ઇન્ટરનેશનલ લીગ T20ની ચોથી સીઝનને તેનો નવો ચેમ્પિયન મળી ગયો છે.રવિવાર 4 જાન્યુઆરીના રોજ દુબઈ ઇન્ટરનેશનલ સ્ટેડિયમ ખાતે રમાયેલી હાઈ-વોલ્ટેજ ફાઇનલમાં ડેઝર્ટ વાઇપર્સે ડિફેન્ડિંગ ચેમ્પિયન MI અમીરાતને 46 રને હરાવીને પ્રથમ વખત ખિતાબ પર કબજો કર્યો છે. જોકે,આ મેચ માત્ર વાઇપર્સના વિજય માટે જ નહીં,પણ મેદાન પર ખેલાડીઓ વચ્ચે થયેલી ઉગ્ર બોલાચાલીને કારણે પણ ચર્ચામાં આવી છે.
નસીમ અને પોલાર્ડ આમને-સામને આવી ગયા
મેચ દરમિયાન સૌથી વધુ ચર્ચાયેલી ક્ષણ 11મી ઓવરમાં જોવા મળી.MI અમીરાતની બેટિંગ દરમિયાન પાકિસ્તાની યુવા ફાસ્ટ બોલર નસીમ શાહ અને વેસ્ટ ઇન્ડીઝના દિગ્ગજ ખેલાડી કિરોન પોલાર્ડ વચ્ચે ગરમાગરમી થઈ હતી. નસીમ શાહના એક ધારદાર બોલને પોલાર્ડ રમી શક્યા નહીં અને બોલ તેમના બેટની અંદરની કિનારીએ વાગીને પેડ પર અથડાયો. બોલ ફેંક્યા પછી નસીમે હસીને પોલાર્ડની મજાક ઉડાવવાનો પ્રયાસ કર્યો, જે પોલાર્ડ જેવા સિનિયર ખેલાડીને પસંદ ન આવ્યું. પોલાર્ડ તરત જ નસીમ પાસે પહોંચી ગયો અને બંને વચ્ચે તીખી બોલાચાલી થઈ.
ડેઝર્ટ વાઇપર્સનો દબદબો
કેપ્ટન સેમ કરનની આગેવાનીમાં ડેઝર્ટ વાઇપર્સે ફાઈનલમાં ટોસ હાર્યા પછી પ્રથમ બેટિંગ કરતા નિર્ધારિત 20 ઓવરમાં 4 વિકેટે 182 રનનો મજબૂત સ્કોર ઊભો કર્યો હતો. જ્યા સેમ કરને જવાબદારીપૂર્વક બેટિંગ કરતા શાનદાર 74 રન ફટકાર્યા હતા. તો બીજી તરફ 183 રનના લક્ષ્યનો પીછો કરવા ઉતરેલી MI અમીરાતની ટીમ વાઇપર્સની ધારદાર બોલિંગ સામે ટકી શકી નહીં. આખી ટીમ 18.3 ઓવરમાં માત્ર 136 રન બનાવીને ઓલઆઉટ થઈ ગઈ હતી. આ મેચમાં ડેવિડ પેને અને નસીમ શાહે 3-3 વિકેટ લઈને MI અમીરાતની કમર તોડી નાખી હતી.
જીત બાદ નસીમ શાહનું નિવેદન
મેચ પૂરી થયા પછી નસીમ શાહે પોતાની પ્રતિક્રિયા આપતા જણાવ્યું કે,ફાઇનલ મેચનું દબાણ હંમેશા અલગ હોય છે. અમારી ટીમે બેટિંગ અને બોલિંગ બંને ક્ષેત્રે ઉત્કૃષ્ટ પ્રદર્શન કર્યું. મેનેજમેન્ટે ખેલાડીઓનો જે રીતે ઉપયોગ કર્યો તેનાથી અમને ફાયદો થયો. આ વિજય દરેક ખેલાડીની 100 ટકા મહેનતનું પરિણામ છે.
