ભારત અને ન્યુઝીલેન્ડ વચ્ચે ચાલી રહેલી વનડે સીરિઝ હવે તેના અત્યંત રોમાંચક અને અંતિમ તબક્કે પહોંચી ગઈ છે. સિરીઝ હાલમાં 1-1ની બરાબરી પર હોવાથી, આજે રોજ ઇન્દોરના હોલ્કર સ્ટેડિયમમાં રમાનારી ત્રીજી મેચ 'ફાઈનલ' જંગ જોવા મળશે. ભારત માટે આ મેચ પ્રતિષ્ઠાનો પ્રશ્ન છે કારણ કે ટીમ 2019 થી ઘરઆંગણે કોઈ વનડે સિરીઝ હારી નથી, જ્યારે ન્યુઝીલેન્ડ ભારતમાં ઇતિહાસ રચવા તત્પર છે.
ઇન્દોરનું હોલ્કર સ્ટેડિયમાં રમાશે
ઇન્દોરનું હોલ્કર સ્ટેડિયમ (Holkar Stadium) ભારતીય ટીમ માટે હંમેશા અજેય ગઢ સાબિત થયું છે. આંકડાઓ સાક્ષી પૂરે છે કે ટીમ ઈન્ડિયાએ આ મેદાન પર અત્યાર સુધીમાં કુલ 7 વનડે મેચો રમી છે અને તમામ 7 મેચોમાં શાનદાર વિજય મેળવ્યો છે. એટલે કે અહીં ભારતનો જીતનો રેકોર્ડ 100% છે. કેપ્ટન શુભમન ગિલની આગેવાની હેઠળ ભારત આ રેકોર્ડ જાળવી રાખીને સિરીઝ 2-1 થી જીતવા મેદાનમાં ઉતરશે.
જાણો પિચ રિપોર્ટ
હોલ્કર સ્ટેડિયમની પિચ રિપોર્ટ (Pitch Report) વિશે વાત કરીએ તો, તેને પરંપરાગત રીતે 'બેટ્સમેનોનું સ્વર્ગ' માનવામાં આવે છે. અહીંની પિચ સપાટ છે અને કાળી માટીની બનેલી છે, જેના કારણે રનનો વરસાદ જોવા મળી શકે છે. જોકે, શરૂઆતમાં નવા બોલ સાથે ઝડપી બોલરોને થોડો સ્વિંગ મળી શકે છે, પરંતુ જેમ બોલ જૂનો થશે તેમ બેટિંગ એકદમ સરળ બની જશે.મેચ દરમિયાન હવામાન સાફ રહેશે અને વરસાદની કોઈ શક્યતા નથી, પરંતુ 'ઝાકળ' (Dew Factor) ગેમ ચેન્જર સાબિત થઈ શકે છે. રાત્રિના સમયે ઝાકળ પડવાને કારણે બોલરોને બોલ ગ્રીપ કરવામાં મુશ્કેલી પડે છે અને પાછળથી બોલિંગ કરવી અઘરી બને છે. આ પરિબળને ધ્યાનમાં રાખીને, ટોસ જીતનાર કેપ્ટન પહેલા ફિલ્ડિંગ કરવાનું પસંદ કરી શકે છે.ભલે બીજી વનડેમાં ન્યુઝીલેન્ડે વાપસી કરી હોય, પરંતુ ઇન્દોરના રેકોર્ડ અને હોમ કન્ડિશનને જોતા આ મેચમાં ભારતનું પલડું ભારે જણાઈ રહ્યું છે. અનુમાન મુજબ, ભારતની જીતવાની શક્યતા 70% છે, જ્યારે ન્યુઝીલેન્ડની 30% છે. જોકે, નિર્ણાયક મેચમાં ટોસનું મહત્વ ખૂબ જ વધી જાય છે.
ટીમ ઈન્ડિયાની સંભવિત પ્લેઈંગ-11
ટીમ ઈન્ડિયાની સંભવિત પ્લેઈંગ-11 જોઈએ તો, રોહિત શર્મા અને કેપ્ટન શુભમન ગિલ ઇનિંગની શરૂઆત કરશે. મિડલ ઓર્ડરમાં વિરાટ કોહલી, શ્રેયસ અય્યર અને વિકેટકીપર કેએલ રાહુલ જવાબદારી સંભાળશે. ઓલરાઉન્ડર તરીકે રવિન્દ્ર જાડેજા અને નીતિશ કુમાર રેડ્ડી ટીમમાં હોઈ શકે છે. બોલિંગ આક્રમણમાં કુલદીપ યાદવ, મોહમ્મદ સિરાજ, અર્શદીપ સિંહ અને હર્ષિત રાણાને તક મળી શકે છે.
કાયલ જેમીસની પર રહેશે નજર
સામે પક્ષે ન્યુઝીલેન્ડની ટીમમાં ડેવોન કોનવે, હેનરી નિકોલ્સ, વિલ યંગ અને ડેરિલ મિશેલ જેવા મજબૂત બેટ્સમેનો છે. મિડલ ઓર્ડરમાં ગ્લેન ફિલિપ્સ અને વિકેટકીપર મિશેલ હે જોવા મળશે. ટીમની કમાન માઇકલ બ્રેસવેલ સંભાળશે, જેમાં જેડન લેનોક્સ, ઝાચેરી ફોલ્કેસ, કાયલ જેમીસન અને ક્રિસ ક્લાર્ક બોલિંગમાં સાથ આપશે.
આ પણ વાંચો - Mumbai Indiansની હાર બાદ કેપ્ટન હરમનપ્રીત કૌર થઈ ગુસ્સે, જણાવ્યું હારનું કારણ
