એશિયન ગેમ્સ 2026ના 12મા દિવસે ભારતે વધુ એક ઐતિહાસિક સફળતા હાંસલ કરી છે. બુધવારે રમાયેલી મહિલા કમ્પાઉન્ડ ટીમ ઈવેન્ટની ફાઈનલમાં ભારતીય મહિલા તીરંદાજી ટીમે ચીનને 238-234ના તફાવતથી હરાવીને દેશ માટે 7મો ગોલ્ડ મેડલ પોતાના નામે કર્યો છે. તીરંદાજી બાદ સ્કવોશમાં પણ ભારત મેડલનું દાવેદાર બન્યું છે. ભારતીય મહિલા ટીમે સિંગાપોરને ક્વાર્ટર ફાઇનલમાં 2-0થી હરાવ્યું. તંવી ખન્ના અને અનાહત સિંહે પોતાની-પોતાની સિંગલ્સ મેચ જીતીને ભારતને સેમિફાઇનલમાં પહોંચાડ્યું. ભારતના કુલ મેડલમાં સિલ્વર અને બ્રોન્ઝ મેડલની સંખ્યા વધુ છે, જ્યારે ગોલ્ડ મેડલની સંખ્યા વધી 7 પર પહોંચી છે.
નિશાનેબાજોનું શ્રેષ્ઠ પ્રદર્શન અને વર્લ્ડ રેકોર્ડની બરાબરી
ગોલ્ડ મેડલ વિજેતા ભારતીય ટીમમાં જ્યોતિ સુરેખા, ચિકિતા તનિપાર્થિ અને પૃથિકા પ્રદીપ સામેલ હતા. ફાઈનલ મેચમાં પૃથિકા અને જ્યોતિએ શાનદાર પ્રદર્શન કરતા એક પણ નિશાન ચૂક્યું નહોતું. આ જીત સાથે ભારતીય ટીમે 238 પોઈન્ટનો સ્કોર બનાવીને દક્ષિણ કોરિયાના નામે નોંધાયેલા વર્લ્ડ રેકોર્ડની બરાબરી કરી લીધી છે. મહિલા કમ્પાઉન્ડ ટીમ ઈવેન્ટમાં ભારતનો આ સતત બીજો ગોલ્ડ મેડલ છે, આ પહેલાં ટીમે 2023માં પણ ગોલ્ડ જીત્યો હતો.
જ્યોતિ સુરેખાનો સતત ચોથો ગોલ્ડ
ભારતને ગોલ્ડ અપાવનાર આ ત્રિપુટી અગાઉ પણ મેડલ જીતી ચૂકી છે. મેડ્રિડમાં યોજાયેલા વર્લ્ડ કપ સ્ટેજ 4 માં, જ્યોતિ, પ્રીતિકા અને ચિકિથાની ત્રિપુટીએ મહિલા ટીમ સિલ્વર મેડલ જીત્યો હતો. તે દોડ દરમિયાન પણ, ભારતીયોએ સેમિફાઇનલમાં કોરિયાને હરાવી દીધું. જો કે આ વખતે ભારતની સ્ટાર તીરંદાજ જ્યોતિ સુરેખા માટે આ વિજય ખાસ રહ્યો છે. જ્યોતિએ સતત ચોથી એશિયન ગેમ્સમાં ગોલ્ડ મેડલ જીતવાની સિદ્ધિ મેળવી છે. આ પહેલાં તે 2014, 2018 અને 2023ની એશિયાડમાં પણ ગોલ્ડ મેડલ જીતી ચૂકી છે.
ભારતીય મહિલાઓનું વર્ચસ્વ અને મેડલ ટેલીની સ્થિતિ
એશિયન ગેમ્સ 2026માં અત્યાર સુધી ભારતે જીતેલા કુલ 7 ગોલ્ડ મેડલમાંથી 5 ગોલ્ડ મહિલા ખેલાડીઓએ અપાવ્યા છે. જ્યારે બાકીના 2 ગોલ્ડ પુરુષ કબડ્ડી ટીમ અને પિસ્ટલ મિક્સ્ડ ઈવેન્ટમાંથી આવ્યા છે. હાલમાં ભારત 7 ગોલ્ડ, 21 સિલ્વર અને 25 બ્રોન્ઝ સાથે કુલ 53 મેડલ જીતીને મેડલ ટેલીમાં 9મા સ્થાને છે.
