- IPL 2024માં અત્યાર સુધીમાં 9 મેચ રમાઈ છે
- હોમ ગ્રાઉન્ડ પર તમામ ટીમોનું શાનદાર પ્રદર્શન
- આ સિઝનમાં અનકેપ્ડ ખેલાડીઓનો દબદબો
IPL 2024માં અત્યાર સુધીમાં 9 મેચ રમાઈ છે. આજે 10મી મેચમાં રોયલ ચેલેન્જર્સ બેંગ્લોરનો સામનો કોલકાતા નાઈટ રાઈડર્સ સામે થશે. ટુર્નામેન્ટમાં અત્યાર સુધી હોમ ગ્રાઉન્ડ પર રમી રહેલી ટીમોનું પ્રદર્શન જોવા મળ્યું છે. હોમ ટીમે તમામ 9 મેચ જીતી છે. ટૂર્નામેન્ટમાં અત્યાર સુધીના ઘણા યુવા ભારતીય બેટ્સમેનો તેમના પ્રદર્શનથી છાપ છોડવામાં સફળ રહ્યા છે. આવી સ્થિતિમાં આ ખેલાડીઓએ ટીમ ઈન્ડિયામાં ડેબ્યૂ કરવાનો દાવો ઠોક્યો છે. જેમાં અનુજ રાવત, અભિષેક પોરેલ, રમનદીપ સિંહ, રિયાન પરાગ, સમીર રિઝવી, હર્ષિત રાણા અને અભિષેક શર્માનો સમાવેશ થાય છે. આ બધા અનકેપ્ડ ખેલાડીઓ છે.
અનુજ રાવત (RCB)
IPL 2024ની પ્રથમ મેચમાં રોયલ ચેલેન્જર્સ બેંગ્લોરના વિકેટકીપર બેટ્સમેન અનુજ રાવતે ચેન્નાઈ સુપર કિંગ્સ સામે 25 બોલમાં 48 રનની તોફાની ઇનિંગ રમી હતી. આ દરમિયાન યુવા બેટ્સમેને 4 ફોર અને 3 સિકસ ફટકારી હતી. તે છેલ્લા બોલ પર રન આઉટ થયો હતો. તેણે દિનેશ કાર્તિક સાથે મહત્વની ભાગીદારી કરી હતી, જો કે આ મેચમાં RCBને હારનો સામનો કરવો પડ્યો હતો.
અભિષેક પોરેલ (DC)
IPL 2024ની બીજી મેચમાં, દિલ્હી કેપિટલ્સના યુવા બેટ્સમેન અભિષેક પોરેલે 320ના સ્ટ્રાઈક રેટથી 10 બોલમાં અણનમ 32 રન બનાવ્યા હતા. આ દરમિયાન તેના બેટમાંથી 4 ફોર અને 2 સિકસ ફટકાર્યા હતા. અભિષેક વિકેટકીપિંગમાં પણ સક્ષમ છે. બીજી તરફ ભારતીય ટીમ લાંબા સમયથી યુવા વિકેટકીપર બેટ્સમેનની શોધમાં છે.
રમનદીપ સિંહ (KKR)
લીગની ત્રીજી મેચમાં કોલકાતા નાઈટ રાઈડર્સના મિડલ ઓર્ડર બેટ્સમેન રમનદીપ સિંહે 17 બોલમાં 35 રન બનાવ્યા હતા. આ દરમિયાન તેણે 1 ફોર ઉપરાંત 4 સિક્સર પણ ફટકારી હતી.
રિયાન પરાગ (RR)
રાજસ્થાન રોયલ્સના યુવા બેટ્સમેન રિયાન પરાગ આ સિઝનમાં અલગ જ રંગમાં જોવા મળી રહ્યો છે. ટીમ મેનેજમેન્ટે તેને બેટિંગમાં નંબર 4 પર પ્રમોટ કર્યો અને તેણે પ્રભુત્વ જમાવ્યું. રિયાને લખનૌ સુપર જાયન્ટ્સ સામે 29 બોલમાં 43 રન બનાવ્યા હતા. દિલ્હી કેપિટલ્સ સામેની છેલ્લી મેચમાં રિયાન પરાગે 45 બોલમાં 84 રનની અણનમ ઇનિંગ રમી હતી.
અભિષેક શર્મા (SRH)
સનરાઈઝર્સ હૈદરાબાદ અને મુંબઈ ઈન્ડિયન્સ વચ્ચેની મેચમાં રનનું પૂર આવ્યું હતું. SRHએ ઈતિહાસ રચ્યો અને 20 ઓવરમાં 3 વિકેટ ગુમાવીને 277 રન બનાવ્યા. યુવા અભિષેક શર્માએ 23 બોલમાં 63 રનની શાનદાર ઇનિંગ રમી હતી. આ દરમિયાન તેણે 3 ફોરની સાથે 7 સિક્સર ફટકારી હતી.
સમીર રિઝવી (CSK)
ગુજરાત ટાઇટન્સ સામેની મેચમાં ચેન્નાઇ સુપર કિંગ્સના સમીર રિઝવીનો કેમિયો જોવા મળ્યો હતો. તેણે 6 બોલમાં 14 રન બનાવ્યા હતા. સમીરે રાશિદ ખાનના બોલ પર 2 સિક્સર ફટકારી હતી.
હર્ષિત રાણા (KKR)
બોલિંગની સાથે હર્ષિત રાણા નીચલા ક્રમમાં ઝડપી રન બનાવવામાં પણ સક્ષમ છે. સનરાઇઝર્સ હૈદરાબાદ સામે તેણે 4 ઓવરમાં 8.2ની ઇકોનોમી પર 33 રન આપીને 3 વિકેટ લીધી હતી.
