Sports : T20 મેચમાં બન્યાં 515 રન, 258 રનનો ટાર્ગેટ આપીને પણ ટીમ હારી ગઈ, T20 ઇતિહાસમાં ત્રીજી વાર થયું આવું

ઓસ્ટ્રેલિયામાં બિગ બેશ લીગ શરૂ થઈ ગઈ છે. આજે એટલે કે 19 ડિસેમ્બરે બ્રિસ્બેન હીટ અને પર્થ સ્કોર્ચર્સ વચ્ચે ટૂર્નામેન્ટની છઠ્ઠી મેચ રમાઈ હતી. ગાબામાં રમાયેલી આ મેચમાં બ્રિસ્બેન હીટે જોરદાર બેટિંગ કરી હતી. તેઓએ 258 રનનો વિશાળ ટાર્ગેટ 19.5 ઓવરમાં ચેઝ કરી લીધો. બ્રિસ્બેન હીટ 8 વિકેટથી આ મેચ જીતી ગયું. ટી20 ક્રિકેટ ઇતિહાસમાં આ ત્રીજો મોટો રન ચેઝ હતો.

રન ચેઝનો રેકોર્ડ પંજાબ કિંગ્સના નામે છે

ટી20 ક્રિકેટમાં સૌથી મોટો રન ચેઝનો રેકોર્ડ પંજાબ કિંગ્સના નામે છે. પંજાબે 2014ની આઈપીએલમાં કોલકાતા નાઇટરાઇડર્સ સામે 262 રનનો ટાર્ગેટ ચેઝ કર્યો હતો. આ યાદીમાં બીજા નંબરે સાઉથ આફ્રિકા છે. જેણે વેસ્ટઇન્ડીઝ સામે 2023માં 259 રનનો ટાર્ગેટ ચેઝ કર્યો હતો.બ્રિસ્બેન હીટ માટે 258 રનનો ટાર્ગેટ ચેઝ કરવામાં જેક વિલ્ડરમુથ અને મેટ રેનશોએ મહત્વની ભૂમિકા ભજવી. બંને પ્લેયર્સે સદી ફટકારી, જેક વિલ્ડરમુથે 54 બોલમાં 203.70 ની સ્ટ્રાઇક રેટથી બેટિંગ કરીને 110 રન બનાવ્યાં. જ્યારે જેકે પોતાની ઇનિંગમાં 9 છગ્ગા અને પાંચ ચોગ્ગા ફટકાર્યા. મેટ રેનશોએ 200ની સ્ટ્રાઇક રેટથી બેટિંગ કરી 51 બોલમાં 102 રન બનાવ્યાં. તેણે પણ 9 છગ્ગા સાથે 5 ચોગ્ગા ફટકાર્યા.

કૂપર કોનોલીએ શાનદાર ઇનિંગ રમી

બ્રિસ્બેન હીટે ટોસ જીતીને પહેલા બોલિંગ કરવાનો નિર્ણય કર્યો હતો. એવામાં પર્થ સ્કોર્ચર્સે 20 ઓવરમાં 6 વિકેટના નુકસાન પર 257 રન બનાવ્યાં હતા. ફિન એલન અને કૂપર કોનોલીએ શાનદાર ઇનિંગ રમી હતી. એલને 38 બોલમાં 79 રન જ્યારે કોનોલીએ 37 બોલમાં 77 રન બનાવ્યાં હતા. જેવિયર બોર્ટલેટે બ્રિસ્બેન હીટ માટે સૌથી વધુ 2 વિકેટ લીધી હતી. જ્યારે શાહીન અફ્રીદી, જેક વિલ્ડરમુથ, લિયામ હોસ્કેટ અને મેથ્યૂ કુનહમેનને 1-1 વિકેટ લીધી છે.

આ પણ  વાંચો -India Vs south Africa 5th T20I : ભારતે દક્ષિણ આફ્રિકાને 30 રનથી હરાવીને સીરિઝ 3-1 થી જીતી