ ગુમાવીને 193 રન બનાવી લીધા છે. 

પંત અને ગિલ વચ્ચે સદીની ભાગીદારી

શુભમન ગિલ અને રિષભ પંત વચ્ચે ચોથી વિકેટ માટે સદીની ભાગીદારી થઈ હતી. બંનેએ સવારથી જ સારી બેટિંગ કરી છે. હવે લંચ માટે થોડો સમય બાકી છે, આવી સ્થિતિમાં બંને ઈચ્છશે કે લંચ સુધી ભારત કોઈ વિકેટ ન ગુમાવે. ભારતે ત્રણ વિકેટે 171 રન બનાવ્યા છે. હાલમાં પંત 60 અને શુભમન 75 રન પર બેટિંગ કરી રહ્યા છે. ભારતની કુલ લીડ 400 રનથી વધુ થઇ ગઇ છે.

રિષભ પંતની ફિફ્ટી

શુભમન ગિલ બાદ રિષભ પંતે પણ અડધી સદી ફટકારી છે. પંત ડિસેમ્બર 2022 પછી પ્રથમ વખત ટેસ્ટ રમી રહ્યો છે અને તેમાં તેણે અડધી સદી ફટકારી છે. પંતે શાનદાર વાપસી કરી છે. ભારતે બાંગ્લાદેશ પર 380થી વધુ રનની લીડ મેળવી લીધી છે. ભારતનો સ્કોર હાલમાં 3 વિકેટે 150 રનથી વધુ થઈ ગયો છે. પંત 50 રન અને ગિલ 69 રન પર બેટિંગ કરી રહ્યા છે. 

ફિફ્ટીની નજીક પહોંચ્યો રિષભ પંત

ભારતે 42 ઓવરમાં 3 વિકેટ ગુમાવીને 148 રન બનાવ્યા છે. ટીમ ઈન્ડિયાની કુલ લીડ 375 રન થઈ ગઈ છે. ગિલ 64 રન અને રિષભ પંત 48 રન પર રમી રહ્યા છે. તે પોતાની અડધી સદીની નજીક છે.

ભારતે 366 રનની લીડ બનાવી

ભારતે 366 રનની લીડ મેળવી લીધી છે. ટીમ ઈન્ડિયાએ બીજી ઈનિંગમાં 38 ઓવરમાં 3 વિકેટ ગુમાવીને 129 રન બનાવી લીધા છે. શુભમન ગિલ 60 રન બનાવીને રમી રહ્યો છે. રિષભ પંત 45 રન બનાવીને ક્રિઝ પર છે. ભારતે કુલ 366 રનની લીડ મેળવી લીધી છે.

બાંગ્લાદેશી બોલરો વિકેટની શોધમાં છે. મેચના ત્રીજા દિવસે તે હજુ સુધી એક પણ વિકેટ લઈ શક્યા નથી.

ગિલ-પંતની જોરદાર બેટિંગ

ભારત માટે પંત અને ગિલ સારી બેટિંગ કરી રહ્યા છે. પંત 36 રન બનાવીને રમી રહ્યો છે. જ્યારે ગિલ 57 રન બનાવીને રમી રહ્યો છે. આ બન્ને વચ્ચે 62 રનની ભાગીદારી થઇ ચુકી છે. ગિલ-પંત લયમાં નજર આવી રહ્યા છે. ટીમ ઈન્ડિયાએ 36 ઓવરમાં 3 વિકેટ ગુમાવીને 129 રન બનાવી લીધા છે. ટીમ ઈન્ડિયાએ 356 રનની લીડ બનાવી લીધી છે. 

પંત-ગિલ વચ્ચે અડધી સદીની ભાગીદારી

ભારતે 34 ઓવરમાં 3 વિકેટ ગુમાવીને 121 રન બનાવ્યા હતા. ટીમ ઈન્ડિયાની કુલ લીડ 348 રન થઈ ગઈ છે. શુભમન ગિલ 56 રન બનાવીને રમી રહ્યો છે. રિષભ પંત 29 રન બનાવીને રમી રહ્યો છે. તેણે 54 બોલમાં 3 ફોર અને 1 સિક્સર ફટકારી છે. આ બંને વચ્ચે અડધી સદીની ભાગીદારી રહી છે.

ગિલની શાનદાર ફિફ્ટી

શુભમન ગિલે તેની ટેસ્ટ કારકિર્દીની છઠ્ઠી અડધી સદી 79 બોલમાં ફટકારી હતી. તેણે મેહદી હસન મિરાજની બોલ પર સિક્સર ફટકારીને પોતાની અડધી સદી પૂરી કરી હતી. ભારતે ત્રણ વિકેટે 116 રન બનાવ્યા છે. પંત અને ગિલ વચ્ચે 40+ રનની ભાગીદારી પણ થઈ છે. ભારતની લીડ હવે 340+ રનની છે.

