Smriti Mandhanaએ શેફાલી વર્મા સાથેની મિત્રતા વિશે શું કહ્યું છે?

સ્મૃતિ મંધાનાએ ઈંગ્લેન્ડ પ્રવાસની ધમાકેદાર શરૂઆત કરી છે. તેણે T20 સીરીઝની પહેલી જ મેચમાં સદી ફટકારીને રેકોર્ડ બુકમાં પોતાનું નામ નોંધાવ્યું. સ્મૃતિ મંધાનાએ 62 બોલમાં 112 રન બનાવ્યા, જેમાં 15 ચોગ્ગા અને 3 છગ્ગાનો છે.

આ માત્ર તેના T20 આંતરરાષ્ટ્રીય કરિયરની પહેલી સદી જ નહોતી, પરંતુ આ સાથે તે ત્રણેય ફોર્મેટમાં સદી ફટકારનારી પ્રથમ ભારતીય મહિલા ખેલાડી પણ બની.

સ્મૃતિ મંધાનાએ શેફાલી સાથેની યાદોને તાજી કરી

શેફાલી વર્મા અને સ્મૃતિ મંધાના વચ્ચેની મિત્રતા ભારતીય મહિલા ક્રિકેટમાં જાણીતી છે. બંને છેલ્લા 3-4 વર્ષથી ભારત માટે ઓપનિંગ કરી રહી છે. આ બંને મિત્રો ઇંગ્લેન્ડ સામે લાંબા સમય પછી ભારત માટે ઓપનિંગ કરી રહ્યા હતા. સાથે મળીને તેઓએ ભારતીય સ્કોર બોર્ડમાં 77 રન ઉમેર્યા. પરંતુ તે પહેલાં સ્મૃતિ મંધાનાએ શેફાલી માટે જે કહ્યું તે શાનદાર હતું.

શેફાલી એક વર્લ્ડ ક્લાસ પ્લેયર છે અને હંમેશા રહેશે - સ્મૃતિ

શેફાલી વર્મા 8 મહિના પછી ઈંગ્લેન્ડ સામેની સીરીઝ સાથે આંતરરાષ્ટ્રીય ક્રિકેટમાં વાપસી કરી રહી હતી. સ્મૃતિ મંધાનાએ પ્રથમ ટી20 પહેલા પ્રેસ કોન્ફરન્સમાં કહ્યું કે તે તેના લાયક હતી. તેણે કહ્યું કે શેફાલી એક વિશ્વ કક્ષાની ખેલાડી છે અને હંમેશા એવી જ રહેશે.

સ્મૃતિ મંધાનાએ વધુમાં કહ્યું કે શેફાલી માટે છેલ્લું એક વર્ષ ખૂબ સારું રહ્યું છે. જ્યારે તે ખરાબ સમયમાંથી પસાર થઈ રહી હતી ત્યારે તેણે ઘરેલુ ક્રિકેટ તરફ વળી અને  જ્યાં તેણે ઘણા રન બનાવ્યા. કોઈએ ક્યારેય તેના ટેલેન્ટ પર શંકા કરી ન હતી. તેણે જે રીતે ટીમ પર પોતાની છાપ છોડી છે તે પ્રશંસનીય છે.

ઇંગ્લેન્ડ સામેની પહેલી T20માં વર્લ્ડ રેકોર્ડ બન્યો

ઓક્ટોબર 2024 પછી શેફાલી વર્મા આંતરરાષ્ટ્રીય ક્રિકેટમાં પાછી ફરી, પરંતુ તે મોટી ઇનિંગ્સ રમી શકી નહીં. તેણે ઇંગ્લેન્ડ સામેની પહેલી T20 મેચમાં 100 થી ઓછા સ્ટ્રાઇક રેટથી ફક્ત 20 રન બનાવ્યા.જોકે, તેમ છતાં તે સ્મૃતિ મંધાના સાથે વિશ્વ રેકોર્ડ બનાવવામાં સફળ રહી. શેફાલી પોતે ભલે મોટો સ્કોર ન બનાવી હોય પરંતુ તે મંધાના સાથે સ્કોર બોર્ડમાં 77 રન ઉમેરવામાં સફળ રહી. તે બંને મહિલા T20 આંતરરાષ્ટ્રીય ક્રિકેટમાં 21 વખત ફિફ્ટી પ્લસ ભાગીદારી કરનાર ઓપનિંગ જોડી બની.