300 વિકેટ 3000 રન... કાનપુર ટેસ્ટમાં રવીન્દ્ર જાડેજાએ રચ્યો ઈતિહાસ

ભારત અને બાંગ્લાદેશ વચ્ચે બે મેચની ટેસ્ટ સિરીઝની છેલ્લી અને બીજી મેચ કાનપુરના ગ્રીન પાર્ક સ્ટેડિયમમાં રમાઈ રહી છે. ખરાબ આઉટફિલ્ડને કારણે બે દિવસ સુધી કોઈ રમત થઈ ન હતી. જે બાદ આજે ચોથા દિવસની રમત ચાલુ છે. બાંગ્લાદેશની ટીમ કાનપુર ટેસ્ટના પ્રથમ દાવમાં ચોથા દિવસે 233 રનમાં ઓલઆઉટ ગઈ હતી. રવીન્દ્ર જાડેજાએ બાંગ્લાદેશને પ્રથમ દાવમાં છેલ્લો ઝટકો આપ્યો હતો. આ સાથે જાડેજાએ ઈતિહાસ રચ્યો છે. જાડેજા આવું કરનાર એશિયાનો પ્રથમ બોલર બની ગયો છે.

જાડેજાએ રચ્યો ઈતિહાસ

રવીન્દ્ર જાડેજા પ્રથમ દાવમાં માત્ર એક જ વિકેટ લેવામાં સફળ રહ્યો હતો. આ એક વિકેટ લઈને જાડેજાએ ટેસ્ટ ક્રિકેટમાં પોતાની 300 વિકેટ પણ પૂરી કરી લીધી છે. જાડેજા હવે ટેસ્ટ ક્રિકેટમાં સૌથી ઝડપી 300 વિકેટ અને 3000 રન બનાવનાર એશિયન ખેલાડી બની ગયો છે. આ સિવાય જાડેજા વિશ્વનો બીજો ખેલાડી બની ગયો છે. જાડેજા ટેસ્ટ ક્રિકેટમાં 300 વિકેટ લેનારો ભારતનો સાતમો બોલર બની ગયો છે.

બાંગ્લાદેશ 233 રનમાં ઓલઆઉટ

કાનપુર ટેસ્ટ મેચના ચોથા દિવસે બાંગ્લાદેશની ટીમ પ્રથમ દાવમાં 233 રનમાં ઓલઆઉટ થઈ ગઈ હતી. બાંગ્લાદેશ તરફથી બેટિંગ કરતા મોમિનુલ હકે શાનદાર સદી ફટકારી હતી અને તેના બેટમાંથી 107 રન ફટકાર્યા હતા. આ સિવાય કેપ્ટન નઝમુલ હુસૈન શાંતોએ 31 રનની ઈનિંગ રમી હતી. ભારતીય ટીમ તરફથી શાનદાર બોલિંગ જોવા મળી હતી.

જ્યાં પ્રથમ દિવસે આકાશ દીપે 2 અને આર અશ્વિને એક વિકેટ ઝડપી હતી. તો ચોથા દિવસે જસપ્રીત બુમરાહે 3 વિકેટ ઝડપી હતી. આ સિવાય મોહમ્મદ સિરાજે 2, અશ્વિને એક વિકેટ અને જાડેજાએ પણ એક વિકેટ ઝડપી હતી.

ભારત માટે બુમરાહ-સિરાજનું જોરદાર પ્રદર્શન

બુમરાહે ભારત માટે જોરદાર બોલિંગ કરી હતી. તેને 18 ઓવરમાં 50 રન આપીને 3 વિકેટ લીધી હતી. આ દરમિયાન 7 મેડન ઓવર પણ નાખવામાં આવી હતી. મોહમ્મદ સિરાજે 17 ઓવરમાં 57 રન આપીને 2 વિકેટ લીધી હતી. તેને 2 મેડન ઓવર પણ લીધી હતી. રવિચંદ્રન અશ્વિને 15 ઓવરમાં 45 રન આપીને 2 વિકેટ લીધી હતી. આકાશ દીપે 15 ઓવરમાં 43 રન આપીને 2 વિકેટ ઝડપી હતી. રવિન્દ્ર જાડેજાને પણ એક વિકેટ મળી હતી. તેને 9.2 ઓવરમાં 28 રન આપ્યા હતા.