ભારતે 100નો આંકડો પાર કર્યો

ત્રીજા દિવસની રમતને લગભગ અડધો કલાક થયો છે અને રિષભ પંત અને શુભમન ગીલે પોતાના પગ જમાવી લીધા છે. બંને બેટ્સમેન હવે ઝડપથી રન બનાવવા માટે તૈયાર છે. પંતે અત્યાર સુધીમાં બે ચોગ્ગા ફટકાર્યા છે, જ્યારે ગિલે બે છગ્ગા ફટકાર્યા છે.

ભારતે 26 ઓવરમાં 90 રન બનાવ્યા

ટીમ ઈન્ડિયાએ બીજી ઈનિંગમાં 26 ઓવરમાં 3 વિકેટ ગુમાવીને 90 રન બનાવી લીધા છે. ભારતની કુલ લીડ 317 રન થઈ ગઈ છે. શુભમન ગિલ 35 રન બનાવીને રમી રહ્યો છે. રિષભ પંત 19 રન બનાવીને રમી રહ્યો છે. આ બંને વચ્ચે 23 રનની ભાગીદારી છે.

ત્રીજા દિવસની રમત શરૂ

ત્રીજા દિવસની રમત શરૂ થઈ ગઈ છે. ઋષભ પંત અને શુભમન ગિલ ક્રિઝ પર છે. બાંગ્લાદેશે દિવસની પ્રથમ ઓવર મેહદી હસન મિરાજને સોંપી હતી. ભારતીય ટીમ 400થી આગળની લીડ લેવા પર નજર રાખી રહી છે. ચેન્નાઈમાં રાતભર વરસાદ પડ્યો છે અને હાલમાં વાદળછાયા વાતાવરણ છે. હવે જોવાનું એ રહે છે કે બાંગ્લાદેશી બોલરો આનો કેટલો ફાયદો ઉઠાવી શકશે. 

ચેપોકમાં નવો રેકોર્ડ બન્યો

ચેપોકમાં એક નવો રેકોર્ડ પણ બન્યો છે. શુક્રવારે આ મેદાન પર 17 વિકેટ પડી હતી. આ મેદાન પર ટેસ્ટમાં એક દિવસમાં સૌથી વધુ વિકેટ પડવાનો રેકોર્ડ છે. આ પહેલા 1979માં ભારત અને વેસ્ટ ઈન્ડિઝ વચ્ચે ટેસ્ટના ત્રીજા દિવસે 15 વિકેટ પડી હતી. વર્ષ 2021માં ભારત અને ઇંગ્લેન્ડ વચ્ચેની ટેસ્ટમાં બે દિવસમાં 15-15 વિકેટ પડી હતી. આ ટેસ્ટના બીજા અને ચોથા દિવસે ચાર-ચાર વિકેટ પડી હતી. ભારત અને બાંગ્લાદેશ વચ્ચેની ટેસ્ટમાં બીજા દિવસે 17 વિકેટ પડી હતી અને કુલ 267 રન થયા હતા.

ભારતનો બીજો દિવસ

બીજા દિવસની રમતના અંત સુધીમાં ભારતે તેની બીજી ઇનિંગમાં ત્રણ વિકેટ ગુમાવીને 81 રન બનાવ્યા હતા. ભારતે પ્રથમ ઈનિંગમાં 376 રન બનાવ્યા હતા. આ સાથે જ બાંગ્લાદેશનો પ્રથમ ઈનિંગ 149 રનમાં સમેટાઈ ગઈ હતી અને રોહિત એન્ડ કંપનીને 227 રનની લીડ મળી હતી. હવે ભારતની કુલ લીડ 308 રન છે. શુભમન ગિલ 33 રન અને રિષભ પંત 12 રન બનાવીને અણનમ છે. ભારતને બીજી ઇનિંગમાં રોહિત શર્મા (5), યશસ્વી જયસ્વાલ (10) અને વિરાટ કોહલી (17)ના રૂપમાં ત્રણ ઝટકા પડ્યા હતા. રોહિત અને વિરાટ સતત બીજી ઈનિંગમાં નિષ્ફળ રહ્યા હતા. વિરાટ અને રોહિતે પ્રથમ દાવમાં 6-6 રન બનાવ્યા હતા.

ચેન્નઈમાં વરસાદ

ચેન્નાઈમાં રાતભર વરસાદ પડ્યો હતો અને સવારે પણ ત્યાં વરસાદ પડ્યો હતો. પિચ અને આઉટફિલ્ડ આવરી લેવામાં આવ્યા હતા, પરંતુ ગ્રાઉન્ડસમેને તે દૂર કરી દીધા છે. ચેપોકમાં ઉત્તમ ડ્રેનેજ સિસ્ટમ છે. ખેલાડીઓ પણ વોર્મઅપ કરતા જોવા મળે છે. બાંગ્લાદેશી સીમર્સને આ સ્થિતિમાં બોલિંગ કરવામાં કોઈ વાંધો નહીં હોય.

