- હાર્દિક પંડ્યા માટે આ ટુર્નામેન્ટ અત્યાર સુધી સારી રહી નથી
- MIનો રાજસ્થાન સામે કારમો પરાજય થયો
- હાર બાદ હાર્દિક પંડ્યાએ પોતાની ભુલ સ્વિકારી
ઈન્ડિયન પ્રીમિયર લીગની નવી સિઝનમાં મુંબઈ ઈન્ડિયન્સની કેપ્ટનશીપ કરી રહેલા હાર્દિક પંડ્યા માટે આ ટુર્નામેન્ટ અત્યાર સુધી સારી રહી નથી. પ્રથમ ત્રણ પરાજય બાદ જીતનો સિલસિલો હાંસલ કરનારી ટીમને ફરીથી હારનો સામનો કરવો પડ્યો હતો. મુંબઈ ઈન્ડિયન્સના કેપ્ટન હાર્દિક પંડ્યાએ સોમવારે રાજસ્થાન રોયલ્સ સામે 9 વિકેટની કારમી હાર બાદ સ્વીકાર્યું હતું કે તેના બેટ્સમેન અને બોલરો બંને મેચમાં સારી શરૂઆત કરવામાં નિષ્ફળ રહ્યા હતા.
યશસ્વી જયસ્વાલની શાનદાર બેટિંગ
મુંબઈના 180 રનના લક્ષ્યાંકનો પીછો કરતા યશસ્વી જયસ્વાલે અણનમ 104 રન દ્વારા સદી ફટકારી અને જોસ બટલર (35) અને કેપ્ટન સંજુ સેમસન (28 બોલમાં અણનમ 38, બે છગ્ગા, બે ચોગ્ગા) સાથે પ્રથમ વિકેટ માટે 74 રન જોડ્યા. બન્નેએ બીજી વિકેટ માટે 109 રનની અતૂટ ભાગીદારી કરી હતી. રોયલ્સે આઠ બોલ બાકી રહેતા એક વિકેટે 183 રન બનાવીને જીત મેળવી હતી. જયસ્વાલે 60 બોલની ઈનિંગમાં 9 ચોગ્ગા અને 7 છગ્ગા ફટકાર્યા હતા.
તિલક-વાઢેરાએ બાજી સંભાળી
મુંબઈ ઈન્ડિયન્સની ખરાબ શરૂઆત બાદ તિલક વર્માની અડધી સદી (45 બોલમાં 3 છગ્ગા અને 5 ચોગ્ગા સાથે 65 રન) અને નિહાલ વાઢેરા (49) સાથે મળીને 5મી વિકેટ માટે 99 રનની ભાગીદારીની મદદથી 9 વિકેટે 179 રન બનાવ્યા હતા. રોયલ્સ માટે, સંદીપ શર્માએ 18 રનમાં 5 વિકેટ લઇ તેની કારકિર્દીની સર્વશ્રેષ્ઠ બોલિંગ કરી. ટ્રેન્ટ બોલ્ટે 32 રનમાં 2 વિકેટ સાથે તેને સારો સાથ આપ્યો અને બે વિકેટ લીધી.
હાર્દિક પંડ્યાએ પોતાની ભુલ સ્વિકારી
પંડ્યાએ મેચ બાદ કહ્યું, “શરૂઆતમાં અમે મુશ્કેલીમાં મુકાઈ ગયા હતા પરંતુ તિલક અને નિહાલ જે રીતે રમ્યા તે શાનદાર હતું. અમે અપેક્ષા મુજબ ઇનિંગ્સનો અંત ન કરી શક્યા અને તેથી અમે 10 થી 15 રન ઓછા બનાવ્યા. બોલિંગમાં અમારે બોલને સ્ટમ્પ પર રાખવા પડતા હતા પરંતુ પાવર પ્લેમાં અમે તેમને બોડીથી દૂર ફેંકી દીધા હતા. તે મેદાન પર અમારો શ્રેષ્ઠ દિવસ નહોતો. અમે અમારું શ્રેષ્ઠ પ્રદર્શન કર્યું નથી. દરેક વ્યક્તિ તેમની ભૂમિકા જાણે છે, આપણે આપણી ભૂલો સુધારવાની જરૂર છે અને તેને પુનરાવર્તન કરવાની જરૂર નથી.
