2026 કોમનવેલ્થ ગેમ્સ સ્કોટલેન્ડના ગ્લાસગોમાં 23 જુલાઈથી 2 ઓગસ્ટ દરમિયાન યોજાશે.ગ્લાસગોએ અગાઉ 2014માં કોમનવેલ્થ ગેમ્સનું આયોજન કર્યું હતું.આ વર્ષે 74 દેશોના આશરે 3,000 રમતવીરો 11 દિવસીય રમતોમાં ભાગ લેશે,જેમાં ભારતના 126 રમતવીરો મેડલ માટે સ્પર્ધા કરશે.જોકે 2026 ગ્લાસગો કોમનવેલ્થ ગેમ્સ શરૂ થાય તે પહેલાં,ભારતીય બોક્સિંગ ટીમને મોટી કટોકટીનો સામનો કરવો પડ્યો છે.બેલફાસ્ટમાં તાલીમ શિબિર પૂર્ણ કરીને ગ્લાસગો પહોંચેલી 22 સભ્યોની ભારતીય બોક્સિંગ ટીમનો લગભગ અડધો સામાન બેલફાસ્ટ એરપોર્ટ પર છોડી દેવામાં આવ્યો છે.

ભારતીય બોક્સિંગ ટીમનો સામાન થયો ગયો

ગુમ થયેલ બેગમાં ખેલાડીઓની તાલીમ કીટ, તેમજ ગુરુવારના ઉદ્ઘાટન સમારોહ માટે સત્તાવાર અને ઔપચારિક ગણવેશનો સમાવેશ થાય છે.ભારતીય ટુકડીના સભ્યોના જણાવ્યા અનુસાર,બેલફાસ્ટથી ગ્લાસગો જતું વિમાન ખૂબ નાનું હતું,જેના કારણે બધો સામાન એકસાથે લોડ થઈ શક્યો નહીં.જે ખેલાડીઓનો સામાન પાછળ રહી ગયો હતો તેમાં વિશ્વ ચેમ્પિયન જાસ્મીન લંબોરિયા,સાક્ષી ચૌધરી,પરવીન હુડા,જદુમણી સિંહ,કપિલ પોખરિયા અને પુરુષોના મુખ્ય કોચ સી.કુટ્ટપ્પાનો સમાવેશ થાય છે.

આવી બેદરકારીનો બીજો બનાવ

આશ્ચર્યજનક રીતે, ભારતીય બોક્સિંગ ટીમ સાથે સંકળાયેલી આવી બેદરકારીનો આ બીજો બનાવ છે. આ મહિનાની શરૂઆતમાં જ્યારે ટીમ દોહાથી બેલફાસ્ટ માટે રવાના થઈ ત્યારે એરલાઇન્સ દ્વારા પણ આવી જ બેદરકારીની જાણ કરવામાં આવી હતી. વધુમાં, ટીમ મેનેજમેન્ટે બીજી ખામી અંગે ચિંતા વ્યક્ત કરી છે. મહિલા બોક્સિંગ કોચ મંદાકિની ચાનુને અન્ય બોક્સરોની જેમ જ હોટલમાં રૂમ ફાળવવામાં આવ્યો નથી, જેના કારણે કોચ અને રમતવીરો વચ્ચે સંકલન કરવામાં મુશ્કેલીઓ ઊભી થઈ રહી છે.

શુક્રવારથી સ્પર્ધાઓ શરૂ થશે

કોમનવેલ્થ ગેમ્સમાં બોક્સિંગ સ્પર્ધાઓ શુક્રવારથી શરૂ થવાની છે. આવી સ્થિતિમાં, ભારતીય ટીમને આશા છે કે પ્રેક્ટિસ અને તૈયારીઓ ગતિ પકડે તે પહેલાં તેમનો બચેલો સામાન ગ્લાસગો સુરક્ષિત રીતે પહોંચી જશે, જેથી ખેલાડીઓ કોઈપણ માનસિક તાણ વિના તેમનું અભિયાન શરૂ કરી શકે.

આ પણ વાંચો - Hockey વર્લ્ડ કપ માટે ભારતીય ટીમની જાહેરાત,જાણો કોને મળ્યું સ્થાન