ટીમ ઈન્ડિયાએ ભારત અને દક્ષિણ આફ્રિકા વચ્ચે રમાઈ રહેલી 5 મેચની T20 સીરિઝની પહેલી મેચ 101 રનના એકતરફી માર્જિનથી જીતી હતી, જ્યારે બીજી મેચમાં આફ્રિકન ટીમે શાનદાર વાપસી કરી હતી. દક્ષિણ આફ્રિકાએ નવા ચંદીગઢના મુલ્લાનપુર સ્ટેડિયમ ખાતે રમાયેલી સીરિઝની બીજી T20 મેચ 51 રનથી જીતી હતી, જેનાથી સીરિઝ1-1 થી બરાબર થઈ ગઈ હતી. આ મેચમાં, આફ્રિકન ટીમને પહેલા બેટિંગ કરવાની તક મળી હતી જેમાં તેમણે 20 ઓવરમાં 4 વિકેટ ગુમાવીને 213 રન બનાવ્યા હતા, જેના જવાબમાં ટીમ ઈન્ડિયા તરફથી ખૂબ જ ખરાબ બેટિંગ પ્રદર્શન જોવા મળ્યું હતું અને તેઓ 19.1 ઓવરમાં 162 રનમાં ઓલઆઉટ થઈ ગયા હતા.
ગિલથી લઈને અભિષેક અને કેપ્ટન સૂર્યા સુધી, બધાએ નિરાશ કર્યા
દક્ષિણ આફ્રિકા સામેની બીજી T20I માં, ટીમ ઈન્ડિયાની શરૂઆત ખૂબ જ ખરાબ રહી, શુભમન ગિલને પહેલી ઓવરમાં લુંગી ન્ગીડીના બોલ પર કોઈ રન બનાવ્યા વિના આઉટ થયો. ત્યારબાદ અભિષેક શર્મા બીજી ઓવરમાં 17 રન બનાવ્યા બાદ માર્કો જાનસેનનો શિકાર બન્યો. ત્યાંથી, બધાને કેપ્ટન સૂર્યકુમાર યાદવ પાસેથી મોટી ઇનિંગની અપેક્ષા હતી, પરંતુ તે પણ 4 બોલમાં 5 રન બનાવીને આઉટ થઈ ગયો. પ્રથમ છ ઓવરના અંતે, ટીમ ઈન્ડિયાએ ત્રણ વિકેટ ગુમાવી દીધી હતી અને સ્કોર ફક્ત 51 રન હતો. ટીમ ઈન્ડિયાએ 67 રને અક્ષર પટેલના રૂપમાં ચોથી વિકેટ ગુમાવી દીધી, જે નંબર 3 પર બેટિંગ કરવા આવ્યો હતો. અક્ષરે 21 બોલનો સામનો કર્યો અને 21 રન બનાવ્યા.