આ દિવસે T20 વર્લ્ડકપ માટે ભારતીય ટીમની થશે જાહેરાત, વિરાટને મળશે તક!

• T20 વર્લ્ડકપ 2024ની શરૂઆત 1 જુનથી થશે
  
• અમેરિકા અને વેસ્ટ ઈન્ડિઝ દ્વારા સંયુક્ત રીતે રમાશે
• ટીમની જાહેરાત એપ્રિલના અંતિમ સપ્તાહમાં થઈ શકે

IPL 2024 પછી T20 વર્લ્ડકપ 2024 શરૂ થશે. આ વખતે ટૂર્નામેન્ટ અમેરિકા અને વેસ્ટ ઈન્ડિઝ દ્વારા સંયુક્ત રીતે રમાશે અને તેમાં 20 ટીમો ભાગ લેશે. ટુર્નામેન્ટ માટે 15 સભ્યોની ભારતીય ટીમની જાહેરાત એપ્રિલના અંતિમ સપ્તાહમાં થઈ શકે છે. ICCએ સબમિશન માટેની કટ ઓફ ડેટ 1 મે રાખી છે. બીસીસીઆઈના એક સૂત્રએ આ જાણકારી આપી છે.

25 મે સુધી કરી શકાશે ફેરફાર

ટૂર્નામેન્ટમાં ભાગ લેનારી તમામ ટીમો 25 મે સુધી પોતાની પ્રારંભિક ટીમમાં ફેરફાર કરી શકે છે.એક અહેવાલ મુજબ, “ભારતીય ટીમની પસંદગી એપ્રિલના અંતિમ સપ્તાહ દરમિયાન કરવામાં આવશે, તે સમય સુધીમાં IPLનો પ્રથમ ભાગ સમાપ્ત થઈ જશે અને રાષ્ટ્રીય પસંદગી સમિતિ ટીમના ફોર્મ અને ફિટનેસનું મૂલ્યાંકન કરવાની સ્થિતિમાં હશે."

કેટલાક ખેલાડીઓ 19 મેના રોજ રવાના થશે

રિપોર્ટ અનુસાર, 'આઈપીએલમાં લીગ સ્ટેજની મેચો પૂરી થયા બાદ ક્રિકેટરોની પ્રથમ બેચ 19 મેના રોજ ન્યૂયોર્ક માટે રવાના થશે. જે ખેલાડીઓની ટીમો ફાઈનલ 4 માટે ક્વોલિફાય કરવામાં અસમર્થ છે તેઓ વહેલા જશે. ગયા વર્ષે વર્લ્ડ ટેસ્ટ ચેમ્પિયનશિપની ફાઇનલમાં પણ આવું જ થયું હતું. યુનાઇટેડ સ્ટેટ્સ અને વેસ્ટ ઇન્ડિઝમાં યોજાનારી ટુર્નામેન્ટ માટે કેટલાક ખેલાડીઓ સ્ટેન્ડ-બાય પર રહેશે.

વિરાટ કોહલીને મળી શકે છે તક

વિરાટ કોહલીને T20 વર્લ્ડકપ 2024 માટે ભારતીય ટીમમાં જગ્યા મળી શકે છે. IPL 2024માં વિરાટ બેટ સાથે ખૂબ જ સારો દેખાઈ રહ્યો છે. તેણે 3 માંથી 2 મેચમાં ફિફ્ટી ફટકારી છે. વિરાટ T20 ઈન્ટરનેશનલમાં સૌથી વધુ રન બનાવનાર બેટ્સમેન પણ છે. તેણે 117 મેચની 109 ઇનિંગ્સમાં 4037 રન બનાવ્યા છે. આ દરમિયાન તેણે 37 ફિફ્ટી અને 1 સદી ફટકારી છે. કોહલી T20 વર્લ્ડકપમાં સૌથી વધુ રન (1141) બનાવનાર બેટ્સમેન પણ છે.