વરસાદના કારણે પ્રથમ દિવસની રમત સમાપ્ત
કાનપુરમાં ભારે વરસાદને કારણે અમ્પાયરે પ્રથમ દિવસની રમત વહેલી સમાપ્ત કરવાની જાહેરાત કરી છે. મોડી રાત્રે ભારે વરસાદને કારણે આજે રમત શરૂ થવામાં પણ એક કલાક મોડી પડી હતી. ટોસ સવારે 9 વાગ્યાના બદલે સવારે 10 વાગ્યે થયો હતો. તે જ સમયે, મેચ સવારે 9:30 ના બદલે 10:30 વાગ્યે શરૂ થઈ હતી. ભારતીય કેપ્ટન રોહિત શર્માએ ટોસ જીતીને પ્રથમ બોલિંગ કરવાનો નિર્ણય કર્યો હતો. ભારતીય પ્લેઈંગ-11માં કોઈ ફેરફાર થયો નથી, જ્યારે બાંગ્લાદેશના કેપ્ટન નઝમુલ હુસેન શાંતોએ બે ફેરફાર કર્યા છે. નાહિદ રાણા અને તસ્કીન અહેમદ આ મેચ નથી રમી રહ્યા. તેમના સ્થાને ખલીહ અહેમદ અને તૈજુલ ઈસ્લામને પ્લેઈંગ-11માં સામેલ કરવામાં આવ્યા છે.
ઝાકિર હસન અને શાદમાન ઈસ્લામે ટીમને સારી શરૂઆત અપાવવાનો પ્રયાસ કર્યો હતો. જો કે, ઝાકિર ઘણા બધા ડોટ બોલ રમવાના કારણે દબાણમાં આવી ગયો હતો અને આ દબાણમાં તેણે પોતાની વિકેટ ગુમાવી દીધી હતી. ઝાકીરને આકાશ દીપે યશસ્વી જયસ્વાલના હાથે કેચ કરાવ્યો હતો. તે 24 બોલમાં ખાતું ખોલાવ્યા વગર જ પેવેલિયન પરત ફર્યો હતો. આ પછી આકાશ દિપે શાનદાર બેટિંગ કરી રહેલા શાદમાન ઈસ્લામને એલબીડબ્લ્યુ આઉટ કર્યો હતો. તે 36 બોલમાં 24 રન બનાવીને આઉટ થયો હતો. તેણે પોતાની ઇનિંગમાં ચાર ચોગ્ગા ફટકાર્યા હતા. ત્યારબાદ મોમિનુલ હકે કેપ્ટન શાંતો સાથે મળીને ત્રીજી વિકેટ માટે 51 રનની ભાગીદારી કરી હતી. અશ્વિને આ ભાગીદારી તોડી હતી. તેણે શાંતોને LBW આઉટ કર્યો. તે 57 બોલમાં છ ચોગ્ગાની મદદથી 31 રન બનાવી શક્યો હતો. આ પછી, મોમિનુલ અને મુશફિકુર રહીમ વચ્ચે ચોથી વિકેટ માટે 27 રનની ભાગીદારી છે. મોમિનુલ 40 રન અને રહીમ છ રન બનાવીને અણનમ છે. આકાશને બે અને અશ્વિનને એક વિકેટ મળી હતી.
