ભારત અને ઓસ્ટ્રેલિયા વચ્ચે પ્રથમ ટેસ્ટ મેચ પર્થમાં રમાઈ હતી. ટીમ ઈન્ડિયાએ આ મેચ 295 રને જીતી લીધી હતી. આ જીત સાથે ટીમ ઈન્ડિયાએ સિરીઝમાં 1-0ની લીડ મેળવી લીધી છે. પર્થમાં આ જીત બાદ ટીમ ઈન્ડિયાને વર્લ્ડ ટેસ્ટ ચેમ્પિયનશિપના અંતિમ પોઈન્ટ ટેબલમાં મોટો ફાયદો થયો છે. આ મેચમાં હાર બાદ યજમાન ઓસ્ટ્રેલિયાને મોટું નુકસાન થયું છે.
પ્રથમ નંબરે પહોંચી ટીમ ઈન્ડિયા
ઓસ્ટ્રેલિયાને હરાવીને ટીમ ઈન્ડિયા ફરી એકવાર ICC વર્લ્ડ ટેસ્ટ ચેમ્પિયનશિપના અંતિમ પોઈન્ટ ટેબલમાં પ્રથમ સ્થાને પહોંચી ગઈ છે. આ પહેલા ટીમ ઈન્ડિયાને ન્યૂઝીલેન્ડ દ્વારા ઘરઆંગણે ટેસ્ટ સિરીઝમાં હારનો સામનો કરવો પડ્યો હતો. જેના કારણે ટીમ ઈન્ડિયા WTC ફાઈનલ પોઈન્ટ ટેબલમાં બીજા સ્થાને સરકી ગઈ હતી. આ સિવાય ભારતની હાર બાદ ઓસ્ટ્રેલિયા પહેલા નંબર પર આવી ગયું હતું પરંતુ હવે ફરી કાંગારૂ ટીમ બીજા સ્થાને સરકી ગઈ છે.
https://twitter.com/mufaddal_vohra/status/1860955923415519324
પર્થ ટેસ્ટ બાદ ટીમ ઈન્ડિયાની જીતની ટકાવારી વધીને 61.11 ટકા થઈ ગઈ છે. જેના કારણે ટીમ ઈન્ડિયા નંબર-1 પોઝીશન પર પહોંચી ગઈ છે. આ સિવાય ઓસ્ટ્રેલિયાની જીતની ટકાવારી 57.59 રહી છે. બાકીની ટીમો હજુ પણ પોતપોતાના સ્થાને જ છે. શ્રીલંકા 55.56 ટકા જીતની ટકાવારી સાથે ત્રીજા નંબરે, ન્યુઝીલેન્ડ 54.55 ટકા જીતની ટકાવારી સાથે ચોથા ક્રમે યથાવત છે. આ સિવાય દક્ષિણ આફ્રિકાની ટીમ નંબર-5 પર છે.
ભારતે સિરીઝમાં 1-0થી લીડ મેળવી
ટીમ ઈન્ડિયાએ પર્થ ટેસ્ટની પ્રથમ ઈનિંગમાં 150 રન બનાવ્યા હતા. જે બાદ ઓસ્ટ્રેલિયાનો પ્રથમ દાવ માત્ર 104 રનમાં ઓલઆઉટ થઈ ગયો હતો. આ પછી ટીમ ઈન્ડિયાએ બીજી ઈનિંગમાં 487 રન બનાવ્યા હતા. ભારત તરફથી બીજી ઇનિંગમાં બેટિંગ કરતા યશસ્વી જયસ્વાલે 161 રન, વિરાટ કોહલીએ 100 રન અને કેએલ રાહુલે 77 રન બનાવ્યા હતા. જે બાદ ઓસ્ટ્રેલિયાની ટીમ બીજા દાવમાં 238 રનમાં ઓલઆઉટ થઈ ગઈ હતી. હવે ટીમ ઈન્ડિયા સિરીઝમાં 1-0થી આગળ છે.