- IPL 2025 પહેલા એક મેગા ઓક્શન થશે
- આ સિઝન પહેલા ટીમોમાં મોટા ફેરફારો થશે
- હરાજી પહેલા 4 ટીમો પોતાના કેપ્ટન બદલશે
IPL 2025 પહેલા એક મેગા ઓક્શન થશે, જેમાં મોટી સંખ્યામાં ખેલાડીઓ હાજર રહેશે. આ સિઝન પહેલા ટીમોમાં મોટા ફેરફારો થશે. આ દરમિયાન કેટલીક ફ્રેન્ચાઈઝી પોતાના કેપ્ટનને ટીમમાંથી હટાવીને નવા કેપ્ટનની પસંદગી કરવાના મુદ્દે ચર્ચામાં વ્યસ્ત છે. મીડિયા રિપોર્ટ્સ અનુસાર, હરાજી પહેલા 4 ટીમો પોતાના કેપ્ટન બદલવાની તૈયારી કરી રહી છે.
આ ટીમોના કેપ્ટન નહીં બદલાય
IPLની 10 ટીમોમાંથી 6 ટીમો IPL 2025માં પણ પોતાનો કેપ્ટન જાળવી શકે છે. જેમાં મુંબઈ ઈન્ડિયન્સના હાર્દિક પંડ્યા, રાજસ્થાન રોયલ્સના સંજુ સેમસન, ચેન્નાઈ સુપર કિંગ્સના રુતુરાજ ગાયકવાડ અને સનરાઈઝર્સ હૈદરાબાદના પેટ કમિન્સનું નામ સામેલ છે. આ સાથે જ વર્તમાન ચેમ્પિયન કોલકાતા નાઈટ રાઈડર્સ પણ પોતાના કેપ્ટન શ્રેયસ ઐયર અને ગુજરાત ટાઈટન્સ શુભમન ગિલને કેપ્ટન તરીકે જાળવી શકે છે, જ્યારે બાકીની 4 ટીમો પોતાના કેપ્ટન બદલી શકે છે.
રોયલ ચેલેન્જર્સ બેંગ્લોર
IPL 2024માં રોયલ ચેલેન્જર્સ બેંગ્લોર પ્લેઓફમાં પહોંચી હતી. આ સીઝનમાં ફાફ ડુ પ્લેસીસ ટીમની કપ્તાની સંભાળી રહ્યો હતો. આ વખતે RCB પોતાનો કેપ્ટન બદલવાની તૈયારી કરી રહ્યું છે. મીડિયા રિપોર્ટ્સ અનુસાર, KL રાહુલનું નામ સૌથી આગળ છે. કેએલ રાહુલે ગત સિઝનમાં લખનૌ સુપર જાયન્ટ્સની કેપ્ટનશીપ કરી હતી. કેએલ રાહુલ સિવાય આરસીબી મેનેજમેન્ટ પણ ઘણા નામો પર વિચાર કરી રહ્યું છે.
લખનૌ સુપર જાયન્ટ્સ
IPL 2024માં લખનૌ સુપર જાયન્ટ્સે 14 માંથી 7 મેચ જીતીને પોઈન્ટ ટેબલમાં 7મું સ્થાન મેળવ્યું છે. ટીમનું નેતૃત્વ કેએલ રાહુલ કરી રહ્યા હતા. જોકે, એક મેચ બાદ ટીમ મેનેજમેન્ટ અને કેપ્ટન કેએલ રાહુલ વચ્ચે વિવાદ થયો હતો, જેનો વીડિયો પણ સોશિયલ મીડિયા પર વાયરલ થયો હતો. આ વિવાદને કારણે લખનૌ સુપર જાયન્ટ્સ મેનેજમેન્ટ આ વખતે કેએલ રાહુલને તેમની સાથે જાળવી રાખવામાં બહુ રસ ધરાવતું નથી. એક અહેવાલમાં દાવો કરવામાં આવ્યો છે કે ટીમે રોહિત શર્માનો પણ સંપર્ક કર્યો છે, જેણે ટી-20 વર્લ્ડકપ 2024માં ટીમ ઈન્ડિયાને ટાઈટલ અપાવ્યું હતું. એવું માનવામાં આવે છે કે જો રોહિત શર્મા લખનૌ સુપર જાયન્ટ્સ સાથે જોડાય છે, તો ટીમની કમાન તેને સોંપવામાં આવશે.
દિલ્હી કેપિટલ્સ
IPL-2025ની મેગા ઓક્શન પહેલા દિલ્હી કેપિટલ્સ તેમના વર્તમાન કેપ્ટન રિષભ પંતને પણ ટીમમાંથી બહાર કરી શકે છે. IPL-2024માં, રિષભ પંતના નેતૃત્વમાં દિલ્હી કેપિટલ્સે 14 માંથી 7 મેચ જીતી અને પોઈન્ટ ટેબલમાં 6ઠ્ઠા સ્થાને રહી. મીડિયા રિપોર્ટ્સમાં એવો દાવો કરવામાં આવી રહ્યો છે કે દિલ્હી કેપિટલ્સ રિષભ પંતની જગ્યાએ અનુભવી અક્ષર પટેલને ટીમની કમાન સોંપવાની તૈયારી કરી રહી છે. માનવામાં આવી રહ્યું છે કે, ટીમ અક્ષર પટેલને પણ રિટેન કરી શકે છે.
પંજાબ કિંગ્સ
પંજાબ કિંગ્સનું ખરાબ પ્રદર્શન IPL 2024માં પણ ચાલુ રહ્યું હતું. ટીમ 14માંથી માત્ર 5 મેચ જીતી શકી હતી અને 10 પોઈન્ટ સાથે પોઈન્ટ ટેબલમાં 9મા સ્થાને હતી. ટીમનો કેપ્ટન શિખર ધવન આખી સિઝન દરમિયાન ઈજા સાથે સંઘર્ષ કરતો રહ્યો. મીડિયા રિપોર્ટ્સમાં દાવો કરવામાં આવી રહ્યો છે કે IPL-2025ની મેગા ઓક્શન પહેલા પંજાબ કિંગ્સ-11 શિખર ધવનને પણ ટીમમાંથી બહાર કરી શકે છે. આ અનુભવી ડાબા હાથના ખેલાડીને કેપ્ટન તરીકે રાખવાને બદલે ટીમ મેનેજમેન્ટ હવે યુવા કેપ્ટન પર રોકાણ કરવા તૈયાર છે. આ ખેલાડી ભારતીય કે વિદેશી બંને હોઈ શકે છે.
