- ભારત અને શ્રીલંકા વચ્ચે 3 મેચની વનડે સિરીઝ રમાઈ રહી છે
- સિરીઝમાં ટીમ ઈન્ડિયાનું નિરાશાજનક પ્રદર્શન ચાલુ છે
- શ્રીલંકાએ સિરીઝમાં 1-0ની અજેય સરસાઈ મેળવી લીધી હતી
ભારત અને શ્રીલંકા વચ્ચે રમાઈ રહેલી ODI ક્રિકેટ સિરીઝમાં ટીમ ઈન્ડિયાનું નિરાશાજનક પ્રદર્શન ચાલુ છે. યજમાન શ્રીલંકાની ટીમે બીજી મેચમાં પણ ટીમ ઈન્ડિયાને 241 રનના ટાર્ગેટને ચેઝ કરવા દીધો ન હતો. પ્રથમ મેચમાં ટીમ ઈન્ડિયા જીત તરફ આગળ વધી રહી હતી ત્યારે યજમાન ટીમે શાનદાર બોલિંગ કરીને મેચને ટાઈ કરી હતી.
આ પછી બીજી મેચમાં પણ યજમાન ટીમે ભારતીય ટીમને 208 રનમાં ઓલઆઉટ કરી દીધી. શ્રીલંકાએ આ મેચ 32 રને જીતી લીધી હતી અને સિરીઝમાં 1-0ની અજેય સરસાઈ મેળવી લીધી હતી. રોહિત શર્માની આગેવાની હેઠળની ટીમ ઈન્ડિયા દ્વારા કઈ 3 મોટી ભૂલો થઈ છે, જેને ટીમે છેલ્લી મેચમાં સુધારવી પડશે.
ડિફેન્સિવ બેટિંગ
શ્રીલંકાના સ્પિન બોલરોનો બોલ પિચ પર ટર્ન થઈ રહ્યો છે. ટીમ ઈન્ડિયાએ શ્રીલંકા સામેની T20 ક્રિકેટ સિરીઝમાં આક્રમક વ્યૂહરચના અપનાવી હતી અને શ્રીલંકા સામેની મેચમાં પણ ટીમનો દબદબો રહ્યો હતો. પરંતુ, ODI ક્રિકેટ સિરીઝમાં ટીમ ઈન્ડિયા વધુ પડતી ડિફેન્સિવ રીતે રમી રહી હોય તેવું લાગી રહ્યું છે. કેપ્ટન રોહિત શર્મા સિવાય તમામ બેટ્સમેનો આક્રમક બેટિંગને બદલે ડિફેન્સિવ રીતે રમી રહ્યા છે. જેના કારણે મેચમાં શ્રીલંકાના બોલરોનો દબદબો છે. જેના કારણે બીજી વન-ડે મેચમાં શ્રીલંકાના બોલરોએ LBW દ્વારા ભારતની 5 વિકેટ ઝડપી હતી.
સ્પિન બોલર
કોલંબોની પિચ પર સ્પિન બોલરોને સતત વધારાની મદદ મળી રહી છે. જેના કારણે શ્રીલંકા 5 સ્પિન બોલરો સાથે મેદાનમાં ઉતરી રહ્યું છે. પરંતુ ભારતીય ટીમ સ્પિન બોલિંગ પર ભરોસો કરી રહી નથી અને પોતાની પરંપરાગત બોલિંગ લાઈન સાથે રમી રહી છે. ટીમ બેન્ચ પર રિયાન પરાગ જેવો સ્પિન બોલિંગ ખેલાડી છે, જેણે T20 સિરીઝમાં પણ સારી બોલિંગ કરી હતી, પરંતુ તેની જગ્યાએ શિવમ દુબેને ટીમમાં તક આપવામાં આવી રહી છે. જ્યારે શિવમ દુબે અત્યાર સુધીની સિરીઝમાં સંપૂર્ણ નિષ્ફળ સાબિત થયો છે.
બોલિંગમાં સુધારો
બીજી વન-ડેમાં એક સમય એવો હતો જ્યારે ભારતે યજમાન શ્રીલંકાને 35 ઓવરમાં 136 રન પર રોકી દીધું હતું. બોલરોએ 6 વિકેટ પણ લીધી હતી. પરંતુ આ પછી શ્રીલંકાના લોઅર ઓર્ડર બેટ્સમેનોએ ટીમનો સ્કોર 240 રન સુધી પહોંચાડ્યો હતો. પહેલી મેચમાં પણ આવું જ થયું હતું, જ્યારે યજમાન ટીમે 142 રનમાં 6 વિકેટ ગુમાવીને પણ 230 રન બનાવ્યા હતા. ભારતીય બોલરોએ શ્રીલંકાના નીચલા ક્રમના બેટ્સમેનોને કોઈપણ ભોગે રન બનાવતા અટકાવવા જોઈએ, જેથી શ્રીલંકાને નાના સ્કોર સુધી સીમિત કરી શકાય.