પ્રથમ ઈનિંગમાં ફ્લોપ રહ્યો કેએલ રાહુલ

ભારતીય ટીમનો અનુભવી બેટ્સમેન કેએલ રાહુલ પણ બાંગ્લાદેશ સામે પ્રથમ દાવમાં ફ્લોપ રહ્યો હતો. તે માત્ર 16 રન બનાવીને આઉટ થયો હતો. તેને આ મેચમાં સરફરાઝ ખાન પર તક આપવામાં આવી છે. જો કે બીજી ઇનિંગમાં પણ રાહુલનું બેટ શાંત રહ્યું. તેથી શક્ય છે કે આગામી ટેસ્ટમાં સરફરાઝને તેના સ્થાને તક આપવામાં આવે.

મોટું લક્ષ્ય સેટ કરવા માંગશે ભારત 

ભારતીય ક્રિકેટ ટીમ પાસે હાલમાં 308 રનની લીડ છે. આજે ટીમ ઈન્ડિયા તેને મોટી બનાવવા માંગે છે અને બાંગ્લાદેશને આ રમતમાંથી સંપૂર્ણપણે દૂર કરવા માંગે છે. રોહિત સેના આજે આખો દિવસ બેટિંગ કરીને સૌથી મોટો લક્ષ્યાંક નક્કી કરી શકે છે.

ભારત પાસે 308 રનની લીડ

બીજા દિવસની રમતના અંતે ભારતીય ક્રિકેટ ટીમે 3 વિકેટના નુકસાન પર 81 રન બનાવી લીધા હતા. શુભમન ગિલ હાલમાં 33 રન અને રિષભ પંત 12 રન પર રમી રહ્યા છે. ટીમ ઈન્ડિયા પાસે હાલમાં 308 રનની લીડ છે.

ચેન્નાઈ ટેસ્ટના પ્રથમ દાવમાં ચમક્યો બુમરાહ 

ભારતીય ક્રિકેટ ટીમના ફાસ્ટ બોલર જસપ્રિત બુમરાહે બાંગ્લાદેશ સામેની પ્રથમ ઇનિંગમાં શાનદાર પ્રદર્શન કર્યું હતું. તેણે સૌથી વધુ 4 વિકેટ લીધી હતી. તેણે શાદમાન ઈસ્લામ, મુશફિકુર રહીમ, હસન મહમૂદ અને તસ્કીન અહેમદને આઉટ કર્યા.

ભારતે બીજા દાવમાં 3 વિકેટ ગુમાવી

ભારતીય ટીમની બીજી ઇનિંગમાં અત્યાર સુધીમાં કુલ 3 વિકેટ પડી છે. કેપ્ટન રોહિત શર્મા 5 રન બનાવીને આઉટ થયો છે અને વિરાટ કોહલી 17 રન બનાવીને આઉટ થયો છે. પ્રથમ દાવમાં અડધી સદી ફટકારનાર યશસ્વી જયસ્વાલ પણ 10 રન બનાવીને આઉટ થયો હતો.

ત્રીજા દિવસે હવામાન કેવું રહેશે?

ભારત અને બાંગ્લાદેશ વચ્ચે ચેન્નાઈ ટેસ્ટ પહેલા વરસાદની સંભાવના હતી. એવું લાગી રહ્યું હતું કે મેચમાં વરસાદ વિલનની ભૂમિકા ભજવશે. પરંતુ હજુ સુધી બે દિવસની રમતમાં વરસાદના કોઈ સંકેત નથી. ચેન્નાઈમાં વાદળછાયું વાતાવરણ ચોક્કસપણે જોવા મળ્યું હતું. પરંતુ વરસાદ પડ્યો ન હતો. ત્રીજા દિવસે વરસાદની શક્યતા ઘણી ઓછી છે. 25 ટકા વરસાદ થવાનો અંદાજ છે.

બાંગ્લાદેશની પ્લેઈંગ ઈલેવન

શાદમાન ઈસ્લામ, ઝાકિર હસન, નઝમુલ હુસેન શાંતો (કેપ્ટન), મોમિનુલ હક, મુશફિકુર રહીમ, શાકિબ અલ હસન, લિટન દાસ (વિકેટકીપર), મેહિદી હસન મિરાજ, તસ્કીન અહેમદ, હસન મહમૂદ, નાહીદ રાણા.

ભારતની પ્લેઈંગ ઈલેવન

રોહિત શર્મા (કેપ્ટન), યશસ્વી જયસ્વાલ, શુભમન ગિલ, વિરાટ કોહલી, કેએલ રાહુલ, રિષભ પંત (વિકેટકીપર), રવિન્દ્ર જાડેજા, રવિચંદ્રન અશ્વિન, જસપ્રિત બુમરાહ, આકાશ દીપ, મોહમ્મદ સિરાજ.