ક્રિકેટ જગતમાં બબાલ, લંકા T10 લીગમાં આવ્યો ફિક્સિંગનો મામલો, ટીમના માલિકની ધરપકડ

લંકા T10 સુપર લીગ ટૂર્નામેન્ટમાં ભ્રષ્ટાચારનો મોટો મામલો સામે આવ્યો છે. ગેલે માર્વેલ્સ ટીમના માલિક પ્રેમ ઠક્કરની મેચ ફિક્સિંગના આરોપમાં ધરપકડ કરવામાં આવી છે. આ ઘટના ટૂર્નામેન્ટ શરૂ થયાના એક દિવસ બાદ બની છે, જેના કારણે ટૂર્નામેન્ટની વિશ્વસનીયતા પર સવાલો ઉભા થઈ રહ્યા છે. ઠક્કરની ગુરુવારે શ્રીલંકાના કેન્ડી ખાતેની એક હોટલમાંથી અટકાયત કરવામાં આવી હતી. શુક્રવારે, તેને કોલંબો મેજિસ્ટ્રેટ કોર્ટમાં રજૂ કરવામાં આવ્યો, જ્યાંથી તેને 16 ડિસેમ્બર સુધી ન્યાયિક કસ્ટડીમાં મોકલવામાં આવ્યો.

ભારતીય નાગરિકની ધરપકડ

અહેવાલ અનુસાર, શ્રીલંકાની પોલીસે જણાવ્યું કે ભારતીય નાગરિક પ્રેમ ઠક્કરની શ્રીલંકાના 2019 સ્પોર્ટ્સ ક્રાઈમ પ્રિવેન્શન એક્ટ હેઠળ ધરપકડ કરવામાં આવી છે. આ કાયદો મેચ ફિક્સિંગ અને સ્પોર્ટ્સ સંબંધિત ભ્રષ્ટાચારને રોકવા માટે બનાવવામાં આવ્યો હતો. પોલીસે જણાવ્યું હતું કે ઠક્કરની ધરપકડ વિદેશી ખેલાડીની ફરિયાદના આધારે કરવામાં આવી હતી, જેણે ઠક્કર પર મેચ ફિક્સિંગની ઓફર કરવાનો આરોપ લગાવ્યો હતો.

શ્રીલંકામાં ફિક્સિંગ સામે કડક કાયદો

આ પહેલીવાર નથી કે જ્યારે શ્રીલંકામાં કોઈ ફ્રેન્ચાઈઝી ટૂર્નામેન્ટમાં મેચ ફિક્સિંગનો મામલો સામે આવ્યો હોય. આ વર્ષે મે મહિનામાં લંકા પ્રીમિયર લીગ (LPL) દામ્બુલા થંડર્સ ટીમના સહ-માલિક તમીમ રહેમાનની પણ મેચ ફિક્સિંગના આરોપમાં ધરપકડ કરવામાં આવી હતી. 2019 માં, શ્રીલંકા રમતગમતમાં ભ્રષ્ટાચારને અપરાધ કરનાર દક્ષિણ એશિયાનો પ્રથમ દેશ બન્યો. આ કાયદા હેઠળ દોષી સાબિત થવા પર દસ વર્ષની જેલ અને ભારે દંડની જોગવાઈ છે.

લંકા T10 શું છે?

લંકા T10 સુપર લીગ એ શ્રીલંકાની પ્રથમ T10 ફ્રેન્ચાઇઝી ટુર્નામેન્ટ છે. તે ઇનોવેટિવ પ્રોડક્શન ગ્રુપ, T10 સ્પોર્ટ્સ મેનેજમેન્ટ અને T10 ગ્લોબલ સ્પોર્ટ્સ જેવા વૈશ્વિક જૂથો દ્વારા આયોજિત કરવામાં આવે છે. આ કંપનીઓએ વિશ્વભરમાં ઘણી સફળ T10 લીગનું આયોજન કર્યું છે.