ચેન્નાઈ સુપર કિંગ્સે રાજસ્થાન રોયલ્સને પાંચ વિકેટે હરાવ્યું હતું. રાજસ્થાને ટોસ જીતીને પ્રથમ બેટિંગ કરતા રિયાન પરાગની 35 બોલમાં 47 રનની અણનમ ઈનિંગના આધારે 20 ઓવરમાં પાંચ વિકેટે 141 રન બનાવ્યા હતા. જવાબમાં ચેન્નાઈએ 18.2 ઓવરમાં પાંચ વિકેટે 145 રન બનાવીને જીત નોંધાવી હતી. ચેન્નાઈ માટે કેપ્ટન રૂતુરાજ ગાયકવાડે 41 બોલમાં 42 રનની અણનમ ઈનિંગ રમી અને ટીમને જીત અપાવવામાં મહત્વનું યોગદાન આપ્યું હતું. રાજસ્થાન તરફથી ઓફ સ્પિનર રવિચંદ્રન અશ્વિને બે વિકેટ ઝડપી હતી.
આ જીત સાથે ચેન્નાઈએ પ્લેઓફની રેસમાં પોતાની જાતને જાળવી રાખી છે અને પોઈન્ટ ટેબલમાં ટોપ ચારમાં પોતાનું સ્થાન મજબૂત કરી લીધું છે, જ્યારે રાજસ્થાનની નોકઆઉટમાં પહોંચવાની રાહ વધી ગઈ છે. ચેન્નાઈની ટીમ 13 મેચમાં સાત જીત અને છ હાર સાથે 14 પોઈન્ટ સાથે ટેબલમાં ચોથા સ્થાને પહોંચી ગઈ છે જ્યારે રાજસ્થાનની ટીમ 12 મેચમાં 8 જીત અને 4 હાર સાથે 16 પોઈન્ટ સાથે બીજા સ્થાને છે. જો રાજસ્થાનની ટીમ આ મેચ જીતવામાં સફળ રહી હોત તો આ સિઝનમાં પ્લેઓફમાં પહોંચનારી કોલકાતા નાઈટ રાઈડર્સ (KKR) પછી તે બીજી ટીમ બની ગઈ હોત, પરંતુ ચેન્નાઈએ તેની રાહ લંબાવી હતી.
