ODI વર્લ્ડ કપ વિજેતા ભારતીય મહિલા ક્રિકેટ ટીમ હાલમાં શ્રીલંકા સામે T20I સીરિઝ રમી રહી છે. પાંચ મેચની T20I સીરિઝ 21 ડિસેમ્બરે વિશાખાપટ્ટનમમાં શરૂ થઈ હતી,જ્યાં ટીમ ઈન્ડિયાએ શ્રીલંકાને 8 વિકેટથી હરાવ્યું હતું. સ્ટાર બેટ્સમેન જેમીમા રોડ્રિગ્સે ભારતની જીતમાં મુખ્ય ભૂમિકા ભજવી હતી, તેણે 44 બોલમાં 10 ચોગ્ગા સહિત અણનમ 69 રન બનાવ્યા હતા. આ શાનદાર ઇનિંગ માટે તેણીને પ્લેયર ઓફ ધ મેચ જાહેર કરવામાં આવી હતી.ક્રાંતિ ગૌડ,શ્રી ચારણી અને અનુભવી બોલર દીપ્તિ શર્માએ બોલિંગમાં મહત્વપૂર્ણ યોગદાન આપ્યું હતું, એક-એક વિકેટ લીધી હતી.
શું બીજી T20Iમાં ઇતિહાસ રચાશે?
પ્રથમ T20Iમાં શાનદાર વિજય બાદ, ભારત અને શ્રીલંકા 23 ડિસેમ્બરે બીજી T20Iમાં ટકરાશે, જ્યાં ભારતીય બોલર દીપ્તિ શર્મા પાસે ઇતિહાસ રચવાની તક હશે. હકીકતમાં, દીપ્તિ T20I ક્રિકેટમાં 150 વિકેટ પૂર્ણ કરવાની ખૂબ નજીક છે. તેને આ હાંસલ કરવા માટે ફક્ત બે વિકેટની જરૂર છે. તેણીએ 130 T20I મેચોની ૧૨૭ ઇનિંગ્સમાં ૧૮.૯૯ ની પ્રભાવશાળી સરેરાશથી ૧૪૮ વિકેટ લીધી છે. જો તે આગામી મેચમાં શ્રીલંકાના બે ખેલાડીઓને આઉટ કરવામાં સફળ રહે છે, તો તે ૧૫૦ ટી૨૦ વિકેટ લેનારી પ્રથમ ભારતીય બોલર અને વિશ્વની બીજી બોલર બનશે. અત્યાર સુધી, ફક્ત ઓસ્ટ્રેલિયાની મેગન સ્કટ જ ટી૨૦ ક્રિકેટમાં ૧૫૦ થી વધુ વિકેટ લઈ શકી છે.