બાંગ્લાદેશના અનુભવી સ્પિનર તૈજુલ ઇસ્લામે આયર્લેન્ડ સામે ચાલી રહેલી બીજી ટેસ્ટ મેચમાં પોતાની શાનદાર બોલિંગથી ઇતિહાસ રચ્યો છે. તે હવે બાંગ્લાદેશના દિગ્ગજ ઓલરાઉન્ડર શાકિબ અલ હસનને પાછળ છોડીને ટેસ્ટ ક્રિકેટમાં બાંગ્લાદેશનો સૌથી વધુ વિકેટ લેનાર બોલર બની ગયો છે. આયર્લેન્ડ હાલમાં બાંગ્લાદેશના પ્રવાસે છે.બે ટેસ્ટ સીરિઝની અંતિમ મેચ ઢાકાના શેર-એ-બાંગ્લા સ્ટેડિયમમાં રમાઈ રહી છે.
તૈજુલ ઇસ્લામે શાકિબ અલ હસનને પાછળ છોડી દીધો
33 વર્ષીય તૈજુલ ઇસ્લામે 57 ટેસ્ટ મેચોમાં102 ઇનિંગ્સમાં 249 વિકેટ લીધી છે. તેણે ૭૧ ટેસ્ટ મેચોમાં ૨૪૬ વિકેટ લેનારા શાકિબ અલ હસનને પાછળ છોડી દીધો છે. યાદીમાં ત્રીજા સ્થાને મહેદી હસન મિરાઝ છે, જેમણે પોતાની ટેસ્ટ કારકિર્દીમાં 209 વિકેટ લીધી છે. ઢાકામાં રમાઈ રહેલી આ મેચમાં તૈજુલ ઇસ્લામે અત્યાર સુધીમાં સાત વિકેટ લીધી છે. તેણે પહેલી ઇનિંગ્સમાં ચાર બેટ્સમેનોને આઉટ કર્યા છે, જ્યારે બીજી ઇનિંગ્સમાં ત્રણ બેટ્સમેનોને આઉટ કર્યા છે.
આંતરરાષ્ટ્રીય ક્રિકેટમાં તૈજુલ ઇસ્લામના આંકડા
તૈજુલ ઇસ્લામે બાંગ્લાદેશ માટે 57 ટેસ્ટ, 20 ODI અને બે T20 આંતરરાષ્ટ્રીય મેચ રમી છે. પોતાની કારકિર્દીમાં, તેણે 100 ટેસ્ટ ઇનિંગ્સમાં 31.34 ની સરેરાશથી 247 વિકેટ, 20 ODI માં 25.96 ની સરેરાશથી 31 વિકેટ અને બે T20I ઇનિંગ્સમાં 58.00 ની સરેરાશથી એક વિકેટ લીધી છે.
આયર્લેન્ડ સામે 509 રનનો વિશાળ લક્ષ્યાંક છે
બીજી ટેસ્ટમાં, બાંગ્લાદેશે ટોસ જીતીને પ્રથમ બેટિંગ કરવાનો નિર્ણય લીધો. પ્રથમ ઇનિંગ્સમાં, મુશફિકુર રહીમની સદીને કારણે બાંગ્લાદેશ 476 રન બનાવી શક્યું. ત્યારબાદ આયર્લેન્ડ 265 રનમાં ઓલઆઉટ થઈ ગયું. આ પછી, બીજી ઇનિંગ્સમાં, બાંગ્લાદેશે 297 રન બનાવ્યા અને આયર્લેન્ડ માટે 509 રનનો લક્ષ્યાંક રાખ્યો.
