ICC રેન્કિંગમાં બુમરાહનો જલ્વો, જાણો કેવું રહ્યું બુમ-બુમનું કરિયર

ભારતીય બોલર જસપ્રિત બુમરાહે બ્રિસ્બેનમાં તેના શાનદાર પ્રદર્શન બાદ ICC મેન્સ ટેસ્ટ બોલિંગ રેન્કિંગમાં પોતાનું ટોચનું સ્થાન મજબૂત કર્યું છે. વરસાદથી પ્રભાવિત આ મેચમાં બુમરાહે 94 રનમાં નવ વિકેટ ઝડપી હતી. આ મજબૂત પ્રદર્શન બદલ 14 વધારાના રેટિંગ પોઈન્ટ્સ મેળવ્યા અને તેની કારકિર્દીનું સર્વોચ્ચ રેટિંગ મેળવ્યું હતું.

બુમરાહનું ટેસ્ટમાં અત્યારસુધીનું પ્રદર્શન

2018માં કેપટાઉનમાં સાઉથ આફ્રિકા સામે પોતાની ટેસ્ટ કારકિર્દીની શરૂઆત કરનાર બુમરાહે 19.53ની એવરેજ અને 2.75ની ઇકોનોમી સાથે 194 ટેસ્ટ વિકેટ પૂરી કરી છે. આ સમયગાળા દરમિયાન, તેણે 12 વખત ઇનિંગ્સમાં 5 કે તેથી વધુ વિકેટ લીધી છે. ટેસ્ટ ઇનિંગ્સમાં તેનું સર્વશ્રેષ્ઠ પ્રદર્શન 27 રનમાં 6 વિકેટ અને મેચમાં 86 રનમાં 9 વિકેટ રહ્યું છે.

બુમરાહે અશ્વિનના રેકોર્ડની બરાબરી કરી

ફાસ્ટ બોલરના હવે 904 રેટિંગ પોઈન્ટ છે. આ સાથે તેણે ભારતીય ટીમના પૂર્વ સ્પિનર રવિચંદ્રન અશ્વિનના રેકોર્ડની બરાબરી કરી લીધી છે. 2016માં અશ્વિને સૌથી વધુ રેટિંગ (904) હાંસલ કર્યું હતું. આમ તે ICC ઈતિહાસમાં સંયુક્ત રીતે સૌથી વધુ રેટિંગ મેળવનાર ભારતીય ટેસ્ટ બોલર બન્યો. સાઉથ આફ્રિકાનો કાગિસો રબાડા બીજા ક્રમે અને ઓસ્ટ્રેલિયાનો જોશ હેઝલવુડ ત્રીજા ક્રમે છે.