ઇંગ્લેન્ડના ભૂતપૂર્વ ટેસ્ટ સ્પિન-બોલિંગ ઓલરાઉન્ડર સમિત પટેલે 41 વર્ષની ઉંમરે ઇંગ્લેન્ડના સ્થાનિક ક્રિકેટમાંથી નિવૃત્તિની જાહેરાત કરી છે.T20 બ્લાસ્ટમાં છ મહિના માટે પ્રતિબંધ મૂકવામાં આવ્યાના થોડા દિવસો પછી જ આ નિર્ણય લેવામાં આવ્યો છે. ઇંગ્લેન્ડ અને વેલ્સ ક્રિકેટ બોર્ડએ પટેલ પર પ્રતિબંધ મૂક્યો હતો કારણ કે તેણે આ વર્ષે ગોવામાં આયોજિત વર્લ્ડ લિજેન્ડ્સ પ્રો લીગમાં ભાગ લીધો હતો. આ લીગને ભારતીય ક્રિકેટ કંટ્રોલ બોર્ડ (BCCI) દ્વારા મંજૂરી આપવામાં આવી ન હતી. મીડિયા રિપોર્ટ અનુસાર, બિન-માન્ય લીગમાં રમતા ખેલાડીઓ છ મહિના સુધી ઇંગ્લેન્ડના સ્થાનિક ક્રિકેટમાં રમી શકતા નથી. ભૂતપૂર્વ ઓસ્ટ્રેલિયન ફાસ્ટ બોલર પીટર સિડલ પર પણ આ જ કારણોસર પ્રતિબંધ મૂકવામાં આવ્યો હતો.
સમિત પટેલે નિવૃત્તિની જાહેરાત કરી
સમિત પટેલે નિવૃત્તિની જાહેરાત કરતા કહ્યું,હું મારી ઘરેલુ કારકિર્દીનો અંત લાવી રહ્યો છું,પરંતુ હું ક્યારેય ક્રિકેટથી દૂર નહીં જાઉં. હું હવે કોચિંગ, માર્ગદર્શન અને કોમેન્ટ્રીમાં મારા આગામી પગલાં લેવા માટે ઉત્સુક છું. આ રમતે મને ઘણું બધું આપ્યું છે. મેં જીવનભરના મિત્રો બનાવ્યા છે, અને દુનિયાભરમાં પ્રવાસ કરવાની અને ટ્રોફી જીતવાની યાદો હંમેશા મારી સાથે રહેશે.બીબીસી સાથે વાત કરતા,પટેલે વધુમાં જણાવ્યું કે વર્લ્ડ લિજેન્ડ્સ લીગમાં રમવાની આસપાસ ઘણી અનિશ્ચિતતા હતી, પરંતુ હવે તેમણે તે બાબતને પાછળ છોડીને આગળ વધવું પડશે. તેમણે કહ્યું કે તેઓ કદાચ તે લીગમાં રમ્યા ન હોત, પરંતુ આ નિર્ણયથી તેમની નિવૃત્તિ ઝડપી બની છે. તેમનો નિર્ણય ક્રિકેટ જગતમાં ચર્ચાનો વિષય બન્યો છે,પરંતુ તેમણે સ્પષ્ટતા કરી કે ક્રિકેટ સાથે તેમનો સંબંધ હંમેશા રહેશે.
