IPL: BCCIના નવા નિયમોની જાળમાં ફસાઈ ટીમો, રિટેન્શન પર આવ્યું મોટું અપડેટ

IPL 2025ની મેગા હરાજી પહેલા ખેલાડીઓને જાળવી રાખવાની યાદી જાહેર કરવામાં આવનાર છે. પરંતુ ટીમો નવા નિયમોની જાળમાં ફસાઈ ગઈ છે. ફ્રેન્ચાઇઝી હજુ પણ ભારતીય ક્રિકેટ કંટ્રોલ બોર્ડ તરફથી સ્પષ્ટતાની રાહ જોઈ રહી છે. ટીમોએ 31 ઓક્ટોબર પહેલા રિટેન કરેલા અને રિલિઝ કરાયેલા ખેલાડીઓની યાદી જાહેર કરવાની રહેશે. આ વખતે ઘણા મોટા ખેલાડીઓની ટીમ બદલાવાની છે. ઘણા મહત્વના ખેલાડીઓ પણ હરાજીમાં પ્રવેશી શકે છે. રોહિત શર્મા વિશે પણ ઘણી અફવાઓ ચાલી રહી છે.

રિટેન્શનને લઈ હજું પણ કન્ફ્યુઝન

અહેવાલ અનુસાર, BCCIએ ટીમો સાથે 6 પાનાનો દસ્તાવેજ શેર કર્યો હતો. જેમાં રિટેન્શન, ખેલાડીઓની ફી, સેલરી કેપ અને મેચ ફીનો ઉલ્લેખ હતો. આ 2025-27 ચક્ર માટે હતું. પરંતુ ફ્રેન્ચાઇઝીસ નિર્ણાયક તબક્કે અટવાયેલી છે. તે હજુ સુધી પગારની મર્યાદાના મુદ્દાઓને સમજી શકી નથી.

BCCIએ પ્રથમ ખેલાડી માટે 18 કરોડ રૂપિયા, બીજા ખેલાડી માટે 14 કરોડ રૂપિયા, ત્રીજા ખેલાડી માટે 11 કરોડ રૂપિયા, ચોથા ખેલાડી માટે 18 કરોડ રૂપિયા અને પાંચમા ખેલાડી માટે 14 કરોડ રૂપિયાની સેલરી કેપ નક્કી કરી છે. પરંતુ તે સ્પષ્ટ નથી કે આ કુલ પર્સમાંથી હશે કે નહીં.

રિટેન્શન માટે 75 કરોડ રૂપિયા ખર્ચાશે

આ વખતે ટીમો વધુમાં વધુ છ ખેલાડીઓ જાળવી શકશે. તેમાં રાઈટ ટુ મેચ (RTM)નો વિકલ્પ પણ સામેલ છે. તેના પર કુલ 75 કરોડ રૂપિયા ખર્ચ કરવાના છે. કુલ પર્સની કિંમત 120 કરોડ રૂપિયા છે. કેપ્ડ ખેલાડીઓની મહત્તમ સંખ્યા 5 હોઈ શકે છે. અનકેપ્ડ ખેલાડીઓની મહત્તમ સંખ્યા બે હોઈ શકે છે.