ફિફા વર્લ્ડ કપ 2026ના ગ્રુપ સ્ટેજના મુકાબલામાં ગુરુવારે રોમાંચક અને ઐતિહાસિક પરિણામો જોવા મળ્યા છે. મેક્સિકો, સ્વિટ્ઝર્લેન્ડ અને દક્ષિણ આફ્રિકા જેવી ટીમોએ પોતપોતાની મેચો જીતીને ટૂર્નામેન્ટમાં મજબૂત પકડ બનાવી લીધી છે, જ્યારે કેનેડા અને હૈતી જેવી ટીમોએ હાર છતાં પોતાની લડાયક રમતથી ચાહકોના દિલ જીત્યા છે.
મેક્સિકોની ઐતિહાસિક જીત અને અનોખો રેકોર્ડ
ગ્રુપ A ની ચેમ્પિયન મેક્સિકોની ટીમે ચેક રિપબ્લિક સામે 3-0 થી શાનદાર વિજય મેળવ્યો હતો. મેક્સિકો માટે 22 વર્ષીય માટો ચાવેઝે 55મી મિનિટે પહેલો ગોલ કર્યો, ત્યારબાદ જુલિયન ક્વિનોન્સે 2-0 થી લીડ અપાવી અને ઇન્જરી ટાઇમમાં અલ્વારો ફિડાલ્ગોએ ત્રીજો ગોલ કરીને જીત પાકી કરી દીધી. વર્લ્ડ કપના ઇતિહાસમાં આ પહેલી વાર છે જ્યારે મેક્સિકોએ ગ્રુપ સ્ટેજની ત્રણેય મેચ જીતી હોય. આ અગાઉ 1986 અને 2002 માં તેમનું સર્વશ્રેષ્ઠ પ્રદર્શન બે જીત અને એક ડ્રો રહ્યું હતું. આ મેચમાં મેક્સિકોના 17 વર્ષીય ગિલ્બર્ટો મોરા વર્લ્ડ કપમાં શરૂઆત કરનાર સૌથી યુવા ખેલાડી બન્યો છે. સાથે જ, 40 વર્ષીય દિગ્ગજ ગોલકીપર ગિલેર્મો ઓચોઆએ પોતાના છઠ્ઠા વર્લ્ડ કપમાં રમીને લિયોનેલ મેસ્સી અને ક્રિસ્ટિયાનો રોનાલ્ડોના સૌથી વધુ વર્લ્ડ કપ રમવાના રેકોર્ડની બરાબરી કરી લીધી છે.
સ્વિટ્ઝર્લેન્ડ ગ્રુપ Bમાં ટોપ પર, કેનેડા પણ નોકઆઉટમાં
બીજી તરફ, સ્વિટ્ઝર્લેન્ડે યજમાન કેનેડાને 2-1 થી હરાવીને ગ્રુપ B માં પ્રથમ સ્થાન મેળવી લીધું છે. સ્વિસ ટીમ તરફથી રુબેન વર્ગાસ અને 20 વર્ષીય જોહાન મઝામ્બીએ ગોલ કર્યા હતા. કેનેડા તરફથી 76મી મિનિટે પ્રોમિસ ડેવિડે એક ગોલ કરીને વાપસીનો પ્રયાસ કર્યો હતો, પરંતુ તેઓ સ્કોર બરાબર કરી શક્યા નહોતા. જોકે, હારવા છતાં કેનેડાની ટીમ પહેલીવાર વર્લ્ડ કપના નોકઆઉટ રાઉન્ડ (રાઉન્ડ ઓફ 32) માં પહોંચવામાં સફળ રહી છે, જ્યાં હવે તેમનો સામનો દક્ષિણ આફ્રિકા સામે થશે.
દક્ષિણ આફ્રિકાની ભવ્ય જીત
દક્ષિણ આફ્રિકાની ફૂટબોલ ટીમે વર્ષોની રાહનો અંત આણતા ઇતિહાસ રચ્યો છે. ગ્રુપ A ની પોતાની છેલ્લી મેચમાં દક્ષિણ કોરિયાને 1-0 થી હરાવીને ટીમ પોઈન્ટ ટેબલમાં બીજા સ્થાને રહી છે અને સીધી રાઉન્ડ ઓફ 32 માં પ્રવેશી ગઈ છે. ખેલાડીઓએ ઉત્તમ પ્રદર્શન દર્શાવ્યું અને સમગ્ર મેચ દરમિયાન શિસ્ત જાળવી રાખી. ટીમની મજબૂત રણનીતિ અને સંયમને કારણે નોંધપાત્ર વિજય થયો. આ જીત બાદ દક્ષિણ આફ્રિકાની સરકારે આને દેશ માટે ગર્વની ક્ષણ ગણાવી છે.
ફિફામાં બોસ્નિયાની શાનદાર રમત
બોસ્નિયા-હર્ઝેગોવિનાએ કતારને 3-1 થી હરાવીને નોકઆઉટમાં પહોંચવાની પોતાની આશાઓ જીવંત રાખી છે. બોસ્નિયા માટે 18 વર્ષીય કેરીમ અલયબેગોવિચે ગોલ કર્યો હતો, જે વર્લ્ડ કપના ઇતિહાસમાં સૌથી નાની ઉંમરે ગોલ કરનારા ખેલાડીઓમાંથી એક બન્યો છે. આ સિવાય કતારના સુલતાન અલ-બ્રેઇકે આત્મઘાતી ગોલ (own goal) કરીને બોસ્નિયાની જીત આસાન બનાવી દીધી હતી. બીજી તરફ, 52 વર્ષ પછી વર્લ્ડ કપમાં પરત ફરેલી હૈતીની ટીમ મોરોક્કો સામે હારી ગઈ હોવા છતાં, મેચમાં બે ગોલ કરીને પોતાના ચાહકોને ખુશ થવાની તક આપી હતી.
આ પણ વાંચો : FIFA World Cup Day 13 Result: ઈંગ્લેન્ડની મેચ ડ્રો, ક્રોએશિયાની જીત, કોલંબિયા નોકઆઉટમાં પહોંચ્યું
