રાઇઝિંગ સ્ટાર એશિયા કપ હાલમાં કતારમાં રમાઈ રહ્યો છે. ભારતીય ટીમના 14 વર્ષીય લેફ્ટ-હેન્ડ બેટ્સમેન વૈભવ સૂર્યવંશીની બેટિંગ દર્શકોના દિલ જીતી રહી છે. એશિયા કપમાં સૂર્યવંશી જે રીતે બોલરોને ફટકારી રહ્યો છે તેનાથી ફેન્સ તેને ભારતની મુખ્ય ટીમમાં પસંદ કરવા માટે માગ કરી રહ્યા છે. વૈભવ સૂર્યવંશીએ રાઇઝિંગ સ્ટાર એશિયા કપમાં યુએઈ સામે 144 રનની ધમાકેદાર ઇનિંગ રમી હતી. તેની ઇનિંગને કારણે ભારતીય ટીમે ચાર વિકેટ ગુમાવીને 297 રન બનાવ્યા હતા અને 148 રનથી જીત મેળવી હતી.
એશિયા કપ દરમિયાન 20 ચોગ્ગા અને 22 છગ્ગા ફટકાર્યા
વૈભવ સૂર્યવંશીની વાત કરીએ તો, રાઇઝિંગ સ્ટાર એશિયા કપની લગભગ દરેક મેચમાં વૈભવ સૂર્યવંશીએ શાનદાર બેટિંગ કરી હતી. તેણે યુએઈ સામે 144 રન બનાવ્યા હતા અને પાકિસ્તાન સામે પણ 28 બોલમાં 45 રનની શાનદાર ઇનિંગ રમી હતી, જેમાં પાંચ ચોગ્ગા અને ત્રણ છગ્ગાનો સમાવેશ થતો હતો. સૂર્યવંશીએ બાંગ્લાદેશ સામેની સેમિફાઇનલમાં 15 બોલમાં 38 રનની શાનદાર ઇનિંગ પણ રમી હતી.
