ભારતીય સ્ક્વોશ સ્ટાર અનાહત સિંહે એશિયન ગેમ્સ 2026માં શાનદાર વાપસી કરીને ઇતિહાસ રચ્યો છે. મહિલા સિંગલ્સની સેમિફાઇનલમાં અનાહતે જાપાનની વર્લ્ડ નંબર-6 ખેલાડી સાતોમી વતાનાબેને 3-2થી હરાવીને ફાઇનલમાં સ્થાન મેળવ્યું છે. આ સાથે અનાહતે ભારત માટે ઓછામાં ઓછો સિલ્વર મેડલ પાક્કો કરી લીધો છે. હવે તેની નજર ગોલ્ડ મેડલ પર છે.વિશ્વ રેન્કિંગમાં 17મા સ્થાને રહેલી અનાહત માટે આ મુકાબલો સરળ નહોતો. તે શરૂઆતની 2 ગેમ હારી ગઈ હતી, પરંતુ ત્યારબાદ તેણે શાનદાર સંયમ અને આક્રમક રમતનું પ્રદર્શન કરીને સતત 3 ગેમ જીતીને મેચ પોતાના નામે કરી લીધી.
0-2થી પાછળ રહ્યા બાદ શાનદાર વાપસી
સેમિફાઇનલની શરૂઆત જાપાની ખેલાડી સાતોમી વતાનાબેના પક્ષમાં રહી હતી. તેણે અનાહતની રમત સામે પેસમાં ફેરફાર, વિવિધ શોટ અને શાર્પ એંગલનો અસરકારક ઉપયોગ કર્યો હતો.પ્રથમ ગેમમાં અનાહતને 9-11થી હારનો સામનો કરવો પડ્યો હતો. ત્યારબાદ બીજી ગેમ પણ ખૂબ જ નજીકની રહી, પરંતુ વતાનાબેએ 13-11થી ગેમ જીતીને મેચમાં 2-0ની લીડ મેળવી લીધી હતી.આ સ્થિતિમાં અનાહત માટે હવે એક પણ ભૂલ ભારે પડી શકે તેમ હતી. પરંતુ ભારતીય ખેલાડીએ દબાણમાં પણ પોતાનું સંતુલન જાળવી રાખ્યું.
https://x.com/Media_SAI/status/2103732464518848583?s=20
ત્રીજી ગેમમાં બચાવ્યા 2 ગેમ પોઇન્ટ
ત્રીજી ગેમમાં અનાહત 8-10થી પાછળ હતી અને વતાનાબે પાસે મેચ જીતવાની સ્થિતિ હતી. જોકે, અનાહતે બંને ગેમ પોઇન્ટ બચાવીને જોરદાર વાપસી કરી.ભારતીય ખેલાડીએ સતત પોઇન્ટ મેળવીને ત્રીજી ગેમ 12-10થી પોતાના નામે કરી. આ જીતે અનાહતનો આત્મવિશ્વાસ વધાર્યો અને મેચમાં વાપસીનો રસ્તો ખોલ્યો.ત્યારબાદ ચોથી ગેમમાં અનાહતે શરૂઆતથી જ દબદબો જાળવી રાખ્યો. તેણે વતાનાબેને વધારે તક ન આપતાં 11-6થી ગેમ જીતી અને સ્કોર 2-2થી બરાબર કરી દીધો.
નિર્ણાયક ગેમમાં 11-3થી જીત
મેચ હવે પાંચમી અને નિર્ણાયક ગેમ સુધી પહોંચી હતી. અહીં અનાહતે ફરી એકવાર પોતાની આક્રમક રમત બતાવી. તેણે જાપાની ખેલાડી પર સતત દબાણ બનાવ્યું અને નિર્ણાયક ગેમ 11-3થી જીતી લીધી.આ સાથે અનાહતે 0-2થી પાછળ રહ્યા બાદ 3-2થી યાદગાર જીત મેળવી અને મહિલા સિંગલ્સની ફાઇનલમાં પ્રવેશ કર્યો.ફાઇનલમાં પહોંચતાં જ અનાહતે ભારતનો ઓછામાં ઓછો સિલ્વર મેડલ નિશ્ચિત કરી દીધો છે. હવે તે ગોલ્ડ મેડલ માટે કોર્ટ પર ઉતરશે.
પીવી સિંધુથી પ્રેરણા લઈને સ્ક્વોશ સુધીની સફર
2008માં જન્મેલી અનાહત સિંહ એવા પરિવારમાંથી આવે છે જ્યાં રમતગમત સાથે જોડાણ રહ્યું છે. તેના પિતા ગુરશરણ સિંહ અને માતા તાની વધેરા ફીલ્ડ હોકી રમતા હતા, જ્યારે તેના કાકા ટેનિસ ખેલાડી રહ્યા છે.અનાહતે શરૂઆતમાં બેડમિન્ટન રમવાનું શરૂ કર્યું હતું. તે પીવી સિંધુથી પ્રેરિત હતી. જોકે, થોડા સમય બાદ સ્ક્વોશ તરફ તેનું ધ્યાન ગયું અને કેટલાક ટૂર્નામેન્ટ રમ્યા બાદ તેને આ રમત પસંદ આવી ગઈ.માત્ર 14 વર્ષની ઉંમરે અનાહતે 2022 કોમનવેલ્થ ગેમ્સમાં ભારતનું પ્રતિનિધિત્વ કરીને સૌથી નાની ઉંમરની ભારતીય ખેલાડીઓમાં સ્થાન મેળવ્યું હતું.
