- IPL 2024ની અત્યાર સુધી 13 મેચ રમાઈ છે
- કોલકાતા અને રાજસ્થાનની મેચનું શેડ્યુલ બદલાશે
- રામ નવમીના તહેવારના કારણે શેડ્યુલમાં થશે ફેરફાર
IPLની અત્યારે 17મી સિઝન ચાલી રહી છે અને અગાઉ 7 એપ્રિલ સુધીનું શેડ્યૂલ બહાર પાડવામાં આવ્યું હતું. તાજેતરમાં, લોકસભા ચૂંટણીની તારીખોની જાહેરાત પછી, સમગ્ર IPL શિડ્યુલને અંતિમ સ્વરૂપ આપવામાં આવ્યું હતું. આવી સ્થિતિમાં હવે સોમવાર, 1 એપ્રિલના રોજ મોટા સમાચાર સામે આવ્યા છે કે કોલકાતા નાઈટ રાઈડર્સની મેચ ફરીથી શેડ્યૂલ કરવામાં આવી શકે છે અથવા મેચનું સ્થળ બદલી શકાય છે. આ માહિતી KKR અને રાજસ્થાન રોયલ્સ વચ્ચે 17 એપ્રિલે કોલકાતાના ઈડન ગાર્ડન્સમાં રમાનારી મેચને લઈનેછે. એટલે કે સીઝનની મધ્યમાં આ મેચને કારણે શેડ્યૂલમાં થોડો ફેરફાર થઈ શકે છે.
આ મેચનું શેડ્યુલ કેમ બદલાશે?
એક અહેવાલ મુજબ, ભારતીય ક્રિકેટ કંટ્રોલ બોર્ડ આ અંગે વિચાર કરી રહ્યું છે. તમામ સંબંધિત અધિકારીઓ, બંને ફ્રેન્ચાઇઝી, રાજ્ય ક્રિકેટ એસોસિએશન અને બ્રોડકાસ્ટર્સને આ અંગે જાણ કરવામાં આવી છે. આ ચર્ચા એટલા માટે શરૂ થઈ છે કારણ કે 17 એપ્રિલે દેશભરમાં રામ નવમીનો તહેવાર ઉજવવામાં આવશે. આ કારણોસર, અધિકારીઓ ચિંતિત છે કે તે દિવસે IPL મેચમાં યોગ્ય સુરક્ષા પૂરી પાડવામાં આવશે કે નહીં. તે દરમિયાન લોકસભાની ચૂંટણી પણ શરૂ થઈ જશે. આ કારણે બીસીસીઆઈ તે મેચ અંગે જલ્દી નિર્ણય લઈ શકે છે.
રિપોર્ટમાં એવું પણ જણાવવામાં આવ્યું છે કે BCCI અને બંગાળ ક્રિકેટ એસોસિએશન આ મામલે કોલકાતા પોલીસના સંપર્કમાં છે. હજુ અંતિમ નિર્ણય લેવાયો નથી પરંતુ આ ફેરફાર શક્ય છે. આ માટે, BCCIએ બંને ફ્રેન્ચાઇઝી અને બ્રોડકાસ્ટર્સને શેડ્યૂલમાં ફેરફારની શક્યતા અંગે સંકેત આપ્યા છે.
IPL 2024નું વર્તમાન શેડ્યુલ
આ સિઝનની વાત કરીએ તો તમામ મેચોના શેડ્યૂલ જાહેર કરવામાં આવ્યા હતા. ટુર્નામેન્ટની ફાઈનલ 26 મેના રોજ રમાશે. ચેન્નાઈના ચેપોકમાં ફાઈનલ મેચ રમાશે. પ્લેઓફની બાકીની મેચો, ક્વોલિફાયર 1 અને એલિમિનેટર, અમદાવાદમાં યોજાશે. ક્વોલિફાયર 2 ચેપોકમાં રમાશે. KKR અને રાજસ્થાનની વાત કરીએ તો બંને ટીમો વચ્ચેનો આ મુકાબલો ઘણો રસપ્રદ હોઈ શકે છે. બંને ટીમોએ શરૂઆતની બંને મેચ જીતીને શરૂઆત કરી હતી. હવે જોવાનું એ રહે છે કે KKRના ચાહકો હોમ ગ્રાઉન્ડ પરની આ હાઈ-પ્રોફાઈલ મેચમાં તેમના હીરોને જોઈ શકશે કે નહીં.